កីឡា

យុវជន Marselino គ្រាប់ពេជ្រឥណ្ឌូណេស៊ី កំពុងលេចធ្លោលើឆាកអន្តរជាតិ

បានផុស

៧ ខែ មុន

នៅ

ថ្ងៃសុក្រ ២២ វិច្ឆិកា ២០២៤

ដោយ

ខ្សែបម្រើប្រយុទ្ធវ័យក្មេង Marselino Ferdinan ស៊ុតបាន២គ្រាប់ជួយ ឥណ្ឌូណេស៊ី ឈ្នះ អារ៉ាប៊ីសាអ៊ូឌីត ២-០ ដើម្បីទទួលបាន៣ពិន្ទុបន្ថែម ក្នុងវគ្គជម្រុះជើងឯកពិភពលោក ឆ្នាំ២០២៦ បានកំពុងទទួលបានការចាប់អារម្មណ៍ខ្លាំងបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាពលេចធ្លោទាំងវ័យក្មេងបានជួយឲ្យ Marselino បោះជំហានទៅមុខយ៉ាងឆាប់រហ័ស។ កីឡាករអាយុ២០ឆ្នាំរូបនេះជាយុវជនរបស់ក្លិបឥណ្ឌូណេស៊ី Persebaya Surabaya ពីឆ្នាំ២០១៩-២០២១ មុនពេលចូលក្រុមធំក្នុងក្លិបដដែលនៅឆ្នាំ២០២១។ ឆ្នាំ២០២៣ រូបគេបានចុះកុងត្រាចូលក្លិបលីគទី២របស់ប្រទេសបែលហ្ស៊ិក Denize មួយឆ្នាំកន្លះ និងបច្ចុប្បន្នកំពុងលេងឲ្យក្លិប Oxford United ក្នុងលីគទី២ ប្រទេសអង់គ្លេស។

នៅរដូវកាល២០២១-២២ ជាពេលលេងក្លិប Persebaya Surabaya រដូវកាលដំបូងក្នុងលីគកំពូលឥណ្ឌូណេស៊ី រូបគេបានលេចធ្លោខ្លាំងបំផុតរហូតឈ្នះពានរង្វាន់ឯកត្តជន២ក្នុងរដូវកាលគឺ ពានរង្វាន់កីឡាករវ័យក្មេងឆ្នើមបំផុតប្រចាំលីគកំពូលឥណ្ឌូណេស៊ី និងពានរង្វាន់កីឡាបាល់ទាត់វ័យក្មេងឆ្នើមបំផុតរបស់សមាគមបាល់ទាត់ឥណ្ឌូណេស៊ី។ នៅឆ្នាំ២០២៣ រូបគេបានឈ្នះពានរង្វាន់អត្តពលិកដែលគេពេញចិត្តបំផុតដោយអ្នកសារព័ត៌មានឥណ្ឌូណេស៊ី។

កីឡាករ Marselino បានឈ្នះពានរង្វាន់កីឡាករវ័យក្មេងឆ្នើមបំផុតក្នុងព្រឹត្តិការណ៍ AFF Championship ឆ្នាំ២០២២ ទោះបីជាឥណ្ឌូណេស៊ី បានធ្លាក់ត្រឹមវគ្គពាក់កណ្តាលផ្តាច់ព្រ័ត្រក៏ដោយ។

រូបគេជាសមាជិកដ៏សំខាន់មួយរូបដែលបានជួយក្រុមបាល់ទាត់ជម្រើសជាតិឥណ្ឌូណេស៊ីអាយុ២៣ឆ្នាំ (U23) បានឈ្នះមេដាយមាស ក្នុងកីឡាស៊ីហ្គេម ឆ្នាំ២០២៣ នៅប្រទេសកម្ពុជា ដែលជាមេដាយមាសលើកដំបូងក្នុងរយៈពេល៣២ឆ្នាំចុងក្រោយរបស់ឥណ្ឌូណេស៊ី។

ប្រវត្តិក្លិប

-២០១៩-២១ ជាយុវជនក្លិប Persebaya Surabaya
-២០២១-២៣ លេងឲ្យក្លិប Persebaya Surabaya (លេងបាន៣០ប្រកួត រកបាន៧គ្រាប់)
-២០២៣-២៤ លេងឲ្យក្លិប Denize លីគទី២ បែលហ្ស៊ិក (លេងបាន៧ប្រកួត រកបាន១គ្រាប់)
-២០២៤-បច្ចុប្បន្ន លេងក្លិប Oxford United លីគទី២ ប្រទេសអង់គ្លេស

ជម្រើសជាតិឥណ្ឌូណេស៊ី

២០១៩-២០ ជាប់ U16 លេងបានចំនួន១១ប្រកួត រកបាន១២គ្រាប់
២០២២-២៣ ជាប់ U20 លេងបានចំនួន១២ប្រកួត រកបាន៥គ្រាប់
២០២១-បច្ចុប្បន្ន ជាប់ U23 លេងបានចំនួន២៥ប្រកួត រកបាន៨គ្រាប់
២០២២-បច្ចុប្បន្ន ជាប់ ក្រុមធំឥណ្ឌូណេស៊ី លេងបានចំនួន៣២ប្រកួត រកបាន៥គ្រាប់

សមិទ្ធផលសំខាន់ៗ

ទទួលបានលេខ៣ AFF U-16 Youth Championship ឆ្នាំ២០១៩
ទទួលបានមេដាយសំរិទ្ធ កីឡាស៊ីហ្គេម ឆ្នាំ២០២១
ទទួលបានមេដាយមាស កីឡាស៊ីហ្គេម ឆ្នាំ២០២៣
ទទួលបានពានកីឡាវ័យឆ្នើមប្រចាំ AFF Championship ឆ្នាំ២០២២
ទទួលបានពានកីឡាករវ័យក្មេងឆ្នើមលីគឥណ្ឌូណេស៊ី ឆ្នាំ២០២១-២២
ទទួលបានពានកីឡាករវ័យក្មេងឆ្នើមសមាគមបាល់ទាត់ឥណ្ឌូណេស៊ី ឆ្នាំ២០២១-២២
ទទួលបានជាអត្តពលិកប្រជាប្រិយភាពបំផុតតាមសារព័ត៌មាន ឆ្នាំ២០២៣
កំណត់ត្រាជាកីឡាករវ័យកក្មេងបំផុតក្នុងជម្រើសជាតិឥណ្ឌូណេស៊ី (អាយុ១៧ឆ្នាំ និង២៧៨ថ្ងៃ) ស៊ុតចូលនេប៉ាល់ ថ្ងៃទី១៤ ខែមិថុនា ឆ្នាំ២០២២