ជប៉ុន ប្រើបច្ចេកវិទ្យា AI ដើម្បីស្វែងរកសកម្មភាពផលិតអាវុធខុសច្បាប់លើ​អនឡាញ

ប៉ូលិសជប៉ុនបានសម្រេចចិត្តប្រើប្រាស់បច្ចេកវិទ្យា AI ពង្រឹងការគ្រប់គ្រងតាមប្រព័ន្ធអ៊ីនធឺណិត ដើម្បីស្វែងរកព័ត៌មានដែលទាក់ទងនឹងការផលិតកាំភ្លើង និងគ្រឿងផ្ទុះខុសច្បាប់ផ្សេងៗ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះបច្ចេកវិទ្យា AI នេះ ទីភ្នាក់ងារប៉ូលិសជាតិជប៉ុន គ្រោងនឹងដាក់ឲ្យប្រើប្រាស់នៅខែកញ្ញា ដែលមានមានមុខងារ ក៏ដូចជាសមត្ថភាពវិភាគអត្ថបទ និងបញ្ចេញខ្លឹមសារដែលអាចបង្កគ្រោះថ្នាក់ធ្ងន់ធ្ងរដល់អាយុជីវិតមនុស្ស ។

ទន្ទឹមនោះ កាលពីខែកុម្ភៈ​ ទីភ្នាក់ងារប៉ូលិសជាតិជប៉ុន ក៏ធ្លាប់បានស្នើឲ្យអ្នកគ្រប់គ្រងគេហទំព័រផ្សេងៗត្រូវលុបចោល​ខ្លឹមសារអំពីរបៀបបង្កើត ឬកែឆ្នៃអាវុធ និងគ្រឿងផ្ទុះ ចេញពីបណ្តាញសង្គមផងដែរ ។

ពាក់ព័ន្ធនឹងបច្ចេកវិទ្យានេះដែរ នឹងត្រូវអនុវត្តចំពោះការបង្ហោះនៅលើបណ្ដាញ Twitter និង YouTube ហើយគេរំពឹងថា AI នឹងរកឃើញខ្លឹមសារដែលបង្កគ្រោះថ្នាក់បានត្រឹមត្រូវល្អជាងការ​ស្វែងរកតាម​ Google ។​

គួរបញ្ជាក់ថា ការឆ្ពោះទៅប្រើប្រាស់បច្ចេកវិទ្យា AI នេះ គឺបន្ទាប់ពីអតីតនាយករដ្ឋមន្ត្រីជប៉ុនលោក ​​Shinzo Abe ត្រូវបានបាញ់សម្លាប់កាលពីខែកក្កដាឆ្នាំមុន ជាពិសេសគឺករណីប៉ុនប៉ងធ្វើឃាតដោយការបំផ្ទុះគ្រាប់បែកកាលពីពេលថ្មីៗនេះលើលោកនាយករដ្ឋមន្ត្រី Kishida Fumio ៕

ប្រែសម្រួលដោយ ៖ នាង​ រតនៈ

ប្រភព ៖ NHK

ចុចអាន ៖ ក្រៅពីគ្រាប់បែក, ជនសង្ស័យប៉ុនប៉ងធ្វើឃាតនាយករដ្ឋមន្ត្រី ជប៉ុន នៅមាន អាវុធមួយប្រភេទទៀត (មានវីដេអូ)