លោក Félix ជំរុញអ្នកគាំទ្រនិយាយពាក្យវិជ្ជមានទៅកាន់កីឡាករ

គ្រូបង្វឹកក្រុមជម្រើសជាតិកម្ពុជា លោក Félix Dalmás លើកទឹកចិត្តដល់គាំទ្រឲ្យនិយាយពាក្យល្អៗបែបវិជ្ជមានទៅកាន់កីឡាករជម្រើសជាតិ​ប្រសើរជាងប្រើពាក្យមិនសមរម្យឬបំបាក់ទឹកចិត្តកីឡាករ។

លោក Félix Dalmás បាននិយាយថា ៖«ពេល​អ្នកសរសេរអ្វីល្អៗបែបវិជ្ជមាន ឬបង្ហាញសកម្មភាពល្អៗ​គឺ​ជា​ការ​ផ្ញើ​សារលើកទឹកចិត្ត​ដល់​កីឡាករគឺជារឿង​ល្អមួយ។ នេះ​គឺ​ជាការផ្តល់កម្លាំងចិត្តដ៏​សំខាន់ ធ្វើឲ្យអារម្មណ៍កីឡាករមានភាពល្អប្រសើរ ទោះបីវាជារឿងតូចតាចក្តី ប៉ុន្តែវា​មានតម្លៃ​សម្រាប់កីឡាករ។ ចូរលើកទឹកចិត្តក្រុមហើយជ្រើសរើសការជឿជាក់​លើ​ពួក​គាត់ ដូច្នេះទើបក្រុមអាចឈ្នះបាន»។

ក្រុមជម្រើសជាតិកម្ពុជានឹងត្រូវប្រកួតជាមួយក្រុមជម្រើសជាតិប៉ាគីស្ថាន ជើង​ទី​២ នា​ថ្ងៃទី១៧ ខែតុលា ឆ្នាំ២០២៣ នៅកីឡដ្ឋាន Jinnah ក្នុងទីក្រុង អីស្លាម៉ាបាដ វេលាម៉ោង៤ រសៀល វគ្គ​ជម្រុះ​ជើង​ឯក​ពិភព​លោក ​ឆ្នាំ​២០២៦។ កម្ពុជានឹង​ធ្វើការធ្ងន់ បន្ទាប់ពីមិនអាចរកជ័យជម្នះ​បាន​ក្នុង​ជើងទី១ នៅពហុកីឡដ្ឋានជាតិអូឡាំពិក។

លោក Félix Dalmás បានបន្ថែមថា ៖«មុនការប្រកួតយើងបានដឹងច្បាស់​ពីសមត្ថភាពរបស់កីឡាករប៉ាគីស្ថានដែលកីឡាករមួយចំនួនគឺសុទ្ធតែលេងនៅតំបន់អឺរ៉ុប។ ពួកគេមានកាយសប្បទាល្អ​។​ ខ្ញុំគិតថា ក្រុមទាំងមូលធ្វើបានល្អហើយ។ សម្រាប់ការប្រកួតវគ្គជម្រុះនេះមានរយៈពេល១៨០នាទី ដូច្នេះយើងនៅសល់៩០នាទីទៀត»។

ការប្រកួតរវាងក្រុមកម្ពុជា និងប៉ាគីស្ថាន នៅថ្ងៃស្អែកគឺត្រូវមានមួយក្រុមឡើងទៅកាន់ពូល G ដែលមានក្រុមខ្លាំង​ៗ​​គឺ​អារ៉ាប៊ីសាអ៊ូឌីត ហ្ស៊កដានី និង តាជីគីស្ថាន ដែលកំពុងរងចាំស្រាប់ នៅ​វគ្គ​ជម្រុះ​ជុំ​ទី២៕

អត្ថបទ៖ ផា រតនា