អូឡាំពិក២០២៤អាចចំណាយថវិកាសាធារណៈលើសផែនការ២ពាន់លានអឺរ៉ូ

រហូតមកដល់ពេលថ្មីៗនេះ តួលេខត្រូវ​បានដកស្រង់អំពី​ការចំណាយសាធារណៈនៃការប្រកួតកីឡាអូឡាំពិក ទីក្រុងប៉ារីស ប្រទេស​បារាំង ឆ្នាំ២០២៤ មានចំនួន ៣ពាន់លានអឺរ៉ូ​ដែល​លើស​ផែន​ការ​កំណត់​​២​ពាន់​លាន​អឺរ៉ូ​។

លោក Pierre Moscovici ប្រធានទីមួយនៃតុលាការសវនកម្ម​បានទទួលស្គាល់ថា ការ​ចំណាយ​នេះនឹងកើនឡើង។ ការចំណាយអាចកើនឡើងដល់ ៤ ឬ ៥ ពាន់លានអឺរ៉ូ។ លោកបាននិយាយថា ៖«យើងនៅតែមិនទាន់ដឹងពីតម្លៃនៃការប្រកួតកីឡាអូឡាំពិក។ តុលាការសវនកម្ម​នឹងធ្វើសវនកម្មពួកគេ បន្ទាប់ពីព្រឹត្តិការណ៍បញ្ចប់។ ហ្គេមទាំងនេះគួរចំណាយប្រាក់ចន្លោះពី ៣ ទៅ ៤ ពាន់លាន​អឺរ៉ូ​​ដែលយើងនឹងឃើញ ប៉ុន្តែវានឹងមិនមានផលប៉ះពាល់ខ្លាំងដល់បំណុលនោះទេ»។

តួលេខនៃប្រាក់សាធារណៈចំនួន ២ពាន់លានអឺរ៉ូសម្រាប់កីឡាអូឡាំពិកត្រូវបានលើកឡើងពីមុនដោយលោក Pierre Moscovici។ នៅឆ្នាំ២០២៣ ឯកសារថវិកាបង្ហាញពីការវិនិយោគសាធារណៈចំនួន ២.៤៤ពាន់លានអឺរ៉ូ (រួមទាំង ១.៣ពាន់លានអឺរ៉ូសម្រាប់រដ្ឋ ឬ ២៦០លានអឺរ៉ូ​សម្រាប់ទីក្រុងប៉ារីស)។

ទោះយ៉ាងណា ការ​ចំណាយ​សាធារណៈសរុបមិនអាចគណនាបានទេ។ មិនមែនការចំណាយទាំងអស់ត្រូវបានគេស្គាល់ទេ។ ជាឧទាហរណ៍ ប្រាក់ឈ្នួលបន្ថែម ១,៩០០អឺរ៉ូដែលបង់ទៅឱ្យមន្ត្រីប៉ូលិសត្រូវបានបន្ថែមនាពេល​កន្លង​ទៅ​។ នេះអាចបង្កើន​ការ​ចំណាយ​សាធារណៈចំនួន ៥០០លានអឺរ៉ូ។

បច្ចុប្បន្ននេះ ការ​ចំណាយ​បណ្ដោះអាសន្នសម្រាប់អូឡាំពិក ទីក្រុងប៉ារីសឆ្នាំ២០២៤ ដែលជាការលាយបញ្ចូលគ្នានៃប្រាក់សាធារណៈ និងឯកជនមានប្រហែល ៩ពាន់លានអឺរ៉ូ។ គណៈកម្មាធិការរៀបចំអូឡាំពិក (COJO) មានថវិកាចំនួន ៤.៤ពាន់លានអឺរ៉ូ ដែល ៩៦% ជាប្រាក់ឯកជន ហើយថវិការបស់ SOLIDEO ដែលទទួលខុសត្រូវលើការកសាងគ្រឿងបរិក្ខាអចិន្ត្រៃយ៍ ក៏ ៤.៤ពាន់លានអឺរ៉ូផងដែរ ក្នុងនោះ ១.៧ពាន់លាន​អឺរ៉ូ​គឺជា​ប្រាក់សាធារណៈ៕

ប្រែសម្រួល៖ មន្នីរ័ត្ន
ប្រភព៖ Inside The Games