ផ្លូវ៦០ម៉ែត្រ! បើករថយន្ដក្រោមជាតិអាល់​កុល​០.៦៧mg/l បុកម៉ូតូសណ្ដោងរ៉ឺម៉កស្លាប់ម្នាក់

ជនរងគ្រោះជាបុរសម្នាក់បានស្លាប់នៅកន្លែងកើតហេតុ ដោយសារករណីគ្រោះថ្នាក់ចរាចរាណ៍រវាងរថយន្ដម៉ាកស្តារិច បុកជាមួយម៉ូតូសណ្ដោងរ៉ឺម៉ក នៅបណ្ដោយផ្លូវ៦០ម៉ែត្រ ​ខណៈអ្នកបើកបររថយន្ដត្រូវបានកម្លាំងឃាត់ខ្លួនក្រោមជាតិអាល់កុលកម្រិត 0.67mg/l។

ករណគ្រោះគ្រោះថ្នាក់ចរាចរណ៍នេះ បានកើតឡើងនៅវេលាម៉ោង៧និង៣០នាទីយប់ ថ្ងៃទី២ ខែកុម្ភៈ ឆ្នាំ២០២៥ នៅលើផ្លូវ៦០ម៉ែត្រ ស្ថិតក្នុងភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ។ របាយការណ៍របស់សមត្ថកិច្ចបានឲ្យដឹងថា ក្នុងករណីគ្រោះថ្នាក់ចរាចរណ៍នេះ ភាគីរថយន្តម៉ាក ស្តារិច ពណ៌ ស ពាក់ផ្លាកលេខ ភ្នំពេញ 2BW-9795 អ្នកបើកបរត្រូវបានសមត្ថកិច្ចជំនាញឃាត់ខ្លួន និងយកមកត្រួតពិនិត្យជាតិអាល់កុលជាលទ្ធផលកម្រិត0.67mg/l។ ចំណែកជរងគ្រោះមានឈ្មោះ រតនា ភេទប្រុស អាយុ៣០ឆ្នាំ មុខរបេជាកម្មករសំណង់ មានស្រុកកំណើត នៅខេត្តកំពង់ធំ ស្លាប់ភ្លាមៗនៅកន្លែងកើតហេតុ។

តាមប្រភពព័ត៌មានពីកន្លែងកើតហេតុបានឲ្យដឹងថា ក្រោយពីកើតហេតុ អ្នកបើករថយន្ដបានព្យាយាមបើករត់គេចពីកន្លែងកើតហេតុ តែត្រូវបានប្រជាពលរដ្ឋ និងសមត្ថកិច្ចប្រដេញតាមរហូតឃាត់បានទាំងរថយន្ត និងអ្នកបើកបរ។

បច្ចុប្បន្ន អ្នកបើកបររថយន្តត្រូវបានសមត្ថកិច្ចជំនាញឃាត់បញ្ជូនមកការិយាល័យនគរបាលចរាចរណ៍ផ្លូវគោកដើម្បីសាកសួរ ចាត់ការតាមនីតិវិធី៕

អត្ថបទ៖ សុខា