Bloomberg៖ មេដឹកនាំថៃ ប្រកាន់ជំហររឹងរូសលើជម្លោះជាមួយកម្ពុជា អាចធ្វើឲ្យ​លោកត្រាំខឹងសម្បារ

នាយករដ្ឋមន្ត្រីថៃ លោក អានុទីន ឆានវីរៈគុល កំពុងប្រើប្រាស់ការប៉ះទង្គិចគ្នាជាយដែនដែលបានកើតឡើងវិញជាមួយកម្ពុជា ដើម្បីប្រមូលការគាំទ្រពីអ្នកជាតិនិយមមុនការបោះឆ្នោត ដោយប្រឈមនឹងភាពស្មុគស្មាញជាមួយសហរដ្ឋអាមេរិក និងបទឈប់បាញ់ដែលពីមុនត្រូវបានផ្តល់កិត្តិយសដោយ​លោក​​ប្រធានាធិបតី ដូណាល់ ត្រាំ។ នេះ​ជា​ការ​ចេញ​ផ្សាយ​របស់​សារព័ត៍មាន​ Bloomberg កាល​ពី​ថ្ងៃ​ទី​៩​ខែ​ធ្នូ​ឆ្នាំ​២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប៉ះទង្គិចគ្នាតាមបណ្តោយព្រំដែនចម្ងាយ៨០០គីឡូម៉ែត្រ បានផ្ទុះឡើងម្តងទៀត​ប៉ុន្មានថ្ងៃថ្មីៗនេះ ដោយថៃ​បាន​បើក​ការ​វាយ​ប្រហារ​លើ​កម្ពុជា​មុន ដោយ​លែង​ខ្វល់​ពី​​បទ​ឈប់បាញ់​​កាល​​ពី​ខែ​តុលា។ Bloomberg ផ្សាយ​ថា ពេលវេលានេះបានផ្តល់ឱកាស​មាសឱកាស​​ប្រាក់​សម្រាប់​​នយោបា​យ​​របស់​លោក​អានុទីន ខណៈដែលលោកកំពុងស្វែងរកការពង្រឹងជំហរ​មុនការបោះឆ្នោតដែលរំពឹងទុកនៅខែមីនា​ តែប៉ុន្មានខែប៉ុណ្ណោះបន្ទាប់ពីចូលកាន់តំណែងជាប្រមុខរដ្ឋាភិបាលចម្រុះដ៏ផុយស្រួយ។

លោក​អានុទីន បានកំណត់ជម្លោះនេះថាជាបញ្ហានៃការការពារអធិបតេយ្យភាពរបស់ថៃ ហើយបានគាំទ្រជាសាធារណៈចំពោះគោលជំហរ​រឹង​រូស​​របស់យោធា។ លោកបាន​ប្រកាស​កាលពីថ្ងៃទី៨​ខែធ្នូ ដោយច្រានចោល​ផលវិបាកដែលអាចកើតមានចំពោះកិច្ចពិភាក្សាពាណិជ្ជកម្មអាមេរិកថា «នេះជាបញ្ហារវាងប្រទេសថៃ និងប្រទេសជិតខាងរបស់ខ្លួន។ មិនមានការព្រួយបារម្ភទេ»។

Bloomberg ចាត់ទុក​ថា យុទ្ធសាស្ត្រនេះមកជាមួយហានិភ័យ។ លោកត្រាំ ដែលបានសម្រុះសម្រួលបទឈប់បាញ់កាលពីខែតុលា​ ធ្លាប់​បាន​គំរាមកំហែងទីក្រុងបាងកក​ពី​ការ​ពិន័យ​ពន្ធ​ពាណិជ្ជកម្ម​ឲ្យ​ទទួល​យក​កិច្ច​ព្រមព្រៀង​សន្តិភាព។ បន្ទាប់ពី​ថៃបានផ្អាកកិច្ចព្រមព្រៀងនេះមួយរយៈពេលខ្លីនៅក្នុងខែវិច្ឆិកា ក្រោយហេតុការណ៍​ផ្ទុះមីន លោកត្រាំ​​​បាន​ហៅ​ទូរសព្ទទៅមេដឹកនាំនៃប្រទេសទាំងពីរ ដោយជំរុញ​​ឲ្យ​មានការអត់ធ្មត់។

ទីក្រុងវ៉ាស៊ីនតោនមិនបានធ្វើអត្ថាធិប្បាយលើអំពើហិង្សាចុងក្រោយនេះទេ ទោះបីជាលោក Marco Rubio រដ្ឋមន្ត្រីការបរទេសកាលពីថ្ងៃទី៩​ខែធ្នូ បានជំរុញ​ឲ្យ​មាន «ការបញ្ឈប់អរិភាពជាបន្ទាន់» និងវិលត្រឡប់ទៅរកវិធានការបន្ធូរបន្ថយភាពតានតឹងដែលបានព្រមព្រៀងគ្នាក៏ដោយ។ អ្នកវិភាគយល់​ឃើញ​ថា អស្ថិរភាពបន្ថែមទៀតអាចបង្ក​ឲ្យ​​ទីក្រុងវ៉ាស៊ីនតោន​​មាន​ការ​ខឹង​សម្បារ និង​បាត់​​​ទំនុក​​ចិត្ត​​លើ​ប្រទេសថៃ។

អ្នកស្រី Laura Schwartz អ្នកវិភាគជាន់ខ្ពស់ផ្នែកអាស៊ីនៅ Verisk Maplecroft បាននិយាយថា «ការកើនឡើងចុងក្រោយនេះប្រឈមនឹងការ​បង្កើន​ការព្រួយបារម្ភថា ទីក្រុងបាងកក​មិនអាច ឬមិនមានឆន្ទៈក្នុងការធ្វើ​ឲ្យ​ជម្លោះមានស្ថិរភាព»។

ទន្ទឹម​គ្នា​នេះ​ដែរ ជំហររបស់លោក​អានុទីន កំពុងធ្វើ​ឲ្យ​មាន​ការ​ជជែក​ដេញ​ដោល​ខ្លាំង។ ការស្ទង់មតិថ្មីៗនេះបានបង្ហាញថា ជាងពាក់កណ្តាលនៃអ្នកឆ្លើយតបបានជំទាស់នឹងការទាក់ទងគ្នាកាន់តែជិតស្និទ្ធជាមួយកម្ពុជា ហើយភាគច្រើនជឿថា មហាអំណាចខាងក្រៅកំពុងធ្វើសកម្មភាពដើម្បីផលប្រយោជន៍ផ្ទាល់ខ្លួនរបស់ពួកគេ។ ក្រុមធុរកិច្ចមួយចំនួន ទោះបីជាប្រឈមមុខនឹងផលប៉ះពាល់រួមគ្នាចំនួន៣.១ពាន់លានដុល្លារ​ពី​ផល​រំខាន​នៅ​ព្រំដែន និងពន្ធគយរបស់​អាមេរិកក៏ដោយ បានគាំទ្រអាទិភាពរបស់រដ្ឋាភិបាលលើសន្តិសុខជាងសេដ្ឋកិច្ច​​ខ្លួន។

អ្នកវិភាគបាន​លើក​ឡើង​ថា វិធីសាស្រ្ត​របស់​លោក​អានុទីន គឺ​ចង់​បាន​ការ​ធានានូវទំនាក់ទំនង​ជាមួយយោធា ដែលត្រូវបានចាត់ទុកថាចាំបាច់សម្រាប់ស្ថិរភាពនយោបាយនៅក្នុងប្រទេសថៃ។ កងទ័ពបានប្រកាន់ជំហរឈ្លានពានកាន់តែខ្លាំង ដោយលោកឧត្តមសេនីយ៍ Chaiyapruek Duangprapat ប្រធានអគ្គសេនាធិការកងទ័ពជើងគោក បាន​បញ្ជាក់​ថា គោលដៅគឺធ្វើ​ឲ្យ​កម្ពុជា «បាត់បង់​ប្រសិទ្ធភាពផ្នែកយោធាក្នុងរយៈពេលយូរ»។

ភាពតានតឹងដែល​​ផ្ទុះ​ឡើង​វិញនេះ កើតឡើងស្របពេលដែលប្រទេសថៃកំពុងប្រឈមមុខនឹងទឹកជំនន់ដ៏អាក្រក់បំផុតនៅភាគខាងត្បូងក្នុងរយៈពេលជាច្រើនទសវត្សរ៍ ដោយមានការខាតបង់សេដ្ឋកិច្ចប៉ាន់ស្មានរហូតដល់ ៥០០ពាន់លានបាត (២០.៤ពាន់លានដុល្លារអាមេរិក)។ វិបត្តិ​នេះ​បាន​ដាក់​សម្ពាធ​​ និងធ្វើ​ឲ្យ​រដ្ឋាភិបាលធ្លាក់​ចុះ​នូវ​ការ​គាំទ្រ។ កត្តា​នេះ​អាច​ជា​ហេតុ​ដែល​លោក​អានុទីន​​ប្រឹង​ប្រកាន់​ជំហរ​រឹងរូស​ឈ្លានពាន​ទឹក​ដី​កម្ពុជា ទោះ​ប្រឈម​មុខ​​សម្ពាធ​ពី​អន្តរជាតិ ឬ​មហា​អំណាច​ពិភពលោក ជា​ពិសេស​លោក​ដូណាល់ ត្រាំ ដែល​ខ្នះខ្នែង​បង្កើត​បទ​ឈប់បាញ់​រវាង​ភាគី​ជម្លោះ​ទាំង​ពីរ៕

ប្រែសម្រួល៖ ឈាង