កីឡា

ប្រដាល់សកលកម្ពុជា ចេញទៅប្រកួតជើងឯកអាស៊ី នៅហ្ស៊កដានី

បានផុស

៤ years មុន

នៅ

ថ្ងៃចន្ទ ៣១ តុលា ២០២២

ដោយ

កីឡាករជម្រើសជាតិប្រដាល់សកលកម្ពុជា ចំនួន ៦ រូប បានចេញទៅចូលរួមប្រកួតកីឡាប្រដាល់សកលជើងឯកអាស៊ី (ASBC Asian Elite Men And Women Boxing Championship) ឆ្នាំ ២០២២ នៅប្រទេសហ្ស៊កដានី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធបានបញ្ជូនកីឡាករ ៦ រូប ក្នុងនោះ ៤ រូប ហ្វឹកហាត់ និងចាកចេញពីកម្ពុជា រួមមាន កីឡាករ សៅ រង្សី, នូវ សុខទី, ទូច ដេវីត និង វ៉ែន រដ្ឋា ខណៈ ២ រូបទៀត ហ្វឹកហាត់ និងធ្វើដំណើរពីប្រទេសអូបេគីស្ថាន គឺកីឡាករ ណាស្រេឌីនូវ អាន់វ៉ា និងកីឡាករ រ៉ាចាពៅ អាប់ឌុលឡា។ ការប្រកួតនេះ ចាប់ផ្ដើមពីថ្ងៃទី ៣០ ខែតុលា ដល់ថ្ងៃទី ១៣ ខែវិច្ឆិកា ឆ្នាំ ២០២២។ នេះបើតាមការបញ្ជាក់ដោយ លោក ប៊ុយ សុភ័ណ្ឌ អគ្គលេខាធិការសហព័ន្ធ និងជាប្រធានប្រតិភូដឹកនាំបេសកកម្ម។

ការប្រកួតនេះ គឺជាការធ្វើតេស្តយ៉ាងសំខាន់សម្រាប់កីឡាករប្រដាល់សកលជម្រើសជាតិកម្ពុជា ដើម្បីត្រៀមឆ្ពោះទៅស៊ីហ្គេម ឆ្នាំ ២០២៣ ដែលជាការវាស់ស្ទង់សមត្ថភាពរបស់កីឡាករម្នាក់ៗថា តើពួកគេឈានដល់កម្រិតណា បន្ទាប់ពីការហ្វឹកហាត់ជាមួយគ្រូបង្វឹកថ្មីជនជាតិកាហ្សាក់ស្ថាន លោក Kassymkhanov Berikbol Amantayevich ដែលជាគ្រូបង្វឹកជាប់កិច្ចសន្យាឧបត្ថម្ភគាំទ្រដោយគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី ៣២ ឆ្នាំ ២០២៣ (CAMSOC)។

លោកបន្ថែមថា «អ្វីដែលជាយុទ្ធសាស្ត្រសំខាន់សម្រាប់សហព័ន្ធ ការបញ្ជូនកីឡាករចូលរួមព្រឹត្តិការណ៍នេះ គឺជាការវាស់ស្ទង់បច្ចេកទេសដ៏សំខាន់សម្រាប់ក្រុមជម្រើសជាតិរបស់យើងដែលយើងផ្ដល់ឱកាសឲ្យពួកគាត់បានចូលរួមប្រកួតលក្ខណៈអន្តរជាតិ ដ្បិតពួកគាត់មិនសូវមានឱកាសច្រើនក្នុងការប្រកួតថ្នាក់ជាតិ និងអន្តរជាតិ។ អ៊ីចឹងនេះជាឱកាសសំខាន់ក្នុងការពង្រឹងបច្ចេកទេស ក៏ដូចជាវាស់ស្ទង់កម្រិតរបស់ពួកគាត់ថា ពួកគាត់ឈានដល់កម្រិតណា ដើម្បីឲ្យពួកគាត់ត្រៀមលក្ខណៈបន្ថែមឈានទៅដណ្ដើមមេដាយមាសសម្រាប់ស៊ីហ្គេម ឆ្នាំ ២០២៣»។

«ការចូលរួមនេះដែរ យើងជឿជាក់ថា ពួកគាត់នឹងអាចធ្វើបានល្អជាងការប្រកួតជើងឯកអាស៊ីលើកមុនៗ។ យើងគិតថា ពួកគាត់នឹងទទួលបានជ័យជម្នះលើគូប្រកួតដែលមានកម្រិតបច្ចេកទេសប្រហាក់ប្រហែលគ្នា ក៏ដូចជាក្រោមពួកគាត់។ ពួកយើងគិតថា ពួកគាត់នឹងអាចធ្វើបានល្អជាងឆ្នាំមុនៗ ដែលយើងធ្លាប់ចូលរួមប្រកួត ដោយសារប្រវត្តិសាស្ត្ររបស់ប្រដាល់សកលកម្ពុជា ពុំធ្លាប់ទទួលបានមេដាយកម្រិតអាស៊ី…»។ នេះបើតាមការបញ្ជាក់បន្ថែមរបស់លោក ប៊ុយ សុភ័ណ្ឌ៕

អត្ថបទ ៖ មន្នីរ័ត្ន

Related Topics:កីឡាប្រដាល់សកលកម្ពុជា