សម្ដេចធិបតី បញ្ជាឲ្យរដ្ឋមន្ត្រីយុត្តិធម៌ និងអគ្គស្នងការនគរបាលជាតិស្រាវជ្រាវឲ្យឃើញអ្នកបង្កគ្រោះថ្នាក់សម្លាប់ម​នុស្ស៦នាក់នៅបាត់ដំបង

ក្រោយពីឃើញមានការបញ្ចេញមតិច្រើនពាក់ព័ន្ធជាមួយនឹងគ្រោះថ្នាក់ចរាចរណ៍ដ៏រន្ធត់មួយដែលកើតឡើងនៅយប់ថ្ងៃទី២៧ ខែមីនា ឆ្នាំ២០២៦ នៅស្រុកមោងឬស្សី ខេត្តបាត់ដំបង ដែលបណ្ដាលឲ្យមនុស្សចំនួន ៦នាក់ត្រូវបានស្លាប់ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី៣១ ខែមីនានេះ តាមរយៈទំព័រហ្វេសប៊ុកបានបញ្ជាឲ្យលោកឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ និងលោក ស ថេត អគ្គស្នងការនគរបាលជាតិ ត្រូវស្រាវជ្រាវឲ្យឃើញចំពោះអ្នកបើករថយន្ដបង្កឲ្យមកទទួលខុសត្រូវតាមផ្លូវច្បាប់ និងត្រូវអនុវត្តច្បាប់ឱ្យបានម៉ឺងម៉ាត់ ដើម្បីផ្ដល់ភាពយុត្តិធម៌ដល់ជនរងគ្រោះ។

ការចេញមកអន្តរាគមន៍របស់សម្ដេចនាពេលនេះ ធ្វើឡើងបន្ទាប់ពីមានមតិមួយចំនួនសម្ដែងការព្រួយបារម្ភ អំពីការដែលអ្នកប្រព្រឹត្តិអាចមិនត្រូវបានទទួលទោសដោយសារមានគ្រួសារជាមន្ត្រី។

នៅលើសំណេររបស់សម្ដេចនាយករដ្ឋមន្ត្រី សម្ដេចក៏បានសម្តែងការសោកស្តាយដល់ជនរងគ្រោះ និងចូលរួមមរណ:ទុក្ខជាមួយនឹងក្រុមគ្រួសារសពនៃជនរងគ្រោះទាំង៦នាក់។ សម្ដេចធិបតី ក៏បានអំពាវនាវប្រជាពលរដ្ឋ ធ្វើការបើកបរដោយប្រុងប្រយ័ត្នខ្ពស់ និងគោរពច្បាប់ចរាចរណ៍ផ្លូវគោកឱ្យបានម៉ឺងម៉ាត់ ជាពិសេសក្នុងអំឡុងពេលបុណ្យចូលឆ្នាំប្រពៃណីជាតិខ្មែរនៅពេលខាងមុខ។

គួររំលឹកថា ករណីគ្រោះថ្នាក់ចរាចរណ៍ដ៏រន្ធត់ដែលបានផ្ដាច់ជីវិតមនុស្ស៦នាក់ (ទាំងកូនក្នុងផ្ទៃ) បានកើតឡើងកាលពីថ្ងៃទី២៧ ខែមីនា ឆ្នាំ២០២៦ វេលាម៉ោង២២៖៤០នាទី លើផ្លូវជាតិលេខ៥ ចន្លោះបង្គោលគីឡូម៉ែត្រលេខ២៤៦-២៤៧ នៅត្រង់ចំណុចក្រុមទី១២ ភូមិកកោះ ឃុំកកោះ ស្រុកមោងឫស្សី ខេត្តបាត់ដំបង។

តាមរបាយការណ៍របស់សមត្ថកិច្ច រថយន្តបង្កម៉ាក MERCEDES BENZ AMG GT53 ប្រភេទគ្រួសារ ពណ៌ខ្មៅ ពាក់ផ្លាកលេខកម្ពុជា C.S.6168 (រត់គេចខ្លួន) បើកបរមកពីទិសខាងភ្នំពេញ ឆ្ពោះទៅទិសខាងបាត់ដំបង លុះមកដល់ចំណុចកើតហេតុ បានបុកពីក្រោយម៉ូតូចំនួន២គ្រឿង លើគន្លងផ្លូវម៉ូតូ។ តាមរបាយការណ៍ដដែលបញ្ជាក់ថា ម្ចាស់រថយន្ដបង្កមានឈ្មោះ ស៊ីវ ជ័យសិដ្ឋ ភេទប្រុស អាយុ២០ឆ្នាំ មានស្រុកកំណើត នៅឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ និងមានទីលំនៅបច្ចុប្បន្ន នៅផ្ទះលេខ១៧ ផ្លូវ១២ ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ដែលគេស្គាល់ថា ត្រូវជាកូនប្រុសបង្កើតរបស់ស្នងការរងខេត្តបន្ទាយមានជ័យម្នាក់៕

អត្ថបទ​៖ សុខុម