ចរាចរណ៍

រថយន្ដព្រូសបុករបាំងថ្មពុះចែកទ្រូងផ្លូវក្រឡាប់ផ្ងារជើង ពេលមេឃកំពុងភ្លៀង

បានផុស

៥ years មុន

នៅ

ថ្ងៃអង្គារ ២៨ កញ្ញា ២០២១

ដោយ

រថយន្តតូយូតាព្រូសមួយគ្រឿងបើកបរដោយបុរសម្នាក់ក្នុងល្បឿនលឿន ខណៈមេឃកំពុងធ្លាក់ភ្លៀងខ្លាំងផង មិនប្រយ័ត្នជ្រុលរេចង្កូតទៅបុកនឹងរបាំងថ្មពុះចែកទ្រូងផ្លូវទាំងកំរោល បណ្តាលអោយក្រឡាប់ផ្ងារជើងច្រងាង បង្កអោយមានការភ្ញាក់ផ្អើល កាលពីវេលាម៉ោង១២និង៣០នាទីយប់រំលងអាធ្រាត្រ ឈានចូលថ្ងៃទី២៨ ខែកញ្ញា ឆ្នាំ២០២១ នៅចំណុចក្បែរស្តុបណូគា ស្ថិតតាមបណ្តោយផ្លូវលេខ២០០៤ កែងនឹងផ្លូវលេខ៣៧១ ( ផ្លូវសឡា ) ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានអោយដឹងថា នៅមុនកើតហេតុគេសង្គេតឃើញរថយន្តបង្កម៉ាកព្រូស ពណ៌ស ពាក់ស្លាកលេខ ភ្នំពេញ 2BA-2418 បើកបរដោយបុរសម្នាក់ ធ្វើដំណើរតាមបណ្តោយផ្លូវលេខ២០០៤ ក្នុងទិសដៅពីលិចទៅកើត ក្នុងល្បឿនលឿន ។ ពេលមកដល់ចំណុចកើតហេតុ ដោយសារមិនបានប្រយ័ត្ន ក៏ជ្រុលរេចង្កូតបើកបុកទៅនឹងរបាំងថ្មពុះចែកទ្រូងផ្លូវទាំងកំរោលតែម្តង បណ្តាលអោយរថយន្តត្រូវក្រឡាប់ផ្ងារជើងច្រងាង រីឯរបាំងថ្មត្រូវរងការខូចខាតអស់មួយផ្ទាំង ។ ចំណែក ឯបុរសជាអ្នកបើកបររថយន្តក៏ត្រូវរងរបួសផងដែរ ។

ក្រោយកើតហេតុ កម្លាំងនគរបាលមូលដ្ឋាន រួមទាំងនគរបាលជំនាញ បានចុះអន្តរាគមន៍ធ្វើការវាស់វែងស្ទូចយករថយន្តបង្កខាងលើ ទៅរក្សាទុកនៅការិយាល័យ នគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រងចាំដោះស្រាយទៅតាមផ្លូវច្បាប់នៅពេលក្រោយផងដែរ ។ រីឯ បុរសជាអ្នកបើកបររថយន្តបង្ក បានទៅមន្ទីរពេទ្យដោយខ្លួនឯងដើម្បីព្យាបាលរបួស ក្រោយការបង្កហេតុ ៕

អត្ថបទ៖ លីហេង