អ្នកស្លាប់កើនឡើង១៦នាក់ក្នុងហេតុការណ៍រថយន្ដក្រុងដឹកអ្នកដំណើរបុកបង្កាន់ដៃស្ពានធ្លាក់ចូលប្រឡាយនៅស្រុកសន្ទុក

ជនរងគ្រោះដែលបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍រថយន្ដក្រុងដឹកអ្នកដំណើរបើកបុកបង្កាន់ដៃស្ពានអូរប្រាសាទ ក្នុងឃុំកកោះ ស្រុកសន្ទុក ខេត្តកំពង់ធំ បានកើនឡើងរហូតដល់១៦នាក់ បន្ទាប់កម្លាំងសមត្ថកិច្ចមុជរាវរកឃើញជនរងគ្រោះ៣នាក់បន្ថែមទៀត។ តាមការបញ្ជាក់ពីអាជ្ញាធរ ជនរងគ្រោះ៣នាក់បន្ថែមដែលទើបរកឃើញ មានម្នាក់ជាតៃកុងរថយន្ដពិតប្រាកដ ចំណែកអ្នកបើកបរជំនួស(ព្រូរថយន្ដ)ដែលបង្កគ្រោះថ្នាក់ត្រូវបានសមត្ថកិច្ចឃាត់ខ្លួន។ នោះបញ្ជាក់ថា ជនរងគ្រោះក្នុងហេតុការណ៍គ្រោះថ្នាក់ចរាចរណ៍ដ៏រន្ធត់នេះ មានជនរងគ្រោះសរុប៤០​នាក់នៅក្នុងរថយន្ដ។ នេះបើតាមការបញ្ជាក់ពីលោក អ៊ុន បុត អភិបាលរង និងជាអ្នកនាំពាក្យនៃរដ្ឋបាលខេត្តកំពង់ធំ ប្រាប់ កម្ពុជាថ្មី នាព្រឹកថ្ងៃទី២១ ខែវិច្ឆិកានេះ។

បើតាមអ្នកនាំពាក្យរដ្ឋបាលខេត្តកំពង់ធំ រថយន្ដក្រុងដឹកអ្នកដំណើរដែលបង្កគ្រោះថ្នាក់ដោយខ្លួនឯង និងបណ្ដាលឲ្យមានជនរងគ្រោះបាត់បង់ជីវិតរហូតដល់១៦នាក់ និងរបួស២៤នាក់នេះ ជារថយន្ដរបស់ក្រុមហ៊ុន វរៈ រិទ្ធី ហើយចំពោះ​សពជនរងគ្រោះដែលបាត់បង់ជីវិត ត្រូវបានក្រុមគ្រួសារសាច់ញាតិមកទទួលយកទៅធ្វើបុណ្យនៅស្រុកកំណើតអស់ហើយតាំងពីល្ងាចថ្ងៃទី២០វិច្ឆិកា។

គួររំលឹកថា កាលពីវេលាទាបភ្លឺថ្ងៃទី២០ ខែវិច្ឆិកា ឆ្នាំ២០២៥ មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅចំណុចស្ពានអូរប្រាសាទ ឃុំកកោះ ស្រុកសន្ទុក ខេត្តកំពង់ធំ ដែលត្រូវបានគេរកឃើញជនរងគ្រោះ៣៧នាក់ ក្នុងនោះស្លាប់១៣នាក់ និងរងរបួស២៤នាក់។ បន្ទាប់ពីកើតហេតុកម្លាំងសមត្ថកិច្ចជំនាញបានចុះដល់ទីតាំងកើតហេតុ​ និងជួសសង្គ្រោះជនរងគ្រោះដែលរងរបួសបញ្ជូនទៅមន្ទីរពេទ្យ​ ចំណែកសពជនរងគ្រោះដែលស្លាប់ត្រូវបានទំនាក់ទំនងក្រុមគ្រួសារដើម្បីមកទទួលយកទៅធ្វើបុណ្យតាមប្របៃណី។

តាមការសន្និដ្ឋានជំហ៊ានដំបូង សមត្ថកិច្ចដាក់ការសង្ស័យថា ករណីនេះកើតឡើងអាចបណ្ដាលមកពីតៃរថយន្ដងងុយដេក៕

អត្ថបទ៖ សុខុម