ឥណ្ឌូណេស៊ី​ ចាប់ផ្តើមដេញថ្លៃធ្វើ​ម្ចាស់ផ្ទះកីឡាយុវជន​អូឡាំពិក​ ឆ្នាំ២០៣០

គណៈកម្មាធិការអូឡាំពិកឥណ្ឌូណេស៊ី​ តាមសេចក្តីរាយការណ៍បានបើកកិច្ចសន្ទនាជាមួយគណៈកម្មាធិការអូឡាំពិកអន្តរជាតិ ដោយ​បានផ្តួចផ្តើមដំណើរការនៃការដេញថ្លៃធ្វើជាម្ចាស់ផ្ទះកីឡាយុវន​អូឡាំពិក​ រដូវក្ដៅ (YOG) លើកទី៥ ​ នៅ​ឆ្នាំ២០៣០។ នេះបើយោងតាមប្រធាន លោក Raja Sapta Oktohari។

ប្រទេសអាស៊ីអាគ្នេយ៍មួយនេះ មិនបានលាក់បាំងពីបំណងរបស់ខ្លួនក្នុងការធ្វើជាម្ចាស់ផ្ទះការប្រកួតកីឡាអូឡាំពិករដូវក្តៅ​​ឆ្នាំ២០៣៦ ហើយ​មាន​ផែន​ការ​​ទទួល​ធ្វើ​ម្ចាស់​ផ្ទះ ​កីឡាយុវជនអូឡាំពិក​ ៦ឆ្នាំមុន ដែល​ជាជំហានដ៏ល្អឥតខ្ចោះ។ ទោះបីជាយ៉ាងណា វាមានការប្រកួតប្រជែងយ៉ាងធំពីប្រទេសឥណ្ឌាសម្រាប់ព្រឹត្តិការណ៍ទាំងពីរ។ រហូតមកដល់ពេលនេះ​ជាប្រទេសតែមួយគត់ដែលបានដាក់សំណើជាផ្លូវការទៅកាន់គណៈកម្មការម្ចាស់ផ្ទះអនាគតរបស់ គណៈកម្មាធិការអូឡាំពិក​អន្តរជាតិ​ សម្រាប់សិទ្ធិធ្វើម្ចាស់ផ្ទះឆ្នាំ២០៣៦ និងមានផែនការស្រដៀងគ្នាសម្រាប់កីឡាអូឡាំពិកយុវជនឆ្នាំ២០៣០។

លោក Oktohari បាននិយាយថា ៖«គណៈកម្មាធិការជាតិអូឡាំពិកឥណ្ឌូណេស៊ី បានដំណើរការដេញថ្លៃលើកដំបូងសម្រាប់កីឡា​យុវជន​អូឡាំពិក​ នៅទីក្រុងហ្សាកាតា ក្នុងឆ្នាំ២០៣០។ ហេដ្ឋារចនាសម្ព័ន្ធដែលកំពុងអភិវឌ្ឍនៅក្នុងប្រទេស​ ពិតជានឹងបង្កើនឱកាសរបស់យើងក្នុងការក្លាយជាម្ចាស់ផ្ទះ​ព្រឹត្តិការណ៍កីឡាចម្រុះសំខាន់ៗដូចជា កីឡាអូឡាំពិកយុវជន»។

យោងតាម លោក Oktohari ប្រធាន​គណៈកម្មាធិការអូឡាំពិកឥណ្ឌូណេស៊ី​ ថា ការដេញថ្លៃនេះត្រូវបានធ្វើឡើងនៅរសៀលថ្ងៃអង្គារ មុនពេល NOC ឥណ្ឌូណេស៊ី​ប្រារព្ធខួបលើកទី៧៣ របស់ខ្លួន។ លោកបាននិយាយកាលពីថ្ងៃអង្គារថា ៖«យើងបានបញ្ជូន​ពាក្យ​​ដោយផ្ទាល់ទៅ គណៈកម្មាធិការអូឡាំពិក​អន្តរជាតិ​ ដោយសង្ឃឹមថា វានឹងត្រូវបានបន្តជាមួយនឹងកិច្ចប្រជុំបន្ទាប់។ យើង​សង្ឃឹមថា ឥណ្ឌូណេស៊ី អាចទទួលសេចក្ដីទុកចិត្តបាន ក្នុងការធ្វើជាម្ចាស់ផ្ទះកីឡាអូឡាំពិកយុវជន»។

ប្រធាន គណៈកម្មាធិការអូឡាំពិកឥណ្ឌូណេស៊ី​ ក៏បានចង្អុលបង្ហាញអំពីហេដ្ឋារចនាសម្ព័ន្ធគ្រប់គ្រាន់នៅក្នុងប្រទេសឥណ្ឌូណេស៊ី ដែលត្រូវការសម្រាប់ព្រឹត្តិការណ៍សំខាន់ៗ។ ជាពិសេសទីតាំងប្រកួតនៅទីក្រុងហ្សាកាតា និងប៉ាឡឹមបាង ដែលត្រូវបានប្រើក្នុងព្រឹត្តិការណ៍កីឡាអាស៊ី ឆ្នាំ២០១៨ និងកីឡាអាស៊ីប៉ារ៉ាហ្គេម។

លោកបានបន្តដោយសំដៅទៅលើការដេញថ្លៃនេះថា ៖«យើងប្រាកដណាស់ថា វាត្រូវបានគាំទ្រដោយប្រជាជនឥណ្ឌូណេស៊ី គាំទ្រដោយរដ្ឋាភិបាលជាពិសេស»។

ការប្រកួតកីឡា​យុវជន​អូឡាំពិក​ គឺជាព្រឹត្តិការណ៍អន្តរជាតិចម្រុះដែលរៀបចំដោយ IOC សម្រាប់អត្តពលិកមានអាយុពី១៥ ទៅ ១៨ឆ្នាំ។ ការរៀបចំនាពេលខាងមុខមុនឆ្នាំ២០៣៦ រួមមាននឹងប្រព្រឹត្តទៅនៅទីក្រុងដាកា ប្រទេសសេណេហ្គាល់ នៅឆ្នាំក្រោយ។

បញ្ជាក់ថា នៅអាស៊ីអាគ្នេយ៍ សិង្ហបុរី ជាប្រទេសដំបូងគេដែលធ្លាប់ធ្វើជាម្ចាស់ផ្ទះការប្រកួតកីឡាអូឡាំពិកយុវជន កាលពីឆ្នាំ២០១០។ កាលនោះ ក៏ជាការរៀបចំលើកទី១ បន្ទាប់មកលើកទី២ ធ្វើនៅចិន និង​លើកទី៣ ធ្វើនៅអាហ្សង់ទីន៕

ប្រែសម្រួល៖ មន្នីរ័ត្ន
ប្រភព៖ Inside The Games