អាកាសធាតុនៅខេត្តភាគឦសានចាប់ផ្តើមចុះត្រជាក់ដល់ ១២អង្សាសេ លាយឡំខ្យល់កន្រ្តាក់

ខេត្តរតនគិរី និងខេត្តមណ្ឌលគិរី ដែលស្ថិតនៅភូមិភាគឦសាននៃប្រទេសកម្ពុជា អាកាសធាតុចាប់ផ្តើមចុះត្រជាក់ លាយឡំជាមួយខ្យល់កន្ត្រាក់ ដែលធ្វើឱ្យសីតុណ្ហភាពចុះត្រជាក់ ១២ អង្សាសេ ខណៈអាជ្ញាធរអំពាវនាវដល់ពលរដ្ឋបង្កើនការប្រុងប្រយ័ត្នបង្កាជំងឺផ្សេងៗ។

យោងតាមមន្ទីរធនធានទឹក និងឧតុនិយមខេត្តរតនគិរី ចាប់ពីថ្ងៃទី ២០រហូតដល់ថ្ងៃទី ២៥ ខែវិច្ឆិកា ឆ្នាំ ២០២៥ ខ្យល់មូសុងឦសានបក់មកក្នុងកម្រិតមធ្យមមានឥទ្ធិពលមកលើខេត្តនេះ ដែលធ្វើឱ្យស្ថានភាពចុះត្រជាក់តិចតួចសីតុណ្ហភាពមានពី ១៨ ទៅ ២៧°C ។  

ជាមួយគ្នានេះ មន្ទីរធនធានទឹកអំពាវនាវឱ្យយកចិត្តទុកដាក់ និងប្រុងប្រយ័ត្នអំពីស្ថានភាពអាកាសធាតុចុះត្រជាក់នេះ ដើម្បីជៀសវាងពីជម្ងឺដង្កាត់ផ្សេងៗ ដែលអាចកើតមានជាយថាហេតុលើមនុស្ស សត្វ រុក្ខជាតិ និងពិសេសយកចិត្តទុកដាក់ថែទាំសុខភាពលើមនុស្សចាស់ ស្ត្រី និងកុមារ។

ចំណែក អាកាសធាតុនៅខេត្តមណ្ឌលគិរី ចាប់ផ្ដើមចុះត្រជាក់ខ្លាំងរយៈពេល៣ថ្ងៃ លាយឡំខ្យល់កន្ត្រាក់ ដោយរងឥទ្ធិពលព្យុះមូសុងឦសាន។ នាប៉ុន្មានថ្ងៃកន្លងមកនេះ អាកាសធាតុចាប់ផ្ដើមចុះត្រជាក់ជាបន្តបន្ទាប់ ផ្ទៃមេឃមានសភាពអួអ័ព្វលាយឡំខ្យល់កន្ត្រាក់ និងតំណក់ទឹកភ្លៀង។

សភាពបែបនេះធ្វើឱ្យអាកាសធាតុចុះត្រជាក់ដល់ ២១-៣០ អង្សាសេ ចាប់ពីពីថ្ងៃទី១៩-២៣ខែវិច្ឆិកា ដោយទទួល​ឥទ្ធិពលពីខ្យល់មូសុងឦសាន ខ្យល់បក់ពីទិសឦសានមានល្បឿនពី២-៥ម៉ែត្រ/វិនាទីនិង មានខ្យល់បក់ខ្លាំងក្នុងល្បឿន ៨-១៣ម៉ែត្រ/វិនាទី លាយឡំភ្លៀងផ្គរ និងរន្ទះផងដែរ៕

ដោយ៖ ខៀវ ចាប/ រៀម សុខហេង