តើអាមេរិក ប្រតិកម្មបែបណា ចំពោះការរំលោភបទឈប់បាញ់នៅហ្គាហ្សា?

ក្រោយមានសេចក្តីរាយការណ៍អំពីការរំលោភបទឈប់បាញ់ពីសំណាក់ក្រុមហាម៉ាសនិងអ៊ីស្រាអែល ចាប់តាំងពីភាគីទាំងពីរចុះហត្ថលេខាលើកិច្ចព្រមព្រៀងសន្តិភាពមក សហរដ្ឋអាមេរិកបានបញ្ចេញប្រតិកម្មយ៉ាងខ្លាំងដោយព្រមានក្រុមហាម៉ាសនិងបង្កើនសកម្មភាពការទូតយ៉ាងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយ​ផ្ទុះ​ហិង្សាជាបន្តបន្ទាប់ មន្ត្រី​អាមេរិកក៏​បាន​ទៅ​បំពេញ​ទស្សនកិច្ច​នៅ​អ៊ីស្រាអែល ដើម្បី​ដោះស្រាយ​បទ​ឈប់​បាញ់​ដ៏​ផុយស្រួយនេះ។

ជាប្រតិកម្មរបស់អាមេរិក លោកប្រធានាធិបតី ដូណាល់ ត្រាំ បានគំរាមអំពីផលវិបាកធ្ងន់ធ្ងរប្រឆាំងនឹងក្រុមហាម៉ាស ប្រសិនបើរំលោភកិច្ចព្រមព្រៀងនេះ។ កាលពីថ្ងៃទី២០ខែតុលា លោកថ្លែងថា ប្រសិនបើក្រុមហាម៉ាសមិនស្មោះត្រង់ លោកនឹងកម្ទេចក្រុមនេះចោល។

ទន្ទឹមនោះ រដ្ឋបាលលោកត្រាំ ក៏បញ្ជូនបេសកជនទៅកាន់តំបន់នេះដើម្បីរក្សាស្ថិរភាពបទឈប់បាញ់ផងដែរ ពោលនៅថ្ងៃទី២០ខែតុលា បេសកជនពិសេស Steve Witkoff និង Jared Kushner បានទៅដល់ប្រទេសអ៊ីស្រាអែល ដើម្បីជួបជាមួយនាយករដ្ឋមន្ត្រី Benjamin Netanyahu និងវាយតម្លៃស្ថានភាព។

ដោយឡែក អនុប្រធានាធិបតី JD Vance ក៏គ្រោងទៅបំពេញទស្សនកិច្ចនៅអ៊ីស្រាអែលផងដែរ ដើម្បីពិភាក្សាអំពីបទឈប់បាញ់ និងបញ្ហាក្នុងតំបន់។

សូមជម្រាបជាថ្មីមុននេះ របាយការណ៍ដ៏គួរឲ្យភ្ញាក់ផ្អើលពីការិយាល័យព័ត៌មានរដ្ឋាភិបាលហ្គាហ្សាបង្ហាញថា ពលរដ្ឋប៉ាឡេស្ទីនយ៉ាងតិច៩៧នាក់ ត្រូវអ៊ីស្រាអែលសម្លាប់ចាប់តាំងពីបទឈប់បាញ់ចូលជាធរមាននៅថ្ងៃទី១០ខែតុលាមក។

រដ្ឋាភិបាលហ្គាហ្សា បានកត់ត្រាអំពីការរំលោភបទឈប់បាញ់ចំនួន៨០លើក ក្នុងនោះមានរហូតដល់ទៅ២១លើកដែលកើតឡើងត្រឹមមួយថ្ងៃអាទិត្យទី១៩។ ប្រភពដដែលបន្តថា ការរំលោភបទឈប់បាញ់ទាំងនោះមានដូចជា៖ ការបាញ់លើជនស៊ីវិលដោយផ្ទាល់ ការផ្តក់គ្រាប់ចូលតំបន់ធានាសន្តិសុខ និងការចាប់ខ្លួនជនស៊ីវិល៕

អត្ថបទ៖ សុខ សុវណ្ណ

ចុចអាន៖ អ៊ីស្រាអ៊ែលទម្លាក់គ្រាប់បែកទម្ងន់​សរុប​១៥៣តោនលើហ្គាហ្សា បន្ទាប់ពីបទ​ឈប់បាញ់