កីឡា

គីរីវង់សុខសែនជ័យ ជាក្រុមបន្ថែមកម្លាំងថ្មីច្រើនជាងគេ នៅជើងទី ២ នៃខេមបូឌានព្រីមៀរលីគ

បានផុស

៤ years មុន

នៅ

ថ្ងៃសុក្រ ៨ កក្កដា ២០២២

ដោយ

ក្លិបបាល់ទាត់គីរីវង់សុខសែនជ័យ ដែលជាដៃគូសហការផ្សព្វផ្សាយរបស់ ‘កម្ពុជាថ្មី’ បានក្លាយទៅជាក្រុមដែលបន្ថែមកម្លាំងកីឡាករច្រើនជាងគេនៅជើងទី ២ នៃពានរង្វាន់ខេមបូឌៀនព្រីមៀរលីគ រដូវកាល ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីផ្សារដោះដូរកីឡាករបានបើកជាផ្លូវការតាំងពីថ្ងៃទី ២៤ ខែមិថុនា ហើយក្រុមមានមូលដ្ឋាននៅខេត្តតាកែវមួយនេះ បានប្រកាសនាំចូលកីឡាករថ្មីដំបូងគេ គឺកីឡាករខ្សែបម្រើ លឹម អារុណ ក្រោមលក្ខខណ្ឌខ្ចីជើងពីក្លិបបាល់ទាត់បឹងកេត។ ក្រោយមកទៀតក្លិបក៏បានប្រកាសជាផ្លូវការ ក្នុងការនាំយកកីឡាករ Marko Ivanovic ជាខ្សែការពារថ្មីសញ្ជាតិម៉ុតេណេក្រូ វ័យ ២៦ ឆ្នាំ មានបទពិសោធន៍ជាច្រើនក្នុងការលេងបាល់អាជីពនៅអឺរ៉ុប និងលីគកំពូលម៉ាល់ឌីវ មុននឹងផ្លាស់មកកាន់ក្លិបគិរីវង់សុខសែនជ័យ។

ទី ៣ គឺកីឡាករខ្សែប្រយុទ្ធសញ្ជាតិជប៉ុន Motohiro Kaneshiro មានបទពិសោធន៍ជាច្រើនក្នុងការលេងបាល់អាជីពនៅ ប្រទេសថៃ រួចផ្លាស់ទៅកាន់ លីគកំពូលម៉ុងហ្គោលី ៣ រដូវកាល បង្ហាញខ្លួនបាន ៥៧ ដង រកគ្រាប់បាល់បាន ៤៧ គ្រាប់ រួចបន្តទៅកាន់លីគកំពូលស្រីលង្ការ បង្ហាញខ្លួនបាន ៩ ប្រកួត រកបាន ៤ គ្រាប់ និងបញ្ជូនឲ្យមិត្តរួមក្រុមស៊ុតបញ្ចូលទីបាន ២ ដង។

ចុងក្រោយថ្មីៗនេះ ក្លិបបានប្រកាសជាផ្លូវការក្នុងការនាំយកកីឡាករខ្សែបម្រើស្លាប សុខ បញ្ញា និងកីឡាករខ្សែការពារ ណុប សុផានុ ក្រោមលក្ខខណ្ឌខ្ចីជើងពីក្លិបបាល់ទាត់ភ្នំពេញក្រោន។ ដូច្នេះសរុបមកគីរីវង់សុខសែនជ័យ បាននាំចូលកីឡាករថ្មី ៥ រូប ក្នុងនោះបរទេស ២ រូប។ ក្រៅពីនេះ ក៏មានកីឡាករចាកចេញច្រើនផងដែរ រួមមានកីឡាករអ៊ូសបេគីស្ថាន Sukhrob Rakhmonov, កីឡាករកាមេរ៉ូន Robert Ghansah, កីឡាករហ្វីលីពីន OJ Porteria និងកីឡាករកម្ពុជា ២ រូប រ័ត្ន សំណាង និងតាំង សុភក្ត្រ។

សូមបញ្ជាក់ថា គីរីវង់សុខសែនជ័យ បច្ចុប្បន្នកំពុងឈរនៅលេខ ៨ នៃតារាងចំណាត់ថ្នាក់ ក្រោយប្រកួត ៩ ដង ស្មើ ២ និងចាញ់ ៧ ដង មាន ២ ពិន្ទុ។ ចុងសប្ដាហ៍នេះក្រុមនៃខេត្តតាកែវ នឹងបើកទ្វារកីឡដ្ឋានគីរីវង់ ទទួលស្វាគមន៍ ក្លិបវិសាខា នៅវេលាម៉ោង ៣:៤៥ នាទីរសៀល ខណៈការប្រកួតមានផ្សាយផ្ទាល់នៅលើហ្វេសប៊ុកផេក ‘កម្ពុជាថ្មី’ ផងដែរ៕

អត្ថបទ៖ មន្នីរ័ត្ន

Related Topics:កីឡាបាល់ទាត់