ប៉ះ​គ្នា​យប់​នេះ គ្រូ PSG ចាត់ទុកខ្សែប្រយុទ្ធ Liverpool ដូចយន្តហោះចម្បាំង

អ្នកចាត់ការក្រុម Paris Saint-Germain លោក Luis Enrique បានសម្តែងក្តីព្រួយបារម្ភចំពោះខ្សែប្រយុទ្ធជួរមុខទាំង ៣ របស់ Liverpool មុនជួបគ្នាជើងទី ១ ក្នុងវគ្គ ១៦ ក្រុមពាន Champions League យប់នេះវេលាម៉ោង ៣ រំលងអាធ្រាត្រ។

ក្លិប Liverpool រដូវកាលនេះ ដែលកំពុងដឹកនាំដោយអ្នកចាត់ការលោក Arne Slot ត្រូវបានគេចាត់ទុក​ជាក្រុម​មានក្បួនប្រយុទ្ធវាយបកគ្រោះថ្នាក់បំផុត។ ខណៈលោក Enrique បានចាត់ទុកខ្សែប្រយុទ្ធជួរមុខទាំង ៣ របស់ពួកគេ គឺ​ប្រៀបបាននឹងយន្តហោះចម្បាំង ដែលអាចបង្ករគ្រោះថ្នាក់ដល់​ក្រុមរបស់លោកបានគ្រប់ពេល។

ថ្លែងនៅក្នុងសន្និសីទកាសែតមុនការប្រកួតយប់នេះ បុរសសញ្ជាតិ អេស្ប៉ាញ វ័យ ៥៤ ឆ្នាំបានមានប្រសាសន៍យ៉ាងដូច្នេះថា ៖«Liverpool គឺជាក្រុមមួយ ដែលមានការវាយបកល្អបំផុតនៅ អឺរ៉ុប។ ដូច្នេះពួកយើងនឹងព្យាយាមរក្សាបាល់ឱ្យបានល្អ និងប្រុងប្រយ័ត្នឱ្យបានច្រើន។ ពួកគេមានយន្តហោះចម្បាំង ៣ គ្រឿងនៅក្នុងតំបន់ប្រយុទ្ធ ហើយវាគឺមិនងាយស្រួលទេ ដើម្បីបញ្ឈប់យន្តហោះចម្បាំងទាំងនោះ»៕

ប្រែសម្រួលអត្ថបទ៖ សេម កុសល
ប្រភព៖ Sportskeeda