កីឡា

ជំនួបធំ ព្រះខ័នរាជស្វាយរៀង ឬ កងយោធពលខេមរភូមិន្ទ នៅថ្ងៃអាទិត្យនេះ?

បានផុស

៦ ខែ មុន

នៅ

ថ្ងៃពុធ ១៥ តុលា ២០២៥

ដោយ

ក្រុមបាល់ទាត់ កងយោធពលខេមរភូមិន្ទ ត្រូវទទួលក្រុមខ្លាំង ព្រះខ័នរាជស្វាយរៀង វេលាម៉ោង៦ល្ងាច ថ្ងៃអាទិត្យ ទី១៩ ខែតុលា ឆ្នាំ ២០២៥ នៅស្តាតចាស់ សម្រាប់ការប្រកួតសប្តាហ៍ទី៨ នៃលីគកំពូលកម្ពុជា។

ជំនួបនេះត្រូវបានអ្នកគាំទ្រចាប់អារម្មណ៍ខ្លាំង ដោយសារក្រុមមួយមិនទាន់ស្គាល់បរាជ័យ ហើយក្រុមមួយទៀតកំពុងឈរលើកំពូលតារាង។ បើកឆាកសប្តាហ៍ទី១ កាលពីថ្ងៃទី៩ ខែសីហា កងយោធពលខេមរភូមិន្ទ រំភើបខ្លាំងមែនទែនដោយពួកគេបានយកឈ្នះ វិសាខា ដោយលទ្ធផល ២-១។ បន្ទាប់មក ពួកគេបានស្មើជាមួយ ណាហ្គាវើលដ៍ ១-១, ស្មើ ភ្នំពេញក្រោន ១-១, ស្មើ បឹងកេត ១-១, ឈ្នះ ឡាយហ្វ ខេត្តព្រះសីហនុ ១-០ និងស្មើ អឹមអូអាយ កំពង់ដេវ៉ា ០-០ ដើម្បីបង្កើតកំណត់ត្រាផ្ទាល់ថ្មីមិនទាន់បរាជ័យឡើយ ៦ ប្រកួតដើមរដូវកាលគឺ ឈ្នះ ២ ប្រកួត និងស្មើ ៤ ប្រកួត រកបាន ១០ ពិន្ទុ កំពុងឈរចំណាត់ថ្នាក់លេខ ៦ ក្នុងតារាង។

ចំណែកដៃគូ ព្រះខ័នរាជស្វាយរៀង វិញបានឈ្នះ ណាហ្គាវើលដ៍ ៣-០, ឈ្នះ អង្គរថាយហ្គឺរ ៣-០, ឈ្នះ បឹងកេត ៣-០, ឈ្នះ វិសាខា ២-០, ឈ្នះ ឡាយហ្វ ខេត្តព្រះសីហនុ ៦-១ និងចាញ់ ភ្នំពេញក្រោន ២-៣។ ដូច្នេះ ពួកគេ ឈ្នះ ៥ និងចាញ់ ១ មាន ១៥ ពិន្ទុ កំពុងឈរលើកំពូលតារាង។

អ្វីគួរឲ្យកត់សំគាល់ ព្រះខ័នរាជស្វាយរៀង បានចាញ់ ភ្នំពេញក្រោន ២-៣ ប៉ុន្តែ ភ្នំពេញក្រោន បានត្រឹមស្មើជាមួយ កងយោធពលខេមរភូមិន្ទ ១-១ ហើយ ព្រះខ័នរាជស្វាយរៀង បានឈ្នះ បឹងកេត ៣-០ ប៉ុន្តែ បឹងកេត បានស្មើ កងយោធពលខេមរភូមិន្ទ ១-១ ដូច្នេះបញ្ជាក់យ៉ាងច្បាស់ថា ក្រុមដែលដឹកនាំដោយលោកគ្រូ ភា សុភក្ត្រា មានតំបន់ការពាររឹងមាំល្អណាស់។

បើក្រឡេកមើលប្រវត្តិជួបគ្នា ១០ លើកក្នុងលីគបាល់ទាត់កំពូលកម្ពុជា តាំងពីឆ្នាំ ២០២១ មក ក្រុមកងយោធពលខេមរភូមិន្ទ មិនធ្លាប់ឈ្នះឡើយគឺ ព្រះខ័នរាជស្វាយរៀង ឈ្នះ ៨ លើក និងស្មើ ២ លើក។

ជំនួបដែលអ្នកគាំទ្រចាប់អារម្មណ៍ខ្លាំងនេះអាចនឹងមានការខកចិត្តខ្លះដែរសម្រាប់អ្នកទស្សនាមួយចំនួន ពីព្រោះច្បាស់ណាស់ថា ក្រុមងយោធពលខេមរភូមិន្ទ នឹងប្រើក្បួនការពារ និងវាយបកច្រើនជាង ខណៈ ព្រះខ័នរាជស្វាយរៀង នឹងព្យាយាមវាយសម្រុកដាក់សម្ពាធខ្លាំង ដូច្នេះក្រុមមួយព្យាយាមការពារ ហើយក្រុមមួយព្យាយាមសម្រុកគឺជាការប្រកួតមួយដែលមិនសូវជក់ចិត្តសម្រាប់អ្នកមើល។