ការបើកបរនៅលើផ្លូវ៦០ម៉ែត្រ មានភាពល្អប្រសើរជាងមុន​ ក្រោយសមត្ថកិច្ចរឹតបន្តឹងអនុវត្តច្បាប់

សុវត្ថិភាពចរាចរណ៍នៅលើកំណាត់ផ្លូវ៦០ម៉ែត្រ ហាក់មានភាពល្អប្រសើរឡើងវិញ ក្រោយកម្លាំងសមត្ថកិច្ចដាក់គោលដៅត្រួតពិនិត្យរឹតបន្តឹងច្បាប់ចរាចរណ៍ជាប្រចាំក្នុងមួយរយៈពេលក្រោយមកនេះ។

ប្រជាពលរដ្ឋ ដែលជាអ្នកប្រកបរបរលក់ដូរនៅតាមបណ្តោយផ្លូវ៦០ម៉ែត្រ បានលើកឡើងថា ក្នុងមួយរយៈពេលក្រោយមកនេះ ពួកគាត់បានសង្កេតឃើញថា ករណីគ្រោះថ្នាក់ចរាចរណ៍ហាក់មិនមានការកើតឡើងដូចពេលមុននោះទេ ពិសេសការបើកបរធ្វើដំណើររបស់ពលរដ្ឋអ្នកបញ្ជាយានយន្ត ហាក់ចូលរួមគោរពបានល្អប្រសើរជាងមុន ដោយមិនសូវមានអ្នកបើកបរលឿនៗទៀតនោះឡើយ ខណៈដែលសមត្ថកិច្ចនៅតែបន្តយកចិត្តទុកដាក់ក្នុងការពង្រឹងការអនុវត្តច្បាប់ទាំងយប់ទាំងថ្ងៃ។

សូមបញ្ជាក់ថា បណ្ដោយផ្លូវ៦០ម៉ែត្រ ត្រូវបានយកចិត្តទុកដាក់ពីប្រមុខរាជរដ្ឋាភិបាល បានបញ្ជាឲ្យក្រសួងជំនាញពាក់ព័ន្ធស្ថាបនាហេដ្ឋារចនាសម្ព័ន្ធដូចជាគំនូសញ្ញា ផ្លាកសញ្ញា ហើយក៏គ្រោងរៀបចំឲ្យមានរបាំងពុះចែកទ្រូងផ្លូវផងដែរ ដើម្បីឲ្យប្រជាពលរដ្ឋក៏ដូចជាអ្នកបើកបរបញ្ជាយានយន្តងាយស្រួលក្នុងការបើកបរ និងកាត់បន្ថយករណីគ្រោះថ្នាក់ចរាចរណ៍។

សូមបញ្ជាក់បន្ថែមថា បណ្ដោយផ្លូវ៦០ម៉ែត្រ ត្រូវបានអនុញ្ញាតឲ្យបើកបរក្នុងល្បឿនចាប់ពីចំណុចផ្លូវជាតិលេច២ មកស្តុបសឺដែស ត្រឹម ៦០km/h ដោយឡែកពីស្តុបសឺដែស ដល់ស្ពានអាកាសមរតកតេជោ គឺអនុញ្ញាតឲ្យបើកបរក្នុងល្បឿនត្រឹម 40Km/h ប៉ុណ្ណោះ៕

អត្ថបទ៖ សុភា