ប្រេស៊ីលក្លាយជាម្ចាស់ផ្ទះជើងឯក​បាល់ទាត់នារីពិភពលោកឆ្នាំ ២០២៧

ប្រទេសប្រេស៊ីលទទួលបានគាំទ្រ១១៩សំឡេង​ ក្នុង​ការដេញថ្លៃ​ធ្វើ​ម្ចាស់​ផ្ទះ​រៀបចំ​ការ​ប្រកួត​បាល់ទាត់​នារី​ជើង​ឯក​ពិភព​លោក ឆ្នាំ​២០២៧ ខណៈ​​ប្រទេសបែលហ្សិក ហូឡង់ និងអាល្លឺម៉ង់ ទទួលបាន​ការ​គាំទ្រត្រឹមតែ ៧៨សំឡេង។

ប្រេសុីលបានក្លាយជាប្រទេសដំបូងគេត្រូវបានប្រគល់សិទ្ធិដោយការបោះឆ្នោតបើកចំហ ដោយសមាគមសមាជិកបានបោះឆ្នោតគាំទ្រខ្លួន។ នេះជាព្រឹត្តិការណ៍លើក​ទី​១ក្នុងប្រវតិ្តសាស្រ្ត​​បាល់ទាត់​ពិភព​លោក​នារី​ធ្វើ​ជា​ម្ចាស់​ផ្ទះ​ដោយ​ប្រទេស​អាមេរិក​ខាង​ត្បូង។

លោក Gianni Infantino ប្រធានសហព័ន្ធ​កីឡា​បាល់ទាត់​អន្តរជាតិ (FIFA) បាននិយាយថា ៖«សូមអបអរសាទរដល់ប្រេស៊ីល។ យើងនឹងមានការប្រកួត World Cup ល្អបំផុតនៅក្នុងប្រទេសប្រេស៊ីល។ អរគុណច្រើនចំពោះគម្រោងការដេញថ្លៃរបស់ BNG ដែលវាពិតជាអស្ចារ្យ»។ សម្រាប់គម្រោង BNG ​គឺ​រៀបចំឡើងដោយប្រទេសបែលហ្សិក, ហូឡង់ និងអាល្លឺម៉ង់ ក្នុងការដេញថ្លៃធ្វើជាសហម្ចាស់ផ្ទះ។

ប្រេស៊ីលទទួលបានពិន្ទុខ្ពស់ក្នុងការដេញថ្លៃដោយសារពួកគេមានបច្ចេកទេសល្អគ្របដណ្តប់លើតំបន់មួយចំនួនដូចជា កីឡដ្ឋាន កន្លែងស្នាក់នៅ តំបន់អ្នកគាំទ្រ និងការដឹកជញ្ជូននៅក្នុងរបាយការណ៍វាយតម្លៃការដេញថ្លៃរបស់ FIFA។

ប្រធានសហព័ន្ធកីឡាបាល់ទាត់ប្រេស៊ីល លោក Ednaldo Rodrigues បាននិយាយថា ៖«យើងនឹងប្រារព្ធការអបអរជោគជ័យជម្នះរបស់ពួកយើងក្នុងព្រឹត្តិការណ៍បាល់ទាត់នារីពិភពនៅទ្វីបអាមេរិកខាងត្បូង»។

ការប្រកួតបាល់ទាត់នារីពិភពលោកលើកទី១០ នឹងធ្វើតាមទម្រង់ការប្រកួតដដែលដោយមានក្រុមចំនួន៣២ចូលរួម ដូចគ្នាក្នុងព្រឹត្តិការណ៍បាល់ទាត់នារីពិភពលោកឆ្នាំ២០២៣ នៅប្រទេសអូស្ត្រាលី និងនូវែលសេឡង់ ដែលអេស្ប៉ាញបានគ្រងតំណែងជើងឯក៕

ប្រែសម្រួល៖ ផា រតនា
ប្រភព៖​ BBC