បុរសម្នាក់បានរងរបួសប្រអប់ជើងធ្ងន់ធ្ងរ ដោយសាររថយន្ដម៉ាកព្រូសមួយគ្រឿងបើកបុកពីក្រោយនៅលើផ្លូវល្បឿនលឿន ភ្នំពេញ-ព្រះសីហនុ ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១រសៀល ថ្ងៃទី០៨ ខែមិថុនា ឆ្នាំ២០២២ នៅលើផ្លូវល្បឿនលឿន ចន្លោះគីឡូម៉ែត្រលេខ ១១៧-១១៨ ស្ថិតក្នុងស្រុកកំពង់សីលា ខេត្តព្រះសីហនុ ។

សមត្ថកិច្ចបានឲ្យដឹងថា ជនរងគ្រោះឈ្មោះ ម៉ន ម៉េត ភេទប្រុស អាយុ៣៤ឆ្នាំ ទីលំនៅ ក្នុងភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ របួសធ្ងន់ បែកប្រអប់ជើងស្តាំ ។

សមត្ថកិច្ចបញ្ជាក់ថា មុនកើតហេតុរថយន្តព្រូស ពណ៌ស្ករ ពាក់ស្លាកលេខ ភ្នំពេញ 2AJ-0877 បើកបរដោយឈ្មោះ ថំ ភារៈ ភេទប្រុស អាយុ៣៤ឆ្នាំ ទីលំនៅភូមិសាលាកំរើក ឃុំ សាលាកំរើក ក្រុងសៀមរាប ខេត្តសៀមរាប ធ្វើដំណើរពីភ្នំពេញ ឆ្ពោះទៅខេត្តព្រះសីហនុ ក្នុងល្បឿនលឿន លុះដល់ចំណុចកើតហេតុ គេចមិនទាន់ក៏ជ្រុលបុកពីចំហៀង ម៉ូតូ ហុងដាឌ្រីម សេរី២០១៦ ពណ៌ខ្មៅ ពាក់ស្លាកលេខ កំពង់ ស្ពឺ 1H-0564 ក្នុងដំណើរស្របទិសគ្នា បណ្តាលឲ្យជនរងគ្រោះរងរបួសបែកប្រអប់ជើងស្តាំ ។

ជនរងគ្រោះត្រូវបានរថយន្តសង្គ្រោះដឹកបញ្ជូនទៅមណ្ឌលសុខភាព កំពង់សិលា រួចបញ្ជូនបន្តទៅមន្ទីរពេទ្យបង្អែកខេត្តកំពង់ស្ពឺ ។ ចំណែកមធ្យោបាយទាំង២គ្រឿង សមត្ថកិច្ចធ្វើវាស់វែងយកទៅរក្សាទុកនៅអធិការដ្ឋាននគរបាលស្រុក រង់ចាំដោះស្រាយគ្នាពេលក្រោយ។

គួររំលឹកថា កាលពីថ្ងៃទី៥ ខែមិថុនា ឆ្នាំ២០២២ កន្លងទៅថ្មីៗនេះ នៅលើផ្លូវល្បឿនលឿនភ្នំពេញ-ព្រះសីហនុ នេះ ក៏មានករណីគ្រោះថ្នាក់ចរាចរណ៍មួយដែររវាងរថយន្ដពីរគ្រឿងនៅចំណុចចន្លោះគីឡូ១៣៤-១៣៥ ស្ថិតក្នុងភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សីលា ខេត្តព្រះសីហនុ ក្នុងនោះបណ្ដាលឲ្យមានអ្នករងរបួសចំនួន៣នាក់ និងខូចខាតរថយន្ដពីរគ្រឿងផងដែរ៕

អត្ថបទ៖ សុខុម