កីឡា

វឿន វាសនា បន្តនៅជួយក្រុមជម្រើសជាតិ រហូតចប់ពាន SEA V. League

បានផុស

១ year មុន

នៅ

ថ្ងៃអង្គារ ២៤ មិថុនា ២០២៥

ដោយ

កីឡាករបាល់ទះដ៏ឆ្នើម វឿន វាសនា បានមកប្រទេសកំណើតជាច្រើនសប្តាហ៍មកហើយដោយបានចូលរួមហ្វឹកហាត់ជាមួយក្រុមបាល់ទះជម្រើសជាតិកម្ពុជាដើម្បីត្រៀមខ្លួនប្រកួតក្នុងពានរង្វាន់អន្តរជាតិនាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២២ ខែមិថុនា ឆ្នាំ២០២៥ វឿន វាសនា បានចូលរួមជាមួយក្លិបបាល់ទះ វិសាខា សម្រាប់ការប្រកួតមិត្តភាពជាមួយក្រុម Con An Ho Chi Minh របស់ប្រទេសវៀតណាមដោយបានយកឈ្នះក្នុងលទ្ធផល ៣-១។ អ្នកគាំទ្របានចាប់អារម្មណ៍យ៉ាងខ្លាំងពីវត្តមានរបស់កីឡាករបាល់ទះជម្រើសជាតិកម្ពុជារូបនេះថាតើរូបគេបន្តនៅក្នុងប្រទេសកម្ពុជារហូតដល់ពេលណា?

ក្រុមកម្ពុជាឈ្នះពាន SEA V. League Challenge

ឆ្លើយតបនឹងសំណួរនេះ លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានឲ្យដឹងថា វឿន វាសនា បានហ្វឹកហាត់ជាមួយក្រុមបាល់ទះជម្រើសជាតិកម្ពុជា និងចូលរួមប្រកួតរហូតដល់ចប់ពានរង្វាន់បាល់ទះលំដាប់ទី១ប្រចាំតំបន់អាស៊ានគឺ SEA V. League ឆ្នាំ២០២៥។ តាមការគ្រោងទុក ពានរង្វាន់ SEA V. League មាន២ដំណាក់កាល។ ដំណាក់កាលទី១ ចាប់ពីថ្ងៃទី ១១ ដល់ ទី ១៣ ខែកក្កដា ឆ្នាំ២០២៥ នៅប្រទេស ហ្វីលីពីន និងដំណាក់កាលទី២ ចាប់ពីថ្ងៃទី១៨ ដល់ទី ២០ ខែកក្កដា ឆ្នាំ២០២៥ នៅប្រទេសឥណ្ឌូណេស៊ី។

ទោះបីជាយ៉ាងណា រហូតដល់ពេលនេះ កម្មវិធីប្រកួត SEA V. League មិនទាន់ចេញព័ត៌មានលំអិតទេ សួម្បីតែឈ្មោះក្រុមក៏មិនទាន់បង្ហាញជាផ្លូវការដែរ។ ក្រុមបាល់ទះជម្រើសជាតិកម្ពុជា បានឡើងទៅកាន់ពាន SEA V. League ក្នុងនាមជាជើងឯក SEA V. League Challenge កាលពីឆ្នាំ២០២៤។

វឿន វាសនា បានទៅចូលរួមជាមួយក្រុមតៃវ៉ាន់ Win Streak កាលពីចុងឆ្នាំ ២០២៣ ដោយបានជួយក្លិបនេះឈ្នះជើងឯកលីគបាល់ទះតៃវ៉ាន់២រដូវកាលជាប់គ្នា ហើយរូបគេបានឈ្នះពានឯកត្តជនចំនួន៣ម្នាក់ឯងកាលពីរដូវកាល២០២៤-២៥ គឺ ពានកីឡាករល្អប្រចាំព្រឹត្តិការណ៍ ពានកីឡាកររកបានគ្រាប់បាល់ល្អបំផុត និងពានកីឡាករវាយផ្តាច់ល្អបំផុត។ រូបគេជាតួដ៏សំខាន់ដែលជួយក្រុមបាល់ទះជម្រើសជាតិកម្ពុជាឈ្នះមេដាយប្រាក់ និងសំរិទ្ធ កីឡាស៊ីហ្គេម ព្រមទាំងជើងឯក SEA V. League Challenge។