រថយន្ដលុចស៊ីសមួយគ្រឿងបើកធ្លាក់ជ្រោះរមណីយដ្ឋានទឹកធ្លាក់ភ្នំខៀវ

តាមប្រភពព័ត៌មានពីកន្លែងកើតហេតុបានឲ្យដឹងថា នៅវេលាម៉ោងប្រមាណជាង៩ព្រឹកថ្ងៃទី២៧ ខែសីហា ឆ្នាំ២០២៣ មានករណីគ្រោះថ្នាក់ចរាចរណ៍មួយនៅចំណុចរមណីយដ្ឋានទឹកធ្លាក់ភ្នំខៀវ ក្នុងភូមិខ្លុង សង្កាត់អូរតាវ៉ៅ ក្រុងប៉ៃលិន ដោយសារតែយុវជនម្នាក់បើករថយន្តថយក្រោយមិនប្រយ័ត្ន បណ្តាលឲ្យធ្លាក់ចូលទឹកជ្រោះ សំណាងល្អមិនមានគ្រោះថ្នាក់ដល់អាយុជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីសមត្ថកិច្ចនគរបាលខេត្តប៉ៃលិនបានឲ្យដឹងថា យុវជនរងគ្រោះមានអាយុខ្ទង់១៩ឆ្នាំ រងរបួសស្រាល ត្រូវបានគេបញ្ជូលទៅព្យាបាលនៅមន្ទីរពេទ្យបង្អែកខេត្តប៉ៃលិន ដោយបើករថយន្តម៉ាក់លុចស៊ីស ពណ៌ស ពាក់ស្លាកលេខប៉ៃលិន 2B-0224 ខូចខាតធ្ងន់។

ប្រភពព័ត៌មានបានបន្តថា នៅកន្លែងកើតហេតុគេសង្កេតឃើញមានវត្តមានលោកអភិបាលក្រុង អភិបាលរងក្រុង មន្ត្រីសាលាក្រុងប៉ៃលិន និងសមត្ថកិច្ចចរាចរណ៍ខេត្ត/ក្រុងប៉ៃលិន ចុះពិនិត្យកន្លែងកើតហេតុផងដែរ។ ជាមួយគ្នានេះតាមប្រភពព័ត៌មាន ក៏បានអំពាវនាវដល់បងប្អូនដែលមកលេងកំសាន្តនៅរមណីយដ្ឋាននានាក្នុងខេត្ត សូមមានការបើកបរដោយប្រុងប្រយ័ត្នខ្ពស់ ព្រោះការបើកបរឡើងភ្នំ ទាមទារឲ្យមានបទពិសោធន៍ខ្ពស់ផងដែរ៕

អត្ថបទ៖ ផៃ លីន