កីឡា

មុនជួបគ្នាល្ងាចនេះ លោកគ្រូ Teo ថា ក្រុមទ័ពល្អជាងបឹងកេតពេលប៉ះព្រៃវែង

បានផុស

១ ខែ មុន

នៅ

ថ្ងៃសៅរ៍ ២៣ កញ្ញា ២០២៣

ដោយ

លោក Clement Teo គ្រូបង្វឹកក្លិបបឹងកេតបានចាត់ទុកក្រុមក្រសួងការពារជាតិល្អជាងបឹងកេត បើប្រៀបធៀបនឹងទម្រង់លេងរបស់ក្រុមទាំងពីរពេលប្រកួតជាមួយក្រុមខេត្តព្រៃវែងកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបសប្ដាហ៍ទី៦ វេលាម៉ោង៦ល្ងាច ថ្ងៃទី២៣ ខែកញ្ញា ឆ្នាំ២០២៣ ក្នុងពានរង្វាន់ខេមបូឌានព្រីមៀរលីគ ក្លិបបឹងកេតបើកទ្វារពហុកីឡដ្ឋានជាតិអូឡាំពិកទទួលក្រុមក្រសួងការពារជាតិដែលនឹងក្លាយជាការប្រកួតគួរឲ្យចាប់អារម្មណ៍មួយនាថ្ងៃសៅរ៍នេះ។

ក្នុងសន្និសទីសារព័ត៌មានមុនការប្រកួត លោក Clement Teo និយាយថា៖«ពេលនេះយើងកំពុងស្ថិតនៅក្នុងបច្ចុប្បន្ន ដូច្នេះយើងមិនត្រូវគិត និងលើកយករឿងប្រវត្តិជួបគ្នាពីអតីតកាលទេ។ ដូចជា Manchester United បានយកឈ្នះក្លិប Brighton ជាច្រើនក្នុងប្រវត្តិជួបគ្នា តែថ្មីៗនេះ Brighton បានឈ្នះ Man United ៣-០ វិញ។ ដូច្នេះប្រវត្តិជួបគ្នាមិនសំខាន់ទេក្នុងបាល់ទាត់ ពីព្រោះវាគ្រាន់តែជារឿងអតីកាល»។

ជួបគ្នា៦លើកចុងក្រោយ បឹងកេតបានឈ្នះ៥លើក ខណៈក្រសួងការពារជាតិបានឈ្នះតែ១លើកប៉ុណ្ណោះ។ លោក Clement Teo បានបន្ថែមថា ៖«គ្រប់ការប្រកួតទាំងអស់សុទ្ធតែលំបាក ពីព្រោះកម្រិតលេងក្នុងលីគកំពូលកម្ពុជាមានការផ្លាស់ប្តូរ និងអភិវឌ្ឍទៅមុខជាលំដាប់។ ខ្ញុំបានមើលការប្រកួតរបស់ក្រសួងការពារជាតិជាមួយក្រុមខេត្តព្រៃវែង។ ពួកគេគ្រប់គ្រងបាល់បានតិចមែន តែបង្កើតឱកាសរកគ្រាប់បាល់បានច្រើន។ ពេលយើង (បឹងកេត) លេងជាមួយព្រៃវែងគឺយើងធ្វើអត់បានល្អទេ ដូច្នេះខ្ញុំគិត ក្រសួងការពារជាតិល្អជាងយើង»។