កីឡា

FIFA ដកសិទ្ធិ ឥណ្ឌូណេស៊ី ពីការធ្វើជាម្ចាស់ផ្ទះ FIFA U-20 World Cup ជាផ្លូវការ

បានផុស

៣ years មុន

នៅ

ថ្ងៃព្រហស្បតិ៍ ៣០ មីនា ២០២៣

ដោយ

ស្ថាប័នបាល់ទាត់ពិភពលោក (FIFA) បាននិយាយកាលពីថ្ងៃពុធថា ប្រទេសឥណ្ឌូណេស៊ី ត្រូវបានដកហូតនូវឱកាសរបស់ខ្លួនដើម្បីធ្វើជាម្ចាស់ផ្ទះ នៃការប្រកួតបាល់ទាត់ពិភពលោកអាយុក្រោម ២០ ឆ្នាំ (FIFA U-20 World Cup 2023) បន្ទាប់ពីមន្ត្រីក្នុងតំបន់បាននិយាយថា ពួកគេនឹងមិនអនុញ្ញាតឲ្យជនជាតិអ៊ីស្រាអែល ស្នាក់នៅក្នុងទីក្រុងរបស់ពួកគេចំពេលមានការតវ៉ាជុំវិញការចូលរួមរបស់អ៊ីស្រាអែល នៅក្នុងការប្រកួត នៃពានរង្វាន់នេះ។

នៅក្នុងសេចក្ដីថ្លែងការណ៍លើគេហទំព័ររបស់ FIFA បាននិយាយថា ការសម្រេចចិត្តនេះត្រូវបានធ្វើឡើងបន្ទាប់ពីកិច្ចប្រជុំរវាងប្រធាន FIFA លោក Gianni Infantino និងប្រធានសមាគមបាល់ទាត់ឥណ្ឌូណេស៊ី (PSSI) លោក Erick Thohir។

មុននេះ FIFA បានលុបចោលការចាប់ឆ្នោតបែងចែកពូល បន្ទាប់ពីអភិបាលតំបន់ និងអ្នកតវ៉ាទាមទារឲ្យអ៊ីស្រាអែលត្រូវបានហាមឃាត់ពីព្រឹត្តិការណ៍ U-20 និងសម្រាប់ការលើកលែងជនជាតិអ៊ីស្រាអែល ពីការស្នាក់នៅក្នុងទីក្រុងរបស់ពួកគេ រួមទាំងនៅកោះបាលី ដែលជាកន្លែងដែលក្រុមអ៊ីស្រាអែលគ្រោងនឹងលេង។ ប្រធានាធិបតីឥណ្ឌូណេស៊ី លោក Joko Widodo បាននិយាយកាលពីថ្ងៃអង្គារថា ការចូលរួមរបស់អ៊ីស្រាអែល មិនមានន័យថាការផ្លាស់ប្ដូរគោលនយោបាយការបរទេសរបស់ប្រទេស “ចំពោះប៉ាឡេស្ទីន” ដោយលើកហេតុផលថា កីឡា និងនយោបាយ មិនគួរត្រូវបានលាយបញ្ចូលគ្នានោះទេ។

យោងតាមបទប្បញ្ញត្តិរបស់ FIFA ម្ចាស់ផ្ទះសម្រាប់ការប្រកួតអន្តរជាតិណាមួយរបស់ខ្លួនត្រូវតែអនុញ្ញាតឲ្យអ្នកគាំទ្រមកពីជុំវិញពិភពលោកមកប្រកួតដូចករណីក្នុងព្រឹត្តិការណ៍ World Cup រដូវរងាកន្លងមកនេះនៅប្រទេសកាតា។

ម្ចាស់ផ្ទះថ្មី នឹងត្រូវបានប្រកាសឲ្យបានឆាប់តាមដែលអាចធ្វើបាន ជាមួយនឹងកាលបរិច្ឆេទ នៃការប្រកួត – ថ្ងៃទី ២០ ខែឧសភា ដល់ថ្ងៃទី ១១ ខែមិថុនា – បច្ចុប្បន្នមិនផ្លាស់ប្ដូរទេ។ FIFA បាននិយាយនៅក្នុងសេចក្ដីថ្លែងការណ៍របស់ខ្លួនថា ការដាក់ទណ្ឌកម្មសក្ដានុពលប្រឆាំងនឹងសហព័ន្ធបាល់ទាត់ឥណ្ឌូណេស៊ី (PSSI) ក៏អាចត្រូវបានសម្រេចនៅដំណាក់កាលបន្ទាប់ផងដែរ។

ប្រព័ន្ធផ្សព្វផ្សាយអាហ្សង់ទីន DobleAmarilla បានរាយការណ៍ថា សមាគមកីឡាបាល់ទាត់អាហ្សង់ទីន ស្នើធ្វើជាម្ចាស់ផ្ទះការប្រកួតក្នុងព្រឹត្តិការណ៍ដែល FIFA សម្រេចដកសិទ្ធិធ្វើម្ចាស់ផ្ទះរបស់ប្រទេសឥណ្ឌូណេស៊ីនេះ។

FIFA បានកត់សម្គាល់ថា “ទោះបីជាការសម្រេចចិត្តនេះវានៅតែប្ដេជ្ញាចិត្តក្នុងការជួយ PSSI យ៉ាងសកម្ម ដោយកិច្ចសហប្រតិបត្តិការជិតស្និទ្ធ និងដោយមានការគាំទ្រពីរដ្ឋាភិបាលរបស់ប្រធានាធិបតី [Joko] Widodo ក្នុងដំណើរការផ្លាស់ប្ដូរកីឡាបាល់ទាត់ឥណ្ឌូណេស៊ី បន្ទាប់ពីសោកនាដកម្មដែលបានកើតឡើងក្នុងខែតុលា ឆ្នាំ ២០២២”។ ដោយសំដៅទៅលើការរត់ជាន់គ្នាបន្ទាប់ពីការប្រកួតបាល់ទាត់ក្នុងទីក្រុង Malang ដែលបានបណ្ដាលឲ្យមនុស្សយ៉ាងហោចណាស់ ១២៥ នាក់ស្លាប់ ក្នុងនោះមានអនីតិជនជាច្រើន។

FIFA បានបន្ថែមថា លោក Infantino និង លោក Thohir នឹងជួបគ្នាម្តងទៀតក្នុងពេលឆាប់ៗនេះ”សម្រាប់ការពិភាក្សាបន្ថែម”៕

ប្រភព ៖ bbc.com

អត្ថបទ ៖ មន្នីរ័ត្ន