កីឡា

កម្ពុជា លត់ ព្រុយណេ ៥-១ បង្កើតប្រវត្តិឈ្នះ២លើក នៅជុំផ្តាច់ព្រ័ត្រ

បានផុស

២ years មុន

នៅ

ថ្ងៃព្រហស្បតិ៍ ២៩ ធ្នូ ២០២២

ដោយ

ក្រុមបាល់ទាត់ជម្រើសជាតិកម្ពុជាបានបង្កើតកំណត់ត្រាក្នុងការឈ្នះពីរប្រកួតក្នុងវគ្គសន្សំចែកពូល ជុំផ្តាច់ព្រ័ត្រជាលើកដំបូងនៃពានរង្វាន់ AFF Mitshubishi Eletric Cup បន្ទាប់ពីបានឈ្នះក្រុមជម្រើសជាតិ ព្រុយណេ ដោយលទ្ធផល ៥-១ ក្នុងការប្រកួតសន្សំពិន្ទុពូល A លើកទី៣ នៅពហុកីឡដ្ឋានជាតិមរតកតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតបាន២១នាទីត្រូវបានភ្ញៀវ ព្រុយណេ នាំមុខ ១-០ ដោយការតែតចូលទីពីការលើកបាល់ពីជ្រុង ប៉ុន្តែដល់នាទី៣១ កម្ពុជា តាមស្មើ ១-១ ដោយខ្សែការពារ ជូន ចាន់ចាវ បន្ទាប់ពីបញ្ជូនបាល់ពីខ្សែការពារ ទេស សម្បត្តិ។ ចូលវគ្គទី២ កម្ពុជា បានប្តូរ សារ ទី និង រ៉ឺង ប៊ុនហៀង ជំនួសដោយ លឹម ពិសុទ្ធ និង សៀង ចន្ធា ហើយបានព្យាយាមកៀបសង្កត់។

ដល់នាទី៥៣ កម្ពុជាទទួលបានពិន័យ១១ម៉ែត្រ បន្ទាប់ពីខ្សែការពារព្រុយណេបង្កកំហុសលើកីឡាករ Nick Taylor ដែលជាអ្នកស៊ុតបានសម្រេចជួយឲ្យកម្ពុជានាំមុខ ២-១។ បន្ទាប់មក កម្ពុជានៅតែបន្តសម្រុក ហើយនៅនាទី៧៣ កម្ពុជាទទួលបានបាល់ពិន័យ១១ម៉ែត្រជាលើកទី២ ហើយលើកនេះ កែវ សុខផេង ដែលដូរចូលជំនួស Nick Taylor ស៊ុតបានសម្រេចជួយឲ្យកម្ពុជានាំមុខ ៣-១។

៣គ្រាប់ហើយនៅមិនទាន់អស់ទេ ខ្សែប្រយុទ្ធវ័យក្មេង លឹម ពិសុទ្ធ ស៊ុតបាន២គ្រាប់នៅនាទី៨០ និងនាទី៨៩ ដើម្បីបន្តនាំមុខ ៥-១។ ចប់ការប្រកួតកម្ពុជាឈ្នះ ៥-១។

ការលេងនៅវគ្គសន្សំពិន្ទុ ជុំផ្តាច់ព្រ័ត្រ ៩លើកហើយគិតចាប់តាំងពីឆ្នាំ១៩៩៦មក នេះជាលើកទី១ហើយដែលកម្ពុជាឈ្នះ២ប្រកួត។ ប៉ុន្តែបើនិយាយក្នុងវគ្គជម្រុះវិញ កម្ពុជាធ្លាប់ឈ្នះដល់ទៅ៣លើកក្នុងមួយរដូវកាល។