កីឡា

មុនជួបអាស៊ីអឺរ៉ុបរសៀលនេះ អ្នកចាត់ការភ្នំពេញហ្គាឡាក់ស៊ីលើកពីកង្វល់របស់ក្រុមថ្នាក់ខេត្ត

បានផុស

៤ years មុន

នៅ

ថ្ងៃពុធ ២២ មិថុនា ២០២២

ដោយ

វេលាម៉ោង៣:៣០នាទីរសៀល ថ្ងៃពុធ ទី២២ ខែមិថុនា នេះ ក្រុមជើងឯកថ្នាក់ខេត្ត ភ្នំពេញហ្គាឡាក់ស៊ី ដើរតួនាទីជាម្ចាស់ផ្ទះល្អក្នុងការទទួលស្វាគមន៍ក្រុមភ្ញៀវ អាស៊ី អឺរ៉ុប យូណាយធីត នៅទីលានវិទ្យាល័យបឹងត្របែក រាជធានីភ្នំពេញ ក្នុងវគ្គជម្រុះថ្នាក់ជាតិ ជើងទី១ ពានរង្វាន់សម្តេចតេជោ ហ៊ុន សែន លើកទី១៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ជំនួបនេះ លោក ប៉ូ គីនណាក់ អ្នកចាត់ការទូទៅរបស់ក្រុមភ្នំពេញហ្គាឡាក់ស៊ីបានចាត់ទុកថា ជាការប្រកួតដ៏តឹងតែងសម្រាប់ក្រុមរបស់ខ្លួនដែលជួបនឹងក្លឹបអាស៊ី អឺរ៉ុប យូណាយធីត ដែលមានបទពិសោធច្រើនលើទីលានក្នុងពានរង្វាន់ផ្សេងៗដូចជា លីគ និងពានសម្តេចតេជោ ហ៊ុន សែន ជាដើម។

«សម្រាប់ក្រុមយើងដែលឡើងមកពីថ្នាក់ខេត្ត យើងដឹងហើយថា កម្រិតខេត្ត និងក្លឹបមានកម្រិតខុសគ្នាឆ្ងាយ។ កម្រិតនៃសមត្ថភាព បទពិសោធ ហ្វឹកហាត់ ប្រាក់ខែ អាហារហូបចុក ពេលវេលា ទាំងថ្នាក់ដឹកគ្រប់សព្វបែបយ៉ាង គេមានលើយើងទាំងអស់»។ លោក ប៉ូ គីនណាក់ បានលើកឡើង។

ក្រុមភ្នំពេញហ្គាឡាក់ស៊ី អបអរជ័យជម្នះជើងឯកថ្នាក់ខេត្ត

លោកបញ្ជាក់ថា អ្វីដែលជាសម្ពាធខ្លាំងបំផុតសម្រាប់ក្រុមទើបឡើងមកពីខេត្តទាំង៤គឺពាក់ព័ន្ធនឹងកីឡាករតែម្តង។ កីឡាករលេងតាំងពីវគ្គជម្រុះរហូតដល់វគ្គផ្តាច់ព្រ័ត្រថ្នាក់ខេត្ត កីឡាករខ្លះរបស់ក្រុមទាំងនោះមានជាប់ពិន័យ របួស នឿយហត់អស់កម្លាំងជាដើម។ ហេតុផលទាំងនេះហើយដែលក្រុមខេត្តកាន់តែមានសម្ពាធ ស្របពេលកម្រិតសមត្ថភាពទាបជាងក្លឹបដែលឈរជើងចាំវគ្គជម្រុះថ្នាក់ជាតិស្រាប់។

លោក ប៉ូ គីនណាក់ បានលើកឡើងថា ៖«ពាក់ព័ន្ធនឹងចំណុចខាងលើនេះ ខ្ញុំសូមឆ្លៀតឱកាស អំពាវនាវដល់សហព័ន្ធដែលជាស្ថាប័នអាណាព្យាបាល ក៏ដូចជាអ្នករៀបចំកម្មវិធីប្រកួត សូមមេត្តាជួយសម្របសម្រួល ក៏ដូចជាអនុញ្ញាតឲ្យមានការផ្លាស់ប្តូរកីឡាករ ឬបន្ថែមកីឡាករដល់ក្រុមមកពីខេត្តផង។ ពីព្រោះនៅក្នុងគោលការណ៍ដែលគណៈកម្មការរៀបចំហ្នឹងគឺមិនមានបន្ថែម ឬផ្លាស់ប្តូរកីឡាករទេគឺរហូតដល់ចប់រដូវកាល។ អីចឹងទាល់តែចូលរដូវកាលថ្មីទើបមានសិទ្ធិផ្លាស់ប្តូរ ឬបន្ថែមកីឡាករថ្មី»។

សូមបញ្ជាក់ថា ភ្នំពេញហ្គាឡាក់ស៊ី ជាក្រុមមួយក្នុងចំណោមក្រុមខេត្តទាំង៤ដែលបានឡើងមកកាន់វគ្គជម្រុះថ្នាក់ជាតិពានរង្វាន់សម្តេចតេជោ ហ៊ុន សែន លើកទី១៦ ឆ្នាំ២០២២ ត្រូវប្រកួតជាមួយក្លឹបមកពីលីគទី២ដែលឈរចាំស្រាប់។ ភ្នំពេញហ្គាឡាក់ស៊ី ឡើងមកក្នុងនាមជាជើងឯកថ្នាក់ខេត្ត ក្រុមខេត្តឧត្តរមានជ័យ ជាជើងឯករង និងក្រុមកំពត់ អេហ្វស៊ី ព្រមទាំង ក្រុមឬទ្ធីសែន មកពីខេត្តកំពង់ឆ្នាំង។

ការប្រកួតជើងទី១របស់ក្រុមមកពីខេត្ត៣កាលពីម្សិលមិញសុទ្ធតែចាញ់ទាំងអស់គឺ ក្រុមខេត្តឧត្តរមានជ័យ ចាញ់ អាយ អេស អាយ ដង្កោសែនជ័យ ១-៣។ ក្រុមឬទ្ធីសែន ចាញ់ក្រុមខេត្តកោះកុង ២-៣ និងក្រុមកំពត អេហ្វស៊ី ចាញ់ក្រុម ព្រៃវែង អេហ្វស៊ី ២-៥៕