កីឡា

ឈឺន ទេវី លើកឡើងពីការហ្វឹកហាត់ និងប្ដេជ្ញាស្វែងរកមេដាយនៅអាស៊ានប៉ារ៉ាហ្គេម លើកទី១៣

បានផុស

១០ ខែ មុន

នៅ

ថ្ងៃពុធ ២៥ មិថុនា ២០២៥

ដោយ

កីឡាការិនី ឈឺន ទេវី ថាការហ្វឹកហាត់ដំណើរការបានល្អ និងមានភាពរីកចម្រើនចំពោះការខំប្រឹងប្រែងរបស់ខ្លួន និងមិត្តរួមក្រុមដើម្បីឆ្ពោះទៅការប្រកួតកីឡាវាយសីនៅព្រឹត្តិការណ៍អាស៊ានប៉ារ៉ាហ្គេម លើកទី១៣ ឆ្នាំ២០២៦ នៅប្រទេសថៃ។

កញ្ញា ឈឺន ទេវី

កញ្ញា ឈឺន ទេវី បានឲ្យដឹងថា រូបគេផ្ទាល់ និងមិត្តរួមក្រុមជម្រើសជាតិប៉ារ៉ាហ្គេមបានចូលហ្វឹកហាត់បានប្រហែល៣ខែមកហើយនៅទីតាំងរបស់សហព័ន្ធកីឡាវាយសីក្នុងពហុកីឡដ្ឋានជាតិ។ ដោយក្នុងមួយថ្ងៃហ្វឹកហាត់រយៈពេល ៨ម៉ោង និងចាប់ពីថ្ងៃចន្ទ ដល់ សៅរ៍។

រូបភាពផ្ដល់ជូន

កីឡាការិនីវាយសីរូបនេះបន្ថែមទៀតថា ការហ្វឹកហាត់មានភាពរីកចម្រើនគួរឲ្យកត់សម្គាល់តាមរយៈការបង្ហាត់បានជាប់លាប់ពីគ្រូបង្វឹក ប្រកបដោយបច្ចេកទេសខ្ពស់។ ក្រុមហ្វឹកហាត់ទាំងមូលយកចិត្តទុកដាក់ខ្ពស់ យល់ដឹងកាន់តែច្រើនពីរបៀបលេង បច្ចេកទេសវាយសេវា យកសី គប់សី តិចនិកល្អៗជាច្រើនទៀត។

ចំពោះក្ដីសង្ឃឹមឆ្ពោះទៅការប្រកួតអាស៊ានប៉ារ៉ាហ្គេម លើកទី១៣ នេះក្រុមទាំងមូលជឿជាក់ថានឹងអាចរកមេដាយបានក្នុងកម្រិតណាមួយជូនកម្ពុជា ប្រសិនបើម្នាក់ៗបន្តខំហ្វឹកហាត់ និងមានភាពរីកចម្រើនដូចពេលបច្ចុប្បន្នដែលព្យាយាមរាល់ថ្ងៃបែបនេះ។

រូបភាពផ្ដល់ជូន

បញ្ជាក់ដែរថា កីឡាការិនី ឈឺន ទេវី បានជាប់ជម្រើសជាតិកម្ពុជាផ្នែកប៉ារ៉ាហ្គេមលើកទី២ ហើយ និងកំពុងហ្វឹកហាត់ជាមួយក្រុមដើម្បីត្រៀមសម្រាប់ការប្រកួតនៅដើមឆ្នាំ២០២៦ ខាងមុខ។ ព្រឹត្តិការណ៍កីឡាអាស៊ានប៉ារ៉ាហ្គេម លើកទី១៣ នេះនឹងធ្វើឡើងនៅឯប្រទេសថៃ ចាប់ពីថ្ងៃទី២០ ដល់ ២៦ ខែមករា ឆ្នាំ២០២៦៕