កីឡា

ក្រុមបាល់ទះបារាំងត្រៀមការពារមេដាយមាសអូឡាំពិកលើទឹកដីខ្លួន

បានផុស

៣ ខែ មុន

នៅ

ថ្ងៃអង្គារ ១៩ មីនា ២០២៤

ដោយ

ការប្រកួតបាល់ទះក្នុងព្រឹត្តិការណ៍កីឡាអូឡាំពិក រដូវក្តៅ ឆ្នាំ២០២៤ នៅទីក្រុងប៉ារីស នឹងចាប់ផ្តើមពីថ្ងៃទី២៧ ខែកក្កដា ដល់ថ្ងៃទី១១ ខែសីហា ខណៈម្ចាស់ផ្ទះបារាំងជាម្ចាស់ការពារមេដាយមាសដែលខ្លួនបានឈ្នះកាលពី៤ឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទះជម្រើសជាតិបារាំងបានឈ្នះមេដាយមាសអូឡាំពិករដូវក្តៅកាលពីឆ្នាំ២០២០នៅប្រទេសជប៉ុន។ ការប្រកួតអូឡាំពិកឆ្នាំនោះ បារាំងមើលទៅទំនងដូចជាមិនមែនក្រុមប្រជែងមេដាយមាសឡើយ ដោយសារពួកគេឈរនៅលេខ៤ក្នុងពូល B បន្ទាប់ពីឆ្លងកាត់៥ប្រកួត គឺឈ្នះ២ និងចាញ់៣។ ទោះបីជាយ៉ាងការភ្ញាក់ផ្អើលបានកើតមានឡើង។ នៅវគ្គ៨ក្រុមចុងក្រោយ បារាំងបានទម្លាក់ក្រុមខ្លាំងប៉ូឡូញដោយលទ្ធផល ៣-២។ នៅវគ្គពាក់កណ្តាលផ្តាច់ព្រ័ត្រ ពួកគេបានយកឈ្នះអាហ្សង់ទីន ៣-០ ដើម្បីឡើងទៅកាន់វគ្គផ្តាច់ព្រ័ត្រ។

នៅវគ្គផ្ដាច់ព្រ័ត្រ បារាំងបានយកឈ្នះក្រុមរុស្ស៊ី ដែលជាអធិរាជបាល់ទះក្នុងលោក ដោយលទ្ធផល ៣-២។ នេះជាមេដាយមាសលើកដំបូងក្នុងប្រវត្តិសាស្ត្រ ដែលក្រុមបាល់ទះជម្រើសជាតិបារាំងបានឈ្នះក្នុងកីឡាអូឡាំពិក។

ក្នុងព្រឹត្តិការណ៍កីឡាអូឡាំពិកគិតចាប់តាំងពីឆ្នាំ១៩៦៤មក ក្រុមបាល់ទះជម្រើសជាតិបារាំងមិនធ្លាប់ឈ្នះមេដាយទេ សូម្បីតែប្រាក់ ឬសំរិទ្ធ ប៉ុន្តែនៅឆ្នាំ២០២០ ពួកគេបានបំបែកកំណត់ត្រាឈ្នះមេដាយជាលើកដំបូងក្នុងប្រវត្តិសាស្ត្ររហូតដល់មេដាយមាសថែមទៀត។

ក្នុងព្រឹត្តិការណ៍អូឡាំពិកឆ្នាំ២០២៤ បារាំងត្រូវធ្វើការធ្ងន់ ក្នុងនាមជាក្រុមការពារមេដាយមាសឆ្នាំចាស់។ ទោះបីឆ្នាំនេះមិនមានរុស្ស៊ី ប៉ុន្តែក្រុមខ្លាំងៗលំដាប់ពិភពលោកជាច្រើនទៀតជាឧបសគ្គធំសម្រាប់ម្ចាស់ផ្ទះមានដូចជា ប៉ូឡូញ ប្រេស៊ីល ជប៉ុន និងសហរដ្ឋអាមេរិកជាដើម។

អូឡាំពិកឆ្នាំ២០២៤នេះមានការកែរូបមន្តប្រកួតថ្មី បើប្រៀបធៀបនឹងកីឡាអូឡាំពិក៩លើកចុងក្រោយ។ ការប្រកួតត្រូវចែងចែកជា៣ពូល ក្នុង១ពូលមាន៤ក្រុម ហើយក្រុមលេខ១ និងលេខ២ ក្នុងពូលនីមួយៗឡើងទៅវគ្គ៨ក្រុមចុងក្រោយ ហើយ២ក្រុមទៀតជាក្រុមលេខ៣ល្អបំផុតក្នុងពូលក៏បានឡើងវគ្គបន្តដែរ។ ក្នុងនាមជាម្ចាស់ផ្ទះ បារាំង ស្ថិតនៅក្នុងពូល A ដោយស្វ័យប្រវត្តិ៕

អត្ថបទ៖ ផា រតនា