កីឡា

Erik Ten Hag មិនបន្ទោស Onana បន្ទាប់ពីបង្កកំហុសរបូតគ្រាប់បាល់

បានផុស

១០ ខែ មុន

នៅ

ថ្ងៃព្រហស្បតិ៍ ៣០ វិច្ឆិកា ២០២៣

ដោយ

ការប្រកួតសន្សំពិន្ទុក្នុងពូលពាន UEFA Champion League កាលពីយប់មិញក្រុមបិសាចក្រហម Manchester United បានត្រឹមស្មើគ្នា ៣-៣ ជាមួយក្រុមម្ចាស់ផ្ទះ Galatasaray ដែលធ្វើឲ្យក្រុមទាំងពីរចែកគ្នាម្នាក់១ពិន្ទុម្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Erik ten Hag អ្នកចាត់ការរបស់ក្រុម Manchester United មានការសោកស្ដាយយ៉ាងខ្លាំងចំពោះគ្រាប់បាល់ចំនួន២គ្រាប់ដែល អ្នកចាំទីAndré Onana ធ្វើមិនបានល្អទល់ក្រុម Galatasaray ប៉ុន្តែលោកបានបដិសេធទម្លាក់កំហុសលើអ្នកចាំទី Onana ទោះមានកំហុស២លើក។

លោក Erik ten Hag បានលើកឡើងថា ៖«នេះមិនមែនជារឿងត្រូវដាក់បន្ទុកលើបុគ្គលណាម្នាក់ទេ។ ចំពោះកំហុសបុគ្គលម្នាក់ៗនៅក្នុងកីឡាបាល់ទាត់តែងកើតមានដូចគ្នា។ អ្នកទទួលខុសត្រូវ តែវាគឺជារឿងដែលក្រុមទាំងមូលត្រូវទទួលខុសត្រូវផងដែរ។ យើងបានស៊ុតបាល់បញ្ចូលទី២គ្រាប់យ៉ាងលឿន។ បើនិយាយពីចំណុចល្អមួយនៅពេលយើងនាំមុខ ២-០ ហើយយើងព្បាយាមគ្រប់គ្រងការប្រកួតទាំងមូលបានយ៉ាងល្អ។ វាមិនមែនជារឿងងាយស្រួលនោះទេ នៅពេលយើងផ្តល់បាល់ហ្វ្រីឃីក ហើយយើងត្រូវការពារការស៊ុតបាល់ពិន័យហ្វ្រីឃីកពីកីឡាករដែលមានជំនាញហ្វ្រីឃីក។ គុណភាពរបស់កីឡាករ Hakim Ziyech ខ្ញុំដឹងច្បាស់គឺអស្ចារ្យណាស់»។

ក្រុម Manchester United បានរបូតគ្រាប់បាល់ចំនួន១៤គ្រាប់ ក្នុងប្រកួត៥លើកក្នុងពានរង្វាន់ UEFA Champion League ហើយបច្ចុប្បន្នពួកគេឈរលេខ៤ក្នុងពូល A ដោយមានឱកាសតិចតួចប៉ុណ្ណោះក្នុងការឡើងទៅវគ្គ១៦ក្រុមចុងក្រោយ។

៣គ្រាប់របស់ក្រុម Man Utd រកបានដោយកីឡាករ៣រូបផ្សេងគ្នាគឺកីឡាករ Alejandro Garnacho, Bruno Fernandes និង Scott McTominay ប៉ុន្តែលទ្ធផលបានត្រឹមស្មើគ្នាក្រោយពីអ្នកទីកីឡាករ Onana សង្គ្រោះបាល់ស៊ុតពិន័យហ្វ្រីឃីក មិនបានល្អចំនួន២គ្រាប់របស់កីឡាករ Hakim Ziyech។

ខ្សែបម្រើ Bruno Fernandes បាននិយាយថា៖«ពួកយើងបានរបូតគ្រាប់យ៉ាងអាក្រក់បំផុត។ ពួកយើងមានឱកាសច្រើន ហើយក្នុងនោះក៏មានឱកាសជាច្រើនក្នុងការរកគ្រាប់បាល់បន្ថែមទៀត។ ពួកយើងគ្រប់គ្រងការប្រកួតទាំងមូលបានល្អយ៉ាងល្អ។ វាមិនមែនជាការប្រកួតដំបូងដែលយើងជួបរឿងបែបនេះទេ។ សូម្បីតែការប្រកួតទីក្រុង Copenhagen យើងបាននាំមុខ ៣-២ យើងគួរតែមានភាពឆ្លាតវៃគ្រប់គ្រាន់ និងគ្រប់គ្រងការប្រកួតឱ្យកាន់តែប្រសើរជាងនេះ»៕

ប្រែសម្រួល៖ ផា រតនា
ប្រភព៖ theguardian