កីឡា

ល្ងាចនេះ បឹងកេត អាចទម្លាយសំណាញ់ទី ព្រះខ័នរាជស្វាយរៀង បានឬទេ?

បានផុស

៣ ខែ មុន

នៅ

ថ្ងៃអាទិត្យ ២៤ សីហា ២០២៥

ដោយ

ជំនួបដែលអ្នកគាំទ្រទន្ទឹងរង់ចាំមកដល់នៅល្ងាចថ្ងៃអាទិត្យ ទី២៤ ខែសីហា នេះរវាង ម្ចាស់ផ្ទះ ព្រះខ័នរាជស្វាយរៀង និង បឹងកេត សម្រាប់ការប្រកួតសប្តាហ៍ទី៣ នៃលីគបាល់ទាត់កំពូលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមទាំងពីរមិនទាន់ចាញ់ដូចគ្នាសម្រាប់ការប្រកួតពីរសប្តាហ៍ដំបូង។ ថ្ងៃបើកឆាកលីគ បឹងកេត បានយកឈ្នះ ឡាយហ្វ ខេត្តព្រះសីហនុ ដោយលទ្ធផល ២-០ និងសប្តាហ៍ទី២ ពួកគេបានស្មើជាមួយក្រុមខ្លាំង ភ្នំពេញក្រោន ដោយគ្មានគ្រាប់បាល់។ បឹងកេត មាន៤ពិន្ទុ កំពុងឈរលេខ ២ ក្នុងតារាងពិន្ទុ។

ព្រះខ័នរាជស្វាយរៀង ធ្វើបានយ៉ាងល្អឥតខ្ចោះសម្រាប់ការប្រកួតលីគកម្ពុជាពីរសប្តាហ៍។ ពួកគេបានយកឈ្នះ ណាហ្គាវើលដ៍ ៣-០ និងបានឈ្នះ អង្គរថាយហ្គឺរ ៣-០ ដើម្បីរកបាន៦ពិន្ទុពេញឈរលើកំពូលតារាង។ អ្វីដែលកាន់តែពិសេសទៀតនោះ ពួកគេបានយកឈ្នះ Shan United ៣-០ ទៀតសម្រាប់ការប្រកួតសន្សំពិន្ទុទី១ ក្នុងពានរង្វាន់ ASEAN Club Championship កាលពីថ្ងៃទី២១ ខែសីហា ឆ្នាំ ២០២៥ នៅប្រទេសមីយ៉ាន់ម៉ា។

និយាយរួម ៣ ប្រកួតចុងក្រោយ ព្រះខ័នរាជស្វាយរៀង ស៊ុតចូលដៃគូ ៩ គ្រាប់ ប៉ុន្តែគ្មានដៃគូណាមួយអាចទម្លាយសំណាញ់ទីរបស់ខ្លួនបានឡើយ។ តើល្ងាចថ្ងៃអាទិត្យនេះ បឹងកេត អាចទម្លាយសំណាញ់ទីពួកគេបានទេ? ចម្លើយគឺមិនមែនជាការងាយស្រួលនោះទេ។ បើទោះបីជា ពួកគេប្រកួតនាថ្ងៃទី២១ ខែសីហា នៅប្រទេសមីយ៉ាន់ម៉ា ហើយថ្ងៃទី២២ ខែសីហា ត្រូវធ្វើដំណើរមកកម្ពុជា ដែលសម្រាកបានតែ១ថ្ងៃប៉ុណ្ណោះ មុនពេលប្រកួតជាមួយ បឹងកេត។ ពួកគេមានខ្សែប្រយុទ្ធ ខ្សែការពារ និងខ្សែបម្រើខ្លះមិនបានលេងនៅទឹកដីមីយ៉ាន់ម៉ា។ ខ្សែការពារ សឿយ វិសាល, សុផល ឌីម៉ង់ ខ្សែប្រយុទ្ធ សៀង ចន្ធា និង Bounphachan Bounkong សុទ្ធតែមិនបានលេងនៅមីយ៉ាន់ម៉ា ដូច្នេះ ពួកគេនឹងលេងល្ងាចនេះ។

និយាយពី បឹងកេត វិញពិតជាមិនធម្មតាក្នុងរដូវកាលនេះដោយបានរៀបចំក្រុម និងក្រុមការងារគ្រូបង្វឹកយ៉ាងល្អ។ ពួកគេមានគ្រូបង្វឹកបទពិសោធច្រើន Conor Nestor ដែលយល់ច្បាស់ពីស្ថានភាពបាល់ទាត់កម្ពុជា។ កីឡាករបទេសរបស់ពួកគេសុទ្ធតែលំដាប់មានដូចជា ខ្សែការពារសញ្ជាតិស្កុតឡែន Sean Kelly, ខ្សែបម្រើអូស្ត្រាលី Louis Zabala និងអង់គ្លេស Charlie Scott។ ចំណែកខ្សែប្រយុទ្ធមានកាមេរ៉ូន Louis Willy Ndongo, ប្រេស៊ីល Iago Bento និង Thabiso Brown មកពីតំបន់អាហ្វ្រិក។

ប្រវត្តិជួបគ្នា ១៩ លើកកន្លងមក ព្រះខ័នរាជស្វាយរៀង បានឈ្នះ ១១ លើក ខណៈ បឹងកេត បានឈ្នះ ៣លើក និងស្មើគ្នា ៥ លើក។ ដោយគ្រាន់តែចោទសួរថា តើ បឹងកេត អាចទម្លាយសំណាញ់ទីរបស់ ព្រះខ័នរាជស្វាយរៀងបានឬទេ? ចម្លើយគឺ វេលាម៉ោង ៦ ល្ងាចនេះ នៅលើទីលានស្មៅធម្មជាតិ ក្នុងពហុកីឡដ្ឋានជាតិមរតកតេជោ៕

អត្ថបទ៖ វីរបុត្រ