ថ្ងៃ​នេះ ២ ក្រុម​ឡើង​វគ្គ​ពាក់​កណ្តាល​ផ្តាច់​ព្រ័ត្រ ពាន​​សម្តេចតេជោ ហ៊ុន សែន ថ្នាក់ខេត្ត

ពាន​រង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ ឆ្នាំ ២០២៥/២៦ (ថ្នាក់ខេត្ត) បានឈានមកដល់ការប្រកួតជើងទី ២ វគ្គ ៨ ក្រុមចុងក្រោយហើយ ដើម្បីកាត់សេចក្តីរកក្រុមខ្លាំង ៤ ក្រុមចុងក្រោយ ឡើងទៅកាន់វគ្គពាក់កណ្តាលផ្តាច់ព្រ័ត្រ។

រម្លឹកកាលពីការប្រកួតជើងទៅ ១ កាល​ពីថ្ងៃទី ២៨-២៩ ខែ តុលា ឆ្នាំ ២០២៥ ក្នុងនោះជាលទ្ធផល ក្រុមខេត្ត ត្បូងឃ្មុំ បានយកឈ្នះខេត្ត បាត់ដំបង ក្នុងលទ្ធផល ៤-០, ភ្នំពេញ ហ្គាឡាក់ស៊ី បានស្មើក្រុម ខេត្ត កំពត ២-២។ ចំណែក ២ គូទៀត ក្រុមខេត្ត សៀមរាប បានយកឈ្នះក្រុម ខេត្ត ព្រះសីហនុ ៣-២ និងចុងក្រោយក្រុម ខេត្ត កំពង់ចាម បានយកឈ្នះលើក្រុម ខេត្ត កំពង់ស្ពឺ ៣-១។

ដោយឡែកនៅសប្តាហ៍នេះ ក្រុមទាំង ៨ ខាងលើ នឹងត្រូវជួបគ្នាជាថ្មី សម្រាប់ការប្រកួតជើងទី ២ វគ្គ ៨ ក្រុមចុងក្រោយ។ នៅថ្ងៃ អង្គារ៍ ទី ១១ ខែ វិច្ឆិកា ឆ្នាំ ២០២៥ មាន ២ គូ ដោយគូទី ១ ក្រុមខេត្ត កំពត នឹងត្រូវបើកទ្វារកីឡដ្ឋានរបស់ខ្លួនទទួលស្វាគមន៍ក្រុម ភ្នំពេញហ្គាឡាក់ស៊ី។ ចំណែកគូទី ២ ក្រុម ខេត្ត ត្បូងឃ្មុំ ត្រូវបើកទ្វារកីឡដ្ឋានរបស់ខ្លួនទទួលស្វាគមន៍ក្រុមខេត្ត បាត់ដំបង។

នៅថ្ងៃ ពុធ ទី ១២ ខែ វិច្ឆិកា ឆ្នាំ ២០២៥ មាន ២ គូទៀត ដោយគូទី ១ ក្រុម ខេត្ត សៀមរាប នឹងត្រូវទទួលស្វាគមន៍ក្រុម ខេត្ត ព្រះសីហនុ។ រីឯមួយគូទៀត ក្រុមខេត្ត កំពង់ស្ពឺ នឹងត្រូវបើកទ្វារកីឡដ្ឋានរបស់ខ្លួន ទទួលស្វាគមន៍ក្រុមភ្ញៀវ ខេត្ត កំពង់ចាម។

ខាងក្រោមនេះជាកាលវិភាគការប្រកួតជើងទី ២ វគ្គ ៨ ក្រុមចុងក្រោយពានសម្តេចតេជោ (ថ្នាក់ខេត្ត)៖

+ ថ្ងៃ អង្គារ៍ ទី ១១ ខែ វិច្ឆិកា ឆ្នាំ ២០២៥៖

• ក្រុមខេត្ត កំពត VS ក្រុម ភ្នំពេញហ្គាឡាក់ស៊ី
• ក្រុម ខេត្ត ត្បូងឃ្មុំ VS ក្រុមខេត្ត បាត់ដំបង

+ ថ្ងៃ ពុធ ទី ១២ ខែ វិច្ឆិកា ឆ្នាំ ២០២៥៖

• ខេត្ត សៀមរាប VS ខេត្ត ព្រះសីហនុ
• ក្រុមខេត្ត កំពង់ស្ពឺ VS ក្រុម ខេត្ត កំពង់ចាម៕

អត្ថបទ៖ សេម កុសល