iPhone និង Apple Watch ស៊េរីក្រោយ អាចហៅលេខសង្គ្រោះបន្ទាន់ដោយស្វ័យប្រវត្តិ ពេលជួបគ្រោះថ្នាក់ចរាចរណ៍

កាលពីខែមុន ក្រុមហ៊ុន Apple បានប្រកាសបង្ហាញផលិតផល iPhone និងនាឡិកាវៃឆ្លាត ម៉ូឌែលចុងក្រោយរបស់ខ្លួនដែលអាចខលទៅលេខ 911 ដោយស្វ័យប្រវត្តិ ដើម្បីហៅឡានសង្គ្រោះបន្ទាន់ ប្រសិនមានគ្រោះថ្នាក់ចរាចរណ៍កើតឡើង។

ឧបករណ៍ឆ្លាតវៃទាំងពីរស៊េរីនឹងមានសមត្ថភាពដឹងខ្លួនភ្លាមៗលើករណីគ្រោះថ្នាក់ ពេលយានជំនិះជាប់គាំងធ្ងន់ធ្ងរ ឬក្រឡាប់។ ឧបករណ៍នេះបំពាក់ជាមួយបន្ទះឈីប accelerometer ដោយអាចមើលឃើញការផ្លាស់ប្តូរខុសប្រក្រតីនៃរថយន្ត ឬកំណត់បាននូវកម្លាំងប៉ះទង្គិចខ្លាំងទៅលើរថយន្តជាដើម។

ប្រភពពីសារព័ត៌មាន Daily Mail បានឱ្យដឹងថា ក្រុមហ៊ុន Apple ធ្លាប់ធ្វើតេស្តមុខងារនេះកាលពីឆ្នាំមុន ដោយក្រុមហ៊ុនបានប្រមូលទិន្នន័យពីរថយន្តរាប់លានគ្រឿងដែលមានអ្នកបើកបរជាអ្នកប្រើប្រាស់ iPhone និង នាឡិកាវៃឆ្លាត។ ក្នុងចំណោម​រថយន្ត​ជាង ១០លានគ្រឿងដែលមានបញ្ហាលើការបើកបរ មានជាង ៥០ម៉ឺនគ្រឿងបានហៅ​ទូរសព្ទទៅ 911​។

ដោយមើលឃើញពីបញ្ហាខាងលើ ក្រុមហ៊ុនបច្ចេកវិទ្យាយក្សនេះ បានប្រើទិន្នន័យរបស់អ្នកហៅទូរសព្ទទៅលេខ 911 ដើម្បីជួយដោះស្រាយការជាប់គាំង ឬគ្រោះថ្នាក់នានាដែលអ្នកបើកបរជួបប្រទះ នៅលើផលិតផលរបស់ខ្លួនវិញ ដោយពុំចាំបាច់ឱ្យអ្នកប្រើប្រាស់ពិបាកហៅឡានសង្គ្រោះបន្ទាន់ដោយខ្លួនឯងនោះទេ។

យ៉ាងណាមិញ ការអភិវឌ្ឃបច្ចេកវិទ្យាថ្មីទាំងពីស៊េរី ដើម្បីទាក់ទងឡានពេទ្យដោយស្វ័យប្រវត្កិនេះដែរ មិនទាន់មានការបញ្ជាក់ច្បាស់ការពីក្រុមហ៊ុននូវថ្ងៃចេញលក់នៅឡើយទេ។

គួររំលឹកថា កាលពីពេលកន្លងទៅក្រុមហ៊ុន Apple ធ្លាប់បញ្ចេញផលិតផលនាឡិកាឆ្លាតវៃដំបូងគេដែលដាក់បញ្ចូលនូវឧបករណ៍វាស់កម្រិតអុកស៊ីសែនក្នុងឈាម និងវាស់បញ្ហាសុខភាពមួយចំនួនទៀត។

ក្នុងនោះ នាយកប្រតិបត្តិក្រុមហ៊ុន លោក Tim Cook ធ្លាប់និយាយកាលពីឆ្នាំ ២០១៩ ថា ក្រុមហ៊ុននឹងបញ្ចេញសមិទ្ធផលដ៏អស្ចារ្យផ្សេងទៀតដែលពាក់ព័ន្ធជាមួយសុខភាព ក៏ដូចជាវិវត្តបច្ចេកវិទ្យាទំនើបៗ ដើម្បីរួមចំណែកលើការរស់នៅរបស់មនុស្សជាតិ។ ដូច្នេះគេអាចដឹងបានថា ទូរសព្ទ iPhone និងនាឡិកាវៃឆ្លាតស៊េរីថ្មី ជាបច្ចេកវិទ្យាសុវត្ថិភាពដែល Apple នឹងចេញលក់ក្នុងពេលដ៏ខ្លី​ខាងមុខ៕

ប្រែសម្រួល៖ សន្យា

ចុចអាន៖ Apple កាត់បន្ថយការផលិត iphone 13 ដោយសារតែបញ្ហាមួយនេះ

ចុចអាន៖ Meta ឈ្មោះថ្មីរបស់ក្រុមហ៊ុន Facebook មានន័យថាម៉េច?