មកដឹងចំនួនអ្នកស្លាប់ និងរបួសក្នុងហេតុការណ៍គ្រោះថ្នាក់ចរាចរណ៍នៅចំណោតយាយម៉ៅពេជ្រនិល

ករណីគ្រោះថ្នាក់ចរាចរណ៍នៅផ្លូវជាតិលេខ៤ ចំណុចចំណោតយាយម៉ោពេជ្រនិលបានបណ្ដាលឲ្យមានអ្នករងរបួសធ្ងន់ស្រាលចំនួន១៤នាក់ និងស្លាប់ម្នាក់។ បើតាមសមត្ថកិច្ចករណីគ្រោះថ្នាក់ចរាចរណ៍នេះ បង្កឡើងរវាងរថយន្ដទេសចរណ៍​សាំយ៉ុង​១៥​កៅអី​ និងរថយន្ដ​សណ្ដោងស៊ឺមីរ៉ឺម៉​ក​ ដឹកថ្មខ្សាច់។

យោងតាមរបាយការណ៍សមត្ថកិច្ច ​រថ​យន្ដ​សណ្ដោងស៊ឺមីរ៉ឺម៉​ក​ ធ្វើដំណើរក្នុងទិសដៅពី​ភ្នំពេញ​ ឆ្ពោះ​ទៅ​ខេត្ត​ព្រះសីហនុ រថយន្ត​សាំយ៉ុង​ ក្នុងទិសដៅពី​ខេត្ដ​ព្រះសីហនុ​ មករាជធានី​ភ្នំពេញ​ ពេលមកដល់ចំណុចកើតហេតុក៏បុកគ្នាតែម្ដង។

គួររំលឹកថា ករណីនេះបានកើតឡើងកាលពីរសៀលថ្ងៃទី១០ ខែតុលា ឆ្នាំ២០២៣ នៅផ្លូវជាតិ​លេខ៤ ចំណុចគីឡូម៉ែត្រ​លេខ១០៣-១០៤​ (ចំណោតយាយម៉ៅពេជ្រនិល) ស្ថិតនៅភូមិ​ទី៦​ ឃុំយា​យម៉ៅ​ពេជ្រ​និល​ ស្រុក​ភ្នំស្រួច​ ខេត្ដកំពង់ស្ពឺ​។ 

ក្រោយកើតហេតុ កម្លាំងសមត្ថកិច្ចបានចុះដល់ទីតាំងកើតហេតុដើម្បីសម្រួលចរាចរណ៍ និងធ្វើការវាស់វែងយកវត្ថុតាងទៅរក្សាទុកនៅអធិការដ្ឋាននគរបាលស្រុក ដើម្បីដោះស្រាយតាមផ្លុវច្បាប់៕