គ្រូបង្វឹក Chelsea បញ្ជាក់ពីស្ថានភាពរបួស Cole Palmer

គ្រូបង្វឹកក្រុមតោខៀវ Chelsea លោក Enzo Maresca បញ្ជាក់ពីស្ថានភាពរបួសរបស់កីឡាករ Cole Palmer ក្រោយត្រូវបានប្តូរចេញនៅដើមតង់ទី២អំឡុងពេលប្រកួតក្នុងវគ្គជម្រុះពានរង្វាន់ UEFA Conference league។

ខ្សែបម្រើប្រយុទ្ធ Cole Palmer ទើបតែឈ្នះពានរង្វាន់កីឡាករវ័យក្មេងឆ្នើមប្រចាំឆ្នាំ ត្រូវបានគេមើលឃើញមានបញ្ហាពាក់ព័ន្ធសរសៃពួរ ហើយត្រូវបានប្ដូរចេញនៅដើមវគ្គទី២ អំឡុងពេលប្រកួតជាមួយក្លិប Servette។ ក្រោយជួបបញ្ហានេះលោក Enzo Maresca បានចេញមុខបញ្ជាក់ពីស្ថានភាពរបស់កីឡាករវ័យក្មេង Cole Palmer ថា មិនមានបញ្ហាអ្វីចោទធ្ងន់ធ្ងរទេ ហើយលោកសង្ឃឹមថារូបគេអាចចូលលេងវិញក្នុងការប្រកួតចុងសប្ដាហ៍នេះ។

លោក Enzo Maresca បាននិយាយថា ៖«Cole មានអាការៈអ្វីមួយ ប៉ុន្តែគាត់មើលទៅល្អ។ ពួកយើងបានពិនិត្យគាត់រួចហើយ។ គាត់មើលទៅមិនអីទេ ហើយគាត់មិនមានបញ្ហាអ្វី​ធ្ងន់ទេ។ ហើយសង្ឃឹមថាវាមិនមានបញ្ហាអ្វីធំទេ គាត់ត្រូវរាប់បញ្ចូលក្នុងការប្រកួតថ្ងៃអាទិត្យ»។

ខ្សែបម្រើប្រយុទ្ធ Palmer ត្រូវបានគេរំពឹងថាអាចបន្ដជួយក្រុម Chelsea ក្នុងការប្រកួតជាមួយក្លិប Wolves ក្នុងការប្រកួត Premier League របស់ពួកគេនៅថ្ងៃអាទិត្យ។ មួយសប្តាហ៍ក្រោយមកពួកគេនឹង​ជួប Crystal Palace នៅ Stamford Bridge។

សម្រាប់ក្លិប Chelsea រដូវកាលនេះ​បាននាំយកកីឡាករជាច្រើនមកចូលរួមជាមួយក្លិប ប៉ុន្តែចំពោះកីឡាករអង់គ្លេស Palmer នៅតែជាសមាជិកសំខាន់មួយក្នុងក្រុម​មិនអាចខ្វះបាន៕

ប្រែសម្រួល៖ ផា រតនា