អានុទីន «មានឆន្ទៈ» ​និយាយជាមួយ ត្រាំ ​​​ប៉ុន្តែ​ថា​បទ​ឈប់​បាញ់ជាមួយកម្ពុជាជាបញ្ហាដាច់ដោយឡែក

នាយករដ្ឋមន្ត្រីថៃ លោក​ អានុទីន ឆានវីរៈគុណ បាន​​ឱ្យដឹងនៅរសៀលថ្ងៃពុធនេះ​ថា ប្រធានាធិបតីសហរដ្ឋអាមេរិក លោក ដូណាល់ ត្រាំ មិនទាន់បានទាក់ទង​ថៃ ដើម្បីពិភាក្សាអំពីបទឈប់បាញ់ជាមួយ​កម្ពុជានៅឡើយទេ ខណៈនិយាយទាំងគឃ្លើនថា​ បទឈប់បាញ់ជាបញ្ហាដាច់ដោយឡែក។ នេះបើតាមការចុះផ្សាយរបស់កាសែត Khaosod។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អានុទីន បានសង្កត់ធ្ងន់ថា លោកមានឆន្ទៈក្នុងការ​សន្ទនាជាមួយ ត្រាំ ប៉ុន្តែថា ការពិភាក្សាណាមួយត្រូវតែធ្វើតាម​រយៈក្រសួងការបរទេស តាមបណ្ដាញ និងមាន​កាលវិភាគកំណត់ត្រឹមត្រូវ។ លោកបានបដិសេធមិនធ្វើអត្ថាធិប្បាយអំពីរយៈពេលដែលថៃនឹង​បន្តឈ្លានពានកម្ពុជា ​ដោយបញ្ជាក់ថា វាជាបញ្ហាសន្តិសុខជាតិ។​

លោកបាន​និយាយថា លោកនឹង​​ឆ្លើយ និងពន្យល់លោក ត្រាំ អំពីស្ថានភាពបច្ចុប្បន្ន ព្រោះមេដឹកនាំបរទេសអាចមិនយល់ច្បាស់អំពីស្ថានភាពនៅនឹងកន្លែង។

ថាតើបទឈប់បាញ់អាចត្រូវបានបញ្ជា ឬរងការដាក់សម្ពាធពីខាងក្រៅឬអត់នោះ លោក អានុទីន បានបញ្ជាក់ថា វាជាបញ្ហាដាច់ដោយឡែកមួយ ព្រោះជម្លោះនេះ​ពាក់ព័ន្ធតែថៃ និងកម្ពុជា ប៉ុណ្ណោះ។ ​មេដឹកនាំដដែលបានបន្តថា ខណៈ​មេដឹកនាំផ្សេងទៀតអាចចង់បានសន្តិភាព ប្រទេសថៃត្រូវតែពន្យល់ពីបញ្ហា និងមូលហេតុនៅពីក្រោយស្ថានភាពបច្ចុប្បន្ន ហើយ​ការកំណត់ពេលវេលាកិច្ចប្រជុំនៅកម្រិតថ្នាក់ដឹកនាំតម្រូវឱ្យមានការរៀបចំចំណុចពិភាក្សា រួមទាំងការចូលរួមពីរដ្ឋមន្ត្រីការបរទេស អគ្គមេបញ្ជាការ និងរដ្ឋមន្ត្រីការពារជាតិ ដើម្បីដោះស្រាយបញ្ហាដោយតម្លាភាព។

លោក អានុទីន បានបញ្ជាក់ថា រហូតមកដល់ពេលនេះមិនទាន់មានប្រទេសផ្សេងទៀតបានទាក់ទងប្រទេសថៃនៅឡើយទេ។ ​

គួរគូសបញ្ជាក់ថា កាលពីម្សិលមិញ លោក អានុទីន បាន​ប្រកាសថាថៃបិទការចរចាជាមួយកម្ពុជា ជុំវិញភាពតានតឹងព្រំដែនចុងក្រោយ។ យ៉ាងណាមិញ ​លោកបែបជានិយាយនៅថ្ងៃនេះថា លោក​មិនទាន់ឃើញកម្ពុជាទាក់ទងទៅថៃសម្រាប់ការចរចា​។ នេះបើតាមការចុះផ្សាយរបស់កាសែត Khaosod។

ដោយឡែក អ្នកនាំពាក្យក្រសួង​ការ​បរទេសថៃ លោក Nikorndej Balankura បាននិយាយនៅក្នុងសន្និសីទសារព័ត៌មាននៅក្រសួងការ​បរទេស នាថ្ងៃពុធទី ១០ ខែ ធ្នូ​ ​ថា ថៃ​បដិសេធ​ចំពោះការសម្របសម្រួល​ពីភាគីទី ៣ ណាមួយ ​ក្នុងជម្លោះព្រំដែន​ជាមួយ​​កម្ពុជាបច្ចុប្បន្ន៕

​