កីឡា

U23 កម្ពុជាប៉ះលីបង់យប់នេះវគ្គជម្រុះក្នុងពូល ពាន AFC U23 Asian Cup

បានផុស

២ years មុន

នៅ

ថ្ងៃពុធ ៦ កញ្ញា ២០២៣

ដោយ

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) នឹងប្រកួតជាមួយ U23 លីបង់ វេលាម៉ោង៨យប់នេះ វគ្គជម្រុះក្នុងពូលពានរង្វាន់ AFC U23 Asian Cup Qatar ឆ្នាំ២០២៤ នៅប្រទេសអារ៉ាប៊ីសាអ៊ូឌីត។

ឆ្នាំ២០២៣នេះ ក្រុម U23 កម្ពុជាជាប់រវល់ខ្លាំងមែនទែន ក្នុងនោះប្រកួតក្នុងព្រឹត្តិការណ៍កីឡាស៊ីហ្គេម និង AFF U23 Championship នៅប្រទេសថៃ ប៉ុន្តែធ្លាក់ត្រឹមវគ្គសន្សំពិន្ទុក្នុងពូលទាំងអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុម U23 កម្ពុជាបានយកឈ្នះព្រុយណេ ៥-០, ស្មើ មីយ៉ាន់ម៉ា ១-១ និងចាញ់ថៃ 0-២ ក្នុងពានរង្វាន់ AFF U23 ខណៈ៤ប្រកួតក្នុងកីឡាស៊ីហ្គេម ក្រុមកម្ពុជាឈ្នះទីម័រខាងកើត ៤-០, ស្មើហ្វីលីពីន ១-១, ចាញ់ មីយ៉ាន់ម៉ា ០-២ និងចាញ់ឥណ្ឌូណេស៊ី ១-២។

ចំពោះក្រុម U23 លីបង់ក៏ធ្វើមិនសូវបានល្អដែរសម្រាប់៥ប្រកួតចុងក្រោយរបស់ខ្លួនក្នុងឆ្នាំ២០២៣។ ក្នុងព្រឹត្តិការណ៍ Pan Arab Games ពួកគេបានចាញ់អាល់ហ្សេរី ០-២, ចាញ់អូម៉ង់ ០-១ និងចាញ់ស៊ូដង ០-៣ ខណៈ២ប្រកួតក្នុងពានរង្វាន់ WAFF U23 Championship ក្រុមលីបង់បានចាញ់យ៉េមែន ១-២ និងចាញ់អូម៉ង់ ០-១។

ការបង្ហាញខ្លួនចុងក្រោយរបស់ U23 កម្ពុជា ក្នុងពាន AFC U23 Asian Cup បានធ្លាក់ត្រឹមវគ្គសន្សំពិន្ទុក្នុងពូល។ឆ្នាំ២០២២ កម្ពុជាស្ថិតក្នុងពូល K ជាមួយជប៉ុន ហុងកុង និង កូរ៉េខាងជើង ប៉ុន្តែប្រទេសកូរ៉េខាងជើង សុំដកខ្លួន។ ក្រុមកម្ពុជា ឈរលេខ២ ក្នុងពូល K ដោយប្រកួត២ លើកឈ្នះ១ និងចាញ់១។

ថ្ងៃទី២៣ ខែតុលា ឆ្នាំ ២០២១ ក្រុមកម្ពុជាបានយកឈ្នះក្រុមហុងកុង ៤-២។ គ្រាប់ទាំង៤ របស់កម្ពុជារកបានដោយ កីឡាករ សៀង ចន្ធា ២គ្រាន់ កីឡាករ លឹម ពិសុទ្ធ ១គ្រាប់ និងកីឡាករ មិន រតនៈ ១គ្រាប់។

ថ្ងៃទី២៦ ខែតុលា ឆ្នាំ ២០២១ ក្រុម U23 កម្ពុជា ចាញ់ជប៉ុន ៤-០។ សម្រាប់ការប្រកួត២ លើកនេះគឺធ្វើកីឡដ្ឋាន J-Village ក្នុងប្រទេសជប៉ុន ប៉ុន្តែមិនបើកឲ្យអ្នកគាំទ្រចូលទស្សនាទេដោយសារវិបត្តិកូវីដ-១៩។