ចរាចរណ៍

យុវជន ៣ នាក់ សង្ស័យជិះម៉ូតូឌុបគ្នាលឿនដូចហោះជ្រុលបុករថយន្ត ស្លាប់ម្នាក់ និងរបួសធ្ងន់ ២ នាក់

បានផុស

១២ ខែ មុន

នៅ

ថ្ងៃចន្ទ ១២ ឧសភា ២០២៥

ដោយ

យុវជនម្នាក់ បានស្លាប់ភ្លាមៗ នៅនឹងកន្លែងកើតហេតុ ចំណែក ២ នាក់ទៀត រងរបួសធ្ងន់ ខណៈសង្ស័យបើកម៉ូតូលឿនដូចហោះ វ៉ាជែងជ្រុលទៅបុករថយន្តបើកបញ្ច្រាសទិសគ្នាពេញទំហឹង។

ហេតុការណ៍នេះបានកើតឡើងកាលពីវេលាម៉ោង ១១ និង ៣៥ នាទីយប់ ថ្ងៃទី ១១ ខែឧសភា ឆ្នាំ ២០២៥ ស្ថិតតាមបណ្ដោយផ្លូវបេតុង ៣០ ម៉ែត្រ សង្កាត់ព្រៃស ខណ្ឌដង្កោ រាជធានីភ្នំពេញ។

តាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជន ៣ នាក់ ជិះម៉ូតូ ១ គ្រឿង ម៉ាក HONDA Dream ពណ៌ខ្មៅ ពាក់ផ្លាកលេខ កំពង់ស្ពឺ 1Q-6571 ជិះឌុបគ្នាវ៉ាជែងក្នុងល្បឿនលឿនជ្រុលទៅបុករថយន្ត TOYOTA Prius ពណ៌ទឹកប្រាក់ ពាក់ផ្លាកលេខ ភ្នំពេញ 2BL-5920 បើកបញ្ច្រាសទិសគ្នាពេញទំហឹងបណ្ដាលឲ្យស្លាប់ម្នាក់ភ្លាមៗ នៅកន្លែងកើតហេតុ និងរងរបួសធ្ងន់ ២នាក់ ត្រូវបានបញ្ជូនទៅមន្ទីរពេទ្យ។

ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយកម៉ូតូ និងរថយន្ត ទៅរក្សាទុក រង់ចាំការដោះស្រាយនៅពេលក្រោយ។ ចំណែកឯសពជនរងគ្រោះប្រគល់ជូនសាច់ញាតិយកទៅធ្វើបុណ្យតាមប្រពៃណី៕

អត្ថបទ ៖ ម៉េង