កីឡា

ខ្លាចភាពក្រីក្រត្រឡប់មកវិញ ព្រំ សំណាង កំពុងប្រឹងឲ្យកូនរៀនជំនាញ

បានផុស

២ years មុន

នៅ

ថ្ងៃសុក្រ ៨ ធ្នូ ២០២៣

ដោយ

កីឡាករប្រដាល់គុនខ្មែរ ព្រំ សំណាង បានកំពុងជំរុញកូនរបស់ខ្លួនឲ្យរៀនជំនាញកាត់សក់ដើម្បីជួយដល់រូបគេក្នុងការគ្រប់គ្រងហាងកាត់សក់នៅពេលឈប់ពីប្រដាល់ ដោយសារភ័យខ្លាចភាពក្រីក្រកាលពីមុនវិលត្រឡប់មកវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រំ សំណាង បានផ្តល់បទសម្ភាសដល់សារព័ត៌មាន«កម្ពុជាថ្មី»ថា សព្វថ្ងៃនេះ រូបគេមានអារម្មណ៍ចង់លាឈប់ពីប្រដាល់ដែរ ប៉ុន្តែដោយសារធនធានកីឡាករទម្ងន់ធ្ងន់មធ្យមមិនសូវមានច្រើន ហើយកម្លាំងស៊ុហ្វរបស់ខ្លួនមិនទាន់ស្រុតខ្លាំងដែលអាចនៅប្រកួតបាន ដូច្នេះនៅបន្តអាជីពប្រដាល់នេះបន្តិចទៀត។

កីឡាករមកពីខេត្តកំពង់ស្ពឺបានលើកឡើងថា ៖«គីឡូធ្ងន់ដូចខ្ញុំមានតិចដូចជា ធារ៉ា, ឈឿង ល្វៃ ហើយខ្ញុំក៏ចង់យកពេលវេលាដើម្បីក្រុមគ្រួសារដែរ។ សុំប្រពន្ធបន្តតិចទៀតសិន។ ប្រសិនបើកម្លាំងបាក់ជាងនេះ ក៏អត់ហ៊ានប្រកួតដែរ»។

ថ្វីបើអាជីពប្រដាល់កំពុងជោគជ័យខ្លាំងក្នុងឆ្នាំ២០២៣ ព្រំ សំណាង ដឹងថា អាជីពមួយនេះមិនអាចស្ថិតយូរអង្វែងបានទេ ដូច្នេះទើបបានជារូបគេបានត្រៀមការងាររួចជាស្រេចសម្រាប់ពេលឈប់ពីប្រដាល់។

ព្រំ សំណាង បាននិយាយថា ៖«ឥឡូវខ្ញុំកំពុងពង្រឹងឲ្យកូនរៀនជំនាញកាត់សក់បណ្តើរៗ។ នៅពេលខ្ញុំឈប់ពីប្រដាល់ នឹងមើលហាងកាត់សក់ឲ្យបានដិតដល់។ ខ្ញុំខ្លាចភាពក្រីក្រពីមុនត្រឡប់មកវិញ។ ឥឡូវនេះ ខ្ញុំបានទិញរបស់ទុកដូចជាដី គោជាដើម។ ខ្លាចក្រីក្រត្រឡប់មកវិញ ពីព្រោះពីមុនវេទនាណាស់»។

«ពីមុនរកតែលុយ៥០០រៀលទិញការ៉ែមឲ្យកូនក៏គ្មាន។ ឥឡូវនេះឃើញគេអត់ ខ្ញុំអាណិតណាស់ ខ្ញុំក៏ឆ្លៀតដាក់ទាន១ម៉ឺន ២ម៉ឺន ព្រោះនឹកឃើញពេលខ្ញុំអត់។ សូម្បីតែខ្ចីលុយគេ៥០០រៀលពេលមានឃើញគេលក់ការ៉ែម ចង់ទិញឲ្យកូន យើងមានតែចាប់កូនចូលផ្ទះវិញ»។ កីឡាករបានរម្លឹក។

ឆ្នាំ២០២៣ ជីវិតរបស់ ព្រំ សំណាង បានផ្លាស់ប្តូរស្ទើរទាំងស្រុងដោយមានរថយន្តទំនើប មានផ្ទះក្នុងបុរី ដី ខ្សែកមាស ចិញ្ចៀនធំៗ និងមានប្រាក់ចាយគ្រប់គ្រាន់ បន្ទាប់ពីបានចេញទៅប្រកួតនៅថៃទទួលបានប្រាក់ឧបត្ថម្ភយ៉ាងច្រើនជាបន្តបន្ទាប់ពីសប្បុរសជន និងអ្នកគាំទ្រ។ ជាពិសេសរូបគេធ្វើការងារជាទូតសុច្ឆន្ទៈដោយកាលពីខែមុនទទួលបានប្រាក់១០០លានរៀលពីប៊ូសស្ត្រង។

បច្ចុប្បន្នកីឡាករវ័យចំណាស់រូបនេះមានខ្សែក្រវាត់ជាច្រើនដូចជាខ្សែក្រវាត់គុនខ្មែរអន្តរជាតិ KIF ខ្សែក្រវាត់អន្តរជាតិ Thai Fight ខ្សែក្រវាត់គ្រុឌគុនខ្មែរអន្តរជាតិ ខ្សែក្រវាត់គុនខ្មែរពិភពលោក តេជោសន្តិភាព មេដាយមាសស៊ីហ្គេម និងខ្សែក្រវាត់ក៏ដូចជាពានរង្វាន់ជាច្រើនទៀត៕