លោក ខៀវ សាម៉េត ក្លាយជាប្រធានបាល់ទាត់អាស៊ាន AFF សម្រាប់អាណត្តិទី ២

បុរស​កម្ពុជា លោក​នាយ​ឧត្ដមសេនីយ៍ ខៀវ សាម៉េត ត្រូវ​បាន​អាណត្តិ​ថ្មី​ដោយ​មិន​មាន​ការ​ជំទាស់ ដើម្បី​បន្ត​ធ្វើជា​ប្រធាន​សហព័ន្ធ​កីឡាបាល់ទាត់​អាស៊ីអាគ្នេយ៍ (អាស៊ាន) ហើយ​នឹង​ដឹកនាំ​សហព័ន្ធ​សម្រាប់​អាណត្តិ​ទី ២ ចាប់ពី​ឆ្នាំ ២០២២ ដល់​ឆ្នាំ ២០២៦។

លោក​ឧត្ដមសេនីយ៍​ឯក ខៀវ សាម៉េត បាន​ចាប់ផ្ដើម​អាណត្តិ​ថ្មី​ជា​ផ្លូវការ​នៅ​ក្នុង​សមាជ​សាមញ្ញ​របស់ AFF ដែល​បាន​ឃើញ​ការ​បោះឆ្នោត​សម្រាប់​មុខតំណែង​ផ្សេងៗ​នៅ​ក្នុង​ក្រុមប្រឹក្សា AFF ផង​ដែរ។ សមាជ​សាមញ្ញ​របស់ AFF បាន​ធ្វើ​នៅ​ខេត្ត​សៀមរាប ថ្ងៃ​ទី ១៤ វិច្ឆិកា ម្សិលមិញ​នេះ។

សម្រាប់​មុខតំណែង​អនុប្រធាន AFF មាន Pengiran Matusin bin Pengiran Matasan មកពី​ព្រុយណេ​, Maaike Ira Puspita មកពី​ឥណ្ឌូណេស៊ី និង Hon. Francisco Martins da Costa Pereira Jeronimo មកពី Timor Leste បាន​ឈ្នះ​តំណែង​ដោយ​មិន​មានការ​ប្រជែង​គ្នា។

AFF បាន​ប្រកាស​ថា ដោយសារតែ​ការ​ទទួល​មរណភាព​របស់​លោក Lim Kia Tong ដែល​ជា​បេក្ខភាព​សម្រាប់​តំណែង​អនុប្រធាន AFF គណៈកម្មាធិការ​រៀបចំ​ការបោះឆ្នោត​បាន​សម្រេច​ថា បេក្ខភាព​របស់​គាត់​ទុកជា​មោឃៈ។ ការ​បោះឆ្នោត​សម្រាប់​មុខតំណែង​នេះ នឹង​ធ្វើ​ឡើង​នៅ​មហាសន្និបាត AFF Ordinary Congress ឬ AFF Extraordinary Congress បន្ទាប់។

ចំណែក Chris Nikou (អូស្ត្រាលី), Viphet Sihachakr (ឡាវ), Datuk Haji Hamidin bin Haji Mohd Amin (ម៉ាឡេស៊ី), Ko Ko Thein (មីយ៉ាន់ម៉ា) និង Thanasak Suraprasert (ថៃ) ត្រូវ​បាន​ប្រកាស​ជា​សមាជិក​ក្រុម​ប្រឹក្សា AFF ខណៈ Teo Chwee Lian Julie មកពី​សិង្ហបុរី នឹង​ទទួល​តំណែង​ជា​សមាជិក​ក្រុមប្រឹក្សា​ស្ត្រី AFF៕

ប្រភព ៖ aseanfootball.org

អត្ថបទ ៖ មន្នីរ័ត្ន