អាជ្ញាធរ​កំពុង​ជីកដាក់​ប្រព័ន្ធលូធំ ជាប់ផ្លូវ សម្តេចតេជោ(៦០)ម៉ែត្រ ដើម្បីរំដោះទឹក

ភ្នំពេញ ៖ យោង​តាម​ប្រភព​ពី​លោក ជា សុខៃ ចៅ​សង្កាត់​ចាក់អង្រែក្រោម​បាន​ឱ្យ​ដឹង​ថា បច្ចុប្បន្ននេះ​សាលារាជធានីភ្នំពេញបានជីកដាក់ប្រព័ន្ធលូខ្នាតធំទំហំ២ម៉ែត្រ៤ជ្រុង និង មានប្រវ៉ែង១៦៦៧ម៉ែត្រ ជាប់​នឹង​ផ្លូវ​សម្តេចតេជោ(៦០ម៉ែត្រ) ឆ្ពោះទៅស្ទឹងជ្រៅ​ព្រំប្រទល់​រាជធានីភ្នំពេញនិងខេត្តកណ្តាល ដើម្បីរំដោះទឹក​កុំ​ឱ្យ​លិច​លង់​លំនៅឋាន​ពលរដ្ឋ។

លោក ជា សុខៃ បានបន្ត​ថា ក្នុង​រដូវវស្សាឆ្នាំនេះ ពេលភ្លៀងធ្លាក់ខ្លាំង​បង្ក​ឱ្យ​លិច​លង់​លំនៅឋាន​ចំនួន៣ភូមិ ក្នុង​នោះ​មាន​ភូមិទួលរកា១ ភូមិទួលរកា២ និងភូមិទួលរកា៣ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ហើយ​បើ​សិន​ជា​ការដ្ឋាន​ជីកដាក់​លូ​បាន​សម្រេច​រួចរាល់​ហើយ​នោះ គឺ​លំនៅឋាន​ពលរដ្ឋ​ទាំង​សង្កាត់​ចាក់អង្រែក្រោម និងសង្កាត់ចាក់អង្រែលើ លែងលិចលង់​ដូច​សព្វ​ថ្ងៃ​នេះ។

លោក ជា សុខៃ បាន​សុំការ​អធ្យាស្រ័យពីសំណាក់បងប្អូនពលរដ្ឋ ដែលរងការលិចលង់លំនៅឋាន​នា​រដូវ​វស្សានេះ ដោយសារតែការជីកដាក់លូខ្នាតធំមិនទាន់រួចរាល់ជាស្ថាពរ៕

ដោយ ៖ នរា