អភិបាលខេត្ត និងតំណាងរាស្ត្រស្វាយរៀង ចុះដឹកនាំដាក់លូរំដោះទឹកដល់អតីតយុទ្ធជន និវត្តន៍ជន នៅស្រុករមាសហែក

លោក ប៉េង ពោធិ៍សា អភិបាលខេត្តស្វាយរៀង និងលោកស្រី ដួង វណ្ណា តំណាងរាស្ត្រមណ្ឌលស្វាយរៀង បានចុះពិនិត្យវឌ្ឍនភាពនៃការជីកប្រឡាយ និងការរៀបចំដាក់ប្រព័ន្ធលូរំដោះទឹក ជូនដល់គ្រួសារអតីតយុទ្ធជន និវត្តន៍ជនផ្ទះ៤០០ខ្នង នៅភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង នៅព្រឹកថ្ងៃទី១៩ ខែតុលា ឆ្នាំ២០២៣ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលខេត្តស្វាយរៀង លោក ប៉េង ពោធិ៍សា បានឱ្យដឹងថា ជារៀងរាល់ឆ្នាំនារដូវភ្លៀងធ្លាក់ ប្រជាពលរដ្ឋទូទៅចាប់ផ្តើមកើតមានកង្វល់ ព្រោះពេលខ្លះពួកគាត់ត្រូវខកខាន ឬយឺតយ៉ាវការងារ ដោយសារឧបសគ្គភ្លៀងធ្លាក់។ អ្វីដែលកាន់តែពិបាកនោះ គឺក្រោយពេលរាំង ក្នុងតំបន់មួយចំនួន ត្រូវស្ទះប្រឡាយ ធ្វើឱ្យទឹកលិចផ្លូវ និងប៉ះពាល់ដល់ផលដំណាំថែមទៀត។

លោកអភិបាលខេត្ត បញ្ជាក់ថា ចំពោះបញ្ហាលិចលង់ភូមិឋានប្រជាពលរដ្ឋនៅតំបន់នេះ ជាកង្វល់របស់អាជ្ញាធរ ដូច្នេះ មន្ត្រីជំនាញពាក់ព័ន្ធទាំងអស់ត្រូវតែរួមគ្នារិះរកឱ្យអស់គ្រប់មធ្យោបាយ ធ្វើយ៉ាងណានាំទឹកឱ្យអស់ចេញពីតំបន់ទំនាប នោះការលិចលង់នឹងអាចដោះស្រាយបាន។ លោកថា នៅចំពោះមុខ ត្រូវដាក់លូបន្ថែម ស្តារ កាយប្រឡាយទឹកហូរ ឱ្យបានលឿន និងមួយផ្នែកទៀតត្រូវស្តារ និងកាយប្រឡាយទឹកនេះ ឱ្យហូរទៅប្រឡាយខាងក្រោម ដើម្បីឱ្យទឹកហូរលឿន។

សម្រាប់ការរៀបចំដាក់ប្រពន្ធលូរំដោះទឹក ជូនដល់គ្រួសារអតីតយុទ្ធជន និវត្តន៍ជនផ្ទះ ៤០០ខ្នងនេះ គឺក្រោមការជួយឧបត្ថម្ភគាំទ្រថវិកាពី សម្តេច ម៉ែន សំអន លោក វង សូត អនុប្រធានទី២រដ្ឋសភា លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នាយឧត្តមសេនីយ៍ សៅ សុខា មេបញ្ជារកងរាជអាវុធហត្ថលើផ្ទៃប្រទេស និងជាប្រធានក្រុមការងាររាជរដ្ឋាភិបាលចុះជួយស្រុករមាសហែក និងលោក ហុង វិណុល មេបញ្ជាររងកងរាជអាវុធហត្ថលើផ្ទៃប្រទេស និងជាអនុប្រធានក្រុមការងាររាជរដ្ឋាភិបាលចុះជួយស្រុករមាសហែក៕

អត្ថបត៖ ភក្ដី