ហេដ្ឋារចនាសម្ព័ន្ធកីឡារបស់កម្ពុជា ត្រៀមស៊ីហ្គេម២០២៣ រួចរាល់ ៩០ភាគរយហើយ

សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ​រៀបចំការប្រកួត​កីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ (CAMSOC-CAMAPGOC) បានមានប្រសាសន៍ថា ហេដ្ឋារចនាសម្ព័ន្ធនានារបស់កម្ពុជា ត្រៀមសម្រាប់ព្រឹត្តិការណ៍កីឡាស៊ីហ្គេម២០២៣ រួចរាល់ ៩០ភាគរយហើយ ខណៈនៅសល់ ១០ភាគរយទៀតគឺជាការតុបតែងតែប៉ុណ្ណោះ។

មានប្រសាសន៍ដូច្នេះក្នុងឱកាស សម្តេចពិជ័យសេនា ទៀ បាញ់ បានទទួលជួបសំណេះសំណាលជាមួយបណ្ដា​អង្គទូតអាស៊ានប្រចាំព្រះរាជាណាចក្រកម្ពុជា និងចុះត្រួតពិនិត្យហេដ្ឋារចនាសម្ព័ន្ធនានាក្នុងពហុកីឡដ្ឋានជាតិមរតកតេជោ ក៏ដូចជាភូមិកីឡា នាព្រឹកថ្ងៃទី០៨ ខែមេសា ឆ្នាំ២០២៣ នេះ។

ពិធីសំណេះសំណាលនេះមានការចូលរួមពីឯកអគ្គរាជទូត ឯកអគ្គរដ្ឋទូត និងទីម័រ ប្រចាំព្រះរាជាណាចក្រកម្ពុជា សម្តេចពិជ័យសេនា ទៀ បាញ់ បានអញ្ជើញបណ្ដាអង្គទូតចុះត្រួតពិនិត្យដោយផ្ទាល់នូវសំណង់​ភូមិកីឡា​ដែលបានសាងសង់រួចរាលជាស្ថាពរ រួមទាំងទីលានប្រកួតមួយចំនួន។

សម្តេចពិជ័យសេនា បានជម្រាបជូនបណ្ដាអង្គទូត អំពីទីតាំងប្រកួតនានាទាំងនៅក្នុងរាជធានីភ្នំពេញ និងតាមបណ្ដាខេត្តគឺរួចរាល់ ៩០ភាគរយផងដែរ ដោយនៅសល់តែការងារតុបតែង និងការរៀបចំលំអ​មួយចំនួនទៀតប៉ុណ្ណោះ។ ក្នុងឱកាសនោះ សម្តេចក៏បានស្នើសុំបណ្ដាអង្គទូជួយពាំនាំនូវរាល់សមិទ្ធិផលទាំងឡាយ ដែលកម្ពុជាសម្រេចបាននាពេលនេះ និងជួយគាំទ្របន្តដើម្បីកម្ពុជាមានលទ្ធភាព សមត្ថភាពគ្រប់គ្រាន់​ក្នុងការធ្វើម្ចាស់ផ្ទះស៊ីហ្គេម ឆ្នាំ២០២៣ ឱ្យសម្រេចលទ្ធផលល្អ។

ជាមួយគ្នានេះនៅក្រោយពិធីសំណេះសំណាល សម្តេចពិជ័យសេនា ទៀ បាញ់ មានប្រសាសន៍នៅក្នុង​កិច្ចសម្ភាសន៍ជាមួយបណ្ដាសារព័ត៌មានទៀតដូច្នេះថា «ថ្ងៃនេះចាត់ទុកថាជាថ្ងៃដ៏វិសេសវិសាលមួយផងដែរ ដែលបណ្ដាអង្គទូតទាំងឡាយរបស់អាស៊ាន គឺបានមកពិនិត្យរួមជាមួយយើងខ្ញុំទាំងអស់គ្នា ដោយពិនិត្យជាក់​ស្ដែងនៅទីតាំងដែលយើងរៀបចំដើម្បីប្រកួតកីឡានាពេលខាងមុខនេះ។ ដូច្នេះតាមរយៈនៃការពិនិត្យជាក់​ស្ដែងតាំងពីថ្ងៃមុន ហើយថ្ងៃនេះមកពិនិត្យឡើងវិញគឺអ្វីៗទាំងអស់គឺបានរៀបរយ គឺអាចនិយាយបានថា ៩០ភាគរយ នៅសល់ ១០ភាគរយ គឺចាត់ទុកថាការតុបតែង និងអនាម័យបន្តិចបន្តួចទៀត ហើយនឹងតុបតែងឱ្យសម​រម្យតាមសោភណ្ឌភាព និងប្រភេទកីឡានីមួយៗតែប៉ុនហ្នឹងទេ ក្រៅពីនេះយើងរៀបរយអស់ហើយ»។

សម្តេចពិជ័យសេនា ទៀ បាញ់ ក៏បានមានប្រសាសន៍ជម្រាបជូនអំពីទីលានតាមបណ្ដាខេត្តនានា ដូចជាខេត្តសៀមរាប ខេត្តព្រះសីហនុ ខេត្តកំពត និងខេត្តកែប ក៏បានត្រៀមរួចរាល់ដូចគ្នា ជាមួយនឹងសម្ភារៈប្រកដោយគុណភាព និងស្ដង់ដា ដែលត្រូវដំឡើង៕

អត្ថបទ៖ មន្នីរ័ត្ន