កីឡា

លោក តិក ប៊ុនវី រំពឹងខ្ពស់លើកីឡាករកាយវប្បកម្មកម្ពុជាអាចដណ្ដើមមេដាយពិភពលោកជាថ្មីជូនប្រទេសជាតិ

បានផុស

៧ ខែ មុន

នៅ

ថ្ងៃអង្គារ ១១ វិច្ឆិកា ២០២៥

ដោយ

លោក តិក ប៊ុនវី តំណាងសហព័ន្ធកីឡាកាយវប្បកម្មកម្ពុជា ដាក់ក្ដីរំពឹងខ្ពស់លើកីឡាករកម្ពុជាថាអាចនឹងដណ្ដើមបានមេដាយកម្រិតពិភពលោកនេះជាថ្មីទៀតជូនកម្ពុជាក្នុងការប្រកួតជ្រើសរើសជើងឯកពិភពលោក លើកទី១៦ ឯប្រទេសឥណ្ឌូណេស៊ីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមកីឡាករកាយវប្បកម្មចេញទៅប្រកួត

លោក តិក ប៊ុនវី ដែលជាគ្រូបង្វឹក និងជាប្រធានប្រតិភូដឹកនាំកីឡាករបានឲ្យដឹងថា សម្រាប់ក្រុមកីឡាកាយវប្បកម្មកម្ពុជាគឺបានហ្វឹកហាត់ត្រៀមខ្លួនជាយូរមកហើយចំពោះការប្រកួតជ្រើសរើសជើងឯកពិភពលោកនៅឯប្រទេសឥណ្ឌូណេស៊ីនេះ។

ក្រុមកីឡាករកាយវប្បកម្មចេញទៅប្រកួត

កីឡាករទាំងពីររូបដែលសហព័ន្ធជ្រើសរើសយកទៅប្រកួតនេះគឺត្រូវបានត្រួតពិនិត្យតាមដាន និងវាស់ស្ទង់សមត្ថភាពមើលឃើញថាល្អលេចធ្លោជាងគេប្រកបដោយបទពិសោធច្រើនផង និងមានសក្កានុពល។ តាមរយៈសមត្ថភាពល្អ និងការហ្វឹកហាត់បានដិតដល់ផងនោះក្នុងនាមសហព័ន្ធជឿជាក់ថាក្នុងការប្រកួតមួយនេះអាចនឹងទទួលបានមេដាយជាថ្មីទៀតជូនជាតិមាតុភូមិ។ កន្លងទៅក្រុមជម្រើសជាតិកម្ពុជាធ្លាប់ឈ្នះមេដាយពិភពលោកនេះរហូតដល់ទៅ ៣គ្រឿងរួចមកហើយ។

កម្មវិធីប្រកួត

បញ្ជាក់ដែរថា សហព័ន្ធកីឡាកាយវប្បកម្មកម្ពុជាបានបញ្ជូនប្រតិភូ គ្រូបង្វឹក កីឡាករចំនួន ៥រូបទៅចូលរួមការប្រកួតជ្រើសរើសជើងឯកពិភពលោក លើកទី១៦ នៅឯប្រទេសឥណ្ឌូណេស៊ី។ ការប្រកួតនេះធ្វើឡើងចាប់ពីថ្ងៃទី១១ ដល់ ១៧ ខែវិច្ឆិកា ឆ្នាំ២០២៥។ គិតមកដល់ពេលនេះមានប្រទេសចូលរួមប្រមាណ ៤០ប្រទេសហើយក្នុងការប្រកួតប្រជែងមេដាយមួយនេះ។ ប្រតិភូដែលដឹកនាំដោយលោក តិក ប៊ុនវី គ្រូបង្វឹកដោយលោកស្រី អេមី សារីរ៉ុម កីឡាករ ស្រ៊ិន រាជ្យ កីឡាករ តាំង សំបូរ បានចេញដំណើរទៅប្រទេសឥណ្ឌូណេស៊ីហើយកាលពីព្រឹកថ្ងៃទី១១ ខែវិច្ឆិកា ឆ្នាំ២០២៥ នេះ៕