កីឡា

អតីតកីឡាករលីគថៃ៨នាក់កាត់ទោសឲ្យជាប់គុកពី១ទៅ៥ឆ្នាំជុំវិញកំណត់លទ្ធផលធំមួយ

បានផុស

៥ years មុន

នៅ

ថ្ងៃសុក្រ ១៩ មីនា ២០២១

ដោយ

តុលាការព្រហ្មទណ្ឌប្រទេសថៃនៅថ្ងៃព្រហស្បតិ៍ម្សិលមិញបានកាត់ទោសមនុស្ស១៥នាល់រាប់បញ្ចូលទាំងអតីតកីឡាករលីគបាល់ទាត់កំពូលថៃ៨នាក់ឲ្យជាប់ពន្ធនាគារពី១ឆ្នាំទៅ៥ឆ្នាំ ជុំវិញការកំណត់លទ្ធផលទុកជាមុនក្នុងការប្រកួតដ៏ធំកាលពីឆ្នាំ២០១៧។

ឧក្រិដ្ឋកម្មនេះបានពាក់ព័ន្ធនឹងឱកាសស៊ីសំណូកជាច្រើនដោយមនុស្ស៥នាក់បានភ្នាល់ក្នុងការប្រកួតបាល់ទាត់នៃលីគកំពូលថៃ។ ប្រាក់សំណូកត្រូវបានផ្តល់ឲ្យកីឡាករ អាជ្ញាកណ្តាល និងជំនួយការអាជ្ញាកណ្តាល។

ជនជាប់ចោទបានប្រព្រឹត្តក្នុងការកំណត់លទ្ធផលទុកជាមុននៅក្នុងខែកក្កដា និងខែកញ្ញា ឆ្នាំ២០១៧នៅខេត្តអូបុន រជ្ជចាក់ថានី, ណាខន រជ្ជស៊ីម៉ា និង ឈុន បូរី។

អតីតអ្នកចាំទី Wira Koetphutsa ពេលទៅដល់តុលាការ

អតីតជំនួយការអាជ្ញាកណ្តាលឈ្មោះ Thirachit Sitthisuk ត្រូវបានកាត់ទោសឲ្យជាប់ពន្ធនាគារ៥ឆ្នាំ និងពិន័យជាប្រាក់២០០០បាត។ អតីតនាយកក្លឹប Sisaket FC លោក Choetsak Bunchu ត្រូវបានកាត់ទោសឲ្យជាប់ពន្ធនាគារ៤ឆ្នាំ និងពិន័យជាប្រាក់២៥០០បាត។

បុគ្គលឈ្មោះ Phakphum Phannikun និង Manit Setthapasit ដែលអ្នកទាំងពីរជាអ្នកសូកប៉ាន់ត្រូវបានកាត់ទោសម្នាក់ៗឲ្យជាប់ពន្ធនាគារ៤ឆ្នាំ និងពិន័យជាប្រាក់២០០០បាត។

អតីតកីឡាករបាល់ទាត់ដ៏ល្បីល្បាញ Wanlop Saman និង Kittiphum Paphu-nga ត្រូវបានកាត់ទោសឲ្យជាប់ពន្ធនាគារម្នាក់ៗ២ឆ្នាំ និងពិន័យជាប្រាក់២៥០០បាត។

អតីតអាជ្ញាកណ្តាលកម្រិត FIFA ឈ្មោះ Phummarin Khamruen ត្រូវបានកាត់ទោសឲ្យជាប់ពន្ធនាគារ២ឆ្នាំ ខណៈអតីតអ្នកចាំទី Wira Koetphutsa ត្រូវជាប់ពន្ធនាគារ១ឆ្នាំ។ អតីតកីឡាករ Seksan Chaothonglang, Sutthiphong Laophon, Suwitthaya Namsinglaek និង Narong Wongthongkham ត្រូវបានកាត់ទោសឲ្យជាប់ពន្ធនាគារម្នាក់ៗពីរឆ្នាំដូចគ្នា។

ចំណែកបុគ្គលឈ្មោះ Thirachai Ngamcharoen, Thotsaphon Khamengkit, និង Ekkaphan Chandakon ត្រូវបានកាត់ទោសឲ្យជាប់ពន្ធនាគារម្នាក់ៗ១ឆ្នាំដូចគ្នា៕

ប្រែសប្រួល៖ វីរបុត្រ
ប្រភព៖ Bangkorkpost