ពាក់មី ប្រកាសទទួលតែជំនួយអាហារក្រៀម និងសម្ភារៈចាំបាច់ ខណៈគ្រោងចេញដំណើរស្អែកនេះ

នារាត្រីថ្ងៃទី០៨ ធ្នូនេះ នាយពាក់មី ប្រកាសប្រមូលស្បៀង និងសម្ភារៈជូនពលរដ្ឋភៀសសឹកដែលកំពុងរត់ភៀសខ្លួនជាបន្តបន្ទាប់ពីតំបន់ព្រំដែនកម្ពុជា-ថៃ ក្នុងស្ថានភាពបន្ទាន់ដែលទាហានថៃបន្តពង្រីកតំបន់ជម្លោះតាមបណ្តោយព្រំដែននៃប្រទេសទាំងពីរ ទាំងកំរោល។

ដោយសារស្ថានភាពបន្ទាន់ និងចំនួនដ៏ច្រើនលើសលប់នៃជនភៀសសឹកកម្ពុជា តារាកំប្លែងរូបនេះ​ក៏មិនខុសពីសប្បុរសជនដទៃទៀតដែរ ដែលមានទឹកចិត្តចូលរួមសម្រាកបន្ទុករាជរដ្ឋាភិបាលកម្ពុជា តាមរយៈការកៀរគរជាសម្ភារៈចាំបាច់ និងស្បៀងសម្រាប់ពលរដ្ឋភៀសសឹកកម្ពុជា ខណៈគ្រោងចេញដំណើរនៅថ្ងៃស្អែកនេះ។

លោកសង្កត់ធ្ងន់ដែរថា លោកមិនទទួលនូវថវិកាចូលរួមនោះឡើយ​ ដោយស្នើសុំជាសម្ភារៈ និងអាហារក្រៀមជំនួសវិញ ខណៈចំពោះប្រភេទអាហារក្រៀម លោកមានមី ១ពាន់កេសរួចហើយ នៅឡើយសុំជំនួយជាអាហារក្រៀម និងសម្ភារៈចាំបាច់ផ្សេងទៀត ដូចជា តង់, ភួយ, អង្រឹង, ខ្នើយ ជាដើម។ល។

ដោយឡែក ទាក់ទងនឹងទឹកបរិសុទ្ធវិញ លោកគូសបញ្ជាក់ដែរថា ក៏មិនទទួលពីភ្នំពេញទៅដែរ ក្នុងន័យថាធ្ងន់និងពិបាកដឹកជញ្ជូនផ្លូវឆ្ងាយ ដោយហេតុនេះ ទាក់ទងនឹងទឹកពិសារ លោកគ្រោងទិញនៅក្បែរតំបន់ភៀសសឹកតែម្តង។ សូមស្តាប់វីដេអូលម្អិត៖

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត