Connect with us

កីឡា

លោក ខៀវ សាម៉េត ទម្លាយ​រឿងហួសចិត្ត អតីតគ្រូជម្រើសជាតិម្នាក់

បានផុស

នៅ

លោក ខៀវ សាម៉េត អនុប្រធាន​សហព័ន្ធ​កីឡា​បាល់ទាត់​កម្ពុជា និង​ជា​ប្រធាន​សហព័ន្ធ​កីឡា​បាល់ទាត់អាស៊ាន​​បាន​ហួស​ចិត្ត​នឹង​អតីត​គ្រូ​បង្វឹក​បាល់ទាត់​ជម្រើស​ជាតិ​កម្ពុជា​១​រូប​​ដែល​មិន​ព្រម​បោះ​ឆ្នោត​​ក្នុង​កម្មវិធី​របស់​សហព័ន្ធ​កីឡា​បាល់ទាត់​អន្តរជាតិ (FIFA)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុង​​ពិធី​ប្រគល់​-ទទួល​ជា​ផ្លូវ​ការ​អំពី«កៅអី​ដែល​​ត្រូវ​បាន​បំពាក់​នៅ​ពហុកីឡដ្ឋាន​ជាតិ​អូឡាំពិក​»ដល់​ក្រសួង​អប់រំ យុវជន និង​កីឡា នៅ​ព្រឹក​ថ្ងៃ​ទី​៩ ខែ​មេសា ឆ្នាំ​២០២៤ នៅ​មជ្ឈមណ្ឌល​ហ្វឹក​ហាត់ជាតិ លោក ខៀវ សាម៉េត ​បានលើក​ឡើង​ថា ក្រុម​បាល់ទាត់​ជម្រើស​ជាតិ​កម្ពុជា​មិន​ទាន់​បាន​ឈ្នះ​ពាន​រង្វាន់​អ្វី​មួយ​ទេរហូត​ដល់​ពេលនេះ​ ប៉ុន្តែ​ផ្នែក​កិច្ចការរដ្ឋបាល​កុំឲ្យ​ចាញ់​គេ។ ត្រឹម​កិច្ច​ការរដ្ឋបាល​ត្រូវ​តែ​ធ្វើ​ឲ្យ​ទាន់​ពេល​វេលា​ទាំង​ក្នុង​តំបន់ និង​អន្តរជាតិ។

លោក​បាន​រម្លឹក​រឿង​ហួស​ចិត្ត​មួយ​ថា កាល​ពី​ពេល​​​កន្លង​ទៅ​ សហព័ន្ធ​កីឡា​បាល់ទាត់​អន្តរជាតិ បាន​រៀបចំ​បោះ​ឆ្នោត​ជ្រើស​រើស​គ្រូ​បង្វឹក និង​កីឡាករ​ឆ្នើម​ប្រចាំ​ឆ្នាំ។ FIFA តម្រូវ​ឲ្យ​សមាជិក​ទាំង​​​អស់បោះ​ឆ្នោត​​ ក្នុង​នោះ​​​ប្រធាន​ក្រុមបាល់ទាត់​ជម្រើស​ជាតិ​ និង​គ្រូ​បង្វឹក​ជម្រើស​ជាតិនីមួយ​ៗ​មានសិទ្ធិ​បោះ​ឆ្នោត។

លោក ខៀវ សាម៉េត មាន​ប្រសាសន៍​ថា ៖«FIFA ទាក់​ទង​មកយើង ប្រាប់​ឲ្យ​គ្រូ​ជម្រើស​ជាតិ​បោះ​ឆ្នោត គាត់​អត់​ព្រម​បោះ។ គេ​បោះ​អស់​ហើយ សល់​តែ​យើង​មួយ។ ការងារ​អីចឹង​ៗ យើង​ធ្វើ​មិន​កើត​ដែរ មាន​ស្អី​ទៀត។ គេ​ខល​មក​ថា ប្រធាន FIFA ចង់​ឲ្យ​​ទាំង​អស់គ្នា​បោះ អីចឹង​នៅ​សល់​តែ​កម្ពុជា​មួយ​ទេ​នៅ​ក្នុង​តំបន់​អាស៊ាន»។

«ខ្ញុំ​ណាត់​គាត់​ទៅ​ពិសាគុយទាវ​នៅភោជនីយដ្ឋាន​មួយ​នៅ​បឹងកក់ គាត់​អត់​ព្រម​ទៅ។ ស្រាប់​តែ​គាត់​ថា មក​ចាំ​នៅ​សហព័ន្ធ ខ្ញុំ​ក៏​ឲ្យ​បុគ្គលិក​​ជួយ​គាត់ ក្រែង​គាត់​មិន​ចេះ​ពី​របៀបបោះ​តាម​អនឡាញ។ ពេល​បុគ្គលិក​នោះ​ទៅ​​ដល់​សហព័ន្ធ ស្រាប់​តែ​គាត់​ទៅ​ផឹក​ស៊ី​ឯណា​បាត់។ ខ្ញុំ​ថា អត់​ទេ ទៅ​អញ្ជើញ​គាត់​មក។ បើ​គាត់​មិន​មក​ទេ ខ្ញុំ​ឲ្យ​គេ​ទៅ​អញ្ជើញ​គាត់​ទៀត ពី​ព្រោះ FIFA ត្រូវ​បូក​សរុប​លទ្ធផល​ម៉ោង​២​ថាតើ​ នរណា​បោះ​ នរណា​មិន​បោះ។ គាត់​ក៏​ព្រម​មក ហើយ​ប្រើ​ពេល​តែ​២​នាទី បោះ​តាម​អនឡាញ​ហ្នឹង។ ខ្ញុំ​គិត​ថា ដល់​អីចឹង​ពេក​មិន​កើត​ទេ អីចឹង​ឲ្យ​គាត់​ឈប់​តែ​ម្តង​ទៅ»។ អនុប្រធាន​សហព័ន្ធ​បាល់ទាត់​កម្ពុជា​បាន​រៀប​រាប់។

ប្រធាន​សហព័ន្ធ​កីឡា​បាល់ទាត់​អាស៊ាន​រូប​នេះ​បន្ថែម​​ថា ៖«បើ​លេង​ឈ្នះ​គេ​ទៅ ខ្ញុំ​មិន​ថាទេ។ បើ​លេង​មិន​ឈ្នះ​គេ ខ្ញុំ​ទទួល​យក​បាន​ ពី​ព្រោះ​កម្រិត​យើង​នៅ​ខ្សោយ​ជាង​គេ តែ​គ្រាន់​តែ​ធ្វើ​កិច្ច​ការងារ​ប៉ុណ្ណឹង គ្រាន់​តែ​ចុច​តិច​ទៅ​រួច​បាត់»៕

អត្ថបទ៖ វីរបុត្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម