កីឡា

បែលហ្ស៊ិក ហុល្លង់ អាល្លឺម៉ង់ រួមគ្នាដេញថ្លៃ World Cup នារីឆ្នាំ ២០២៧

បានផុស

៣ ខែ មុន

នៅ

ថ្ងៃចន្ទ ១ មេសា ២០២៤

ដោយ

ប្រទេសបែលហ្ស៊ិក ហុល្លង់ និងអាល្លឺម៉ង់ បានចាប់ផ្តើមការដេញថ្លៃរួមគ្នាជាផ្លូវការដើម្បីធ្វើសហម្ចាស់ផ្ទះការប្រកួតបាល់ទាត់នារីពិភពលោក ឆ្នាំ២០២៧។ កិច្ចខិតខំប្រឹងប្រែងរួមគ្នានេះត្រូវបានគេស្គាល់ជា BNG2027 ជាមួយគោលបំណងលើកកម្ពស់កីឡាបាល់ទាត់នារី និងផ្តល់នូវបទពិសោធថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលបំណងស្នូលនៃការដេញថ្លៃគឺដើម្បីបង្កើតមូលដ្ឋានថ្មី ដោយធានាបាននូវការផ្តល់ការប្រកួតប្រជែងដ៏អស្ចារ្យមិនធ្លាប់មានក្នុងប្រវត្តិសាស្រ្តបាល់ទាត់នារី។ ការរៀបចំហេដ្ឋារចនាសម្ព័ន្ធឡូជីស្ទិក ធានានូវបទពិសោធចំពោះអ្នកគាំទ្រ ពិសេសការស្នាក់នៅគុណភាពខ្ពស់ និងតំណភ្ជាប់ការដឹកជញ្ជូន។ ការប្រកួតនឹងត្រូវបានប្រមូលផ្តុំនៅក្នុងតំបន់តូចមួយ ដែលលាតសន្ធឹងតាមព្រំដែនប្រទេសបែលហ្សិក ហុល្លង់ និងអាល្លឺម៉ង់។ វិធីសាស្រ្តនេះកាត់បន្ថយការធ្វើដំណើរ ស្របតាមគោលដៅនិរន្តរភាពដ៏មហិច្ឆតា។

សេចក្តីថ្លែងការណ៍រួមពីប្រធានសហព័ន្ធកីឡាបាល់ទាត់បែលហ្ស៊ិក លោក Pascale Van Damme ប្រធានសមាគមបាល់ទាត់ហុល្លង់ លោក Just Spee និងប្រធានសមាគមបាល់ទាត់អាល្លឺម៉ង់ លោក Bernd Neuendorf បានរៀបរាប់ថា៖«យើងរីករាយ ក្នុងការប្រកាសពីការចាប់ផ្តើមដេញថ្លៃ BNG2027 ជាផ្លូវការ។ បន្ទាប់ពីត្រៀមខ្លួនជាច្រើនខែ យើងទន្ទឹងរង់ចាំក្នុងការបង្ហាញលក្ខណៈសម្បត្តិរបស់យើងសម្រាប់ FIFA 2027 Women’s World Cup»។

«យើងជឿជាក់ថា ការដេញថ្លៃ BNG2027 ដែលទទួលបានជោគជ័យអាចដើរតួជាកាតាលីករដ៏មានឥទ្ធិពលមួយ ដើម្បីធានាបានពីការប្រកួតរបស់ស្ត្រីដ៏មានសក្តានុពល និងទទួលការចាប់អារម្មណ៍ពីអ្នកគាំទ្រពីមហាជនទូទាំងពិភពលោក»៕

ប្រែសម្រួល៖ ផា រតនា
ប្រភព៖ Onefootball