ព័ត៌មានអន្ដរជាតិ

វិស័យឯកជនថៃបារម្ភកាន់តែខ្លាំងលើការខាតបង់សេដ្ឋកិច្ច ពីសង្រ្គាមឈ្លានពានកម្ពុជារបស់យោធាថៃ

បានផុស

៥ ខែ មុន

នៅ

ថ្ងៃចន្ទ ១៥ ធ្នូ ២០២៥

ដោយ

វិស័យឯកជនថៃបានសម្ដែងការព្រួយបារម្ភកាន់តែខ្លាំងលើការខាតបង់សេដ្ឋកិច្ច ពីសង្រ្គាមឈ្លានពានកម្ពុជារបស់យោធាថៃ ដែលធ្វើឱ្យការបិទព្រំដែនបន្តអូសបន្លាយ និងប៉ះពាល់ដល់ខេត្តថៃនៅភាគឦសានរបស់ថៃខ្លាំងជាងគេ។ នេះបើតាមការចុះផ្សាយរបស់កាសែត The Nation។

កន្លងមក ការបិទព្រំដែនគោកទាំងស្រុង ដែលផ្ដើម និងអូសបន្លាយតាំងពីខែមិថុនាមកនោះ បានប៉ះពាល់ដល់ខ្លាំងដល់ខេត្តចំនួន ៦ របស់ថៃ នៅភាគឦសាន ដោយបង្កការខាតបង់ពាណិជ្ជកម្មពាណិជ្ជកម្មចន្លោះពី ៥០-៨០ ប៊ីលានបាត (១,៦-២,៤ ប៊ីលានដុល្លារ) ខណៈវិបត្តិការងារក៏កំពុងកើនឡើង។

ប្រធានក្លឹបអាជីវកម្មភោជនីយដ្ឋាន និងជាទីប្រឹក្សាកិត្តិយសនៃសមាគមសណ្ឋាគារថៃ លោក Sorathep Rojpotjanaruch បានប្រាប់ថា ភាពតានតឹងព្រំដែនរយៈពេល ៧ ខែ និងការបិទច្រកព្រំដែនយូរ បានប៉ះពាល់ដល់ការនាំចេញរបស់ថៃទៅកាន់កម្ពុជា ដែលជាធម្មតាមានតម្លៃប្រហែល ៧០ ប៊ីលានបាត/ឆ្នាំ។

លោកបានថ្លែងថា ខណៈផលប៉ះពាល់លើ GDP (ផលិតផលក្នុងស្រុកសរុប) របស់ថៃអាចមានកម្រិត ត្រឹមប្រហែល ០,២% ការខាងបង់ប៉ះពាល់ខ្លាំងក្នុងខេត្តឦសានជាប់ព្រំដែនចំនួន ៦។ ឥឡូវនេះ ក្រសួងពាណិជ្ជកម្មកំពុងព្យាយាមស្វែងរកទីផ្សារជំនួស ដើម្បីបន្ធូរបន្ថយការលំបាកសម្រាប់អាជីវកម្មក្នុងស្រុក។

អ្នកជំនាញខាងវិស័យឯកជនដដែលបានឱ្យដឹងថា កាលណាជម្លោះអូសបន្លាយកាន់តែយូរ នោះប្រជាជនកម្ពុជាងាកទៅប្រើផលិតផលវៀតណាមកាន់តែច្រើន ដែលធ្វើឱ្យថៃបាត់បង់ទីផ្សារកាន់តែខ្លាំង។

ចំពោះការវិនិយោគវិញ អាជីវកម្មថៃនៅកម្ពុជាភាគច្រើនផ្តោតលើទំនិញប្រើប្រាស់ កសិកម្ម និងប្រេង។ លោក Sorathep បាននិយាយថា ក្រុមហ៊ុនថាមពលរដ្ឋ PTT បានដកខ្លួនចេញទាំងស្រុងរួចហើយ ដូច្នេះផលប៉ះពាល់ភាគច្រើនគឺទៅលើវិស័យឯកជន ដោយមានផលប៉ះពាល់តិចតួចលើម៉ាក្រូសេដ្ឋកិច្ចរបស់ថៃ។ យ៉ាងណាមិញ ភាពមិនប្រាកដប្រជាអាចជំរុញឱ្យក្រុមហ៊ុនបរទេសមួយចំនួនរើទីតាំងផលិតកម្មត្រឡប់ទៅថៃវិញ ទោះបីជាក្រុមហ៊ុនធំៗមិនទាន់ធ្វើការសម្រេចចិត្តច្បាស់លាស់ក្ដី។

ដោយឡែក កង្វះកម្លាំងពលកម្មគឺជាក្តីបារម្ភដ៏ធំមួយ។ បច្ចុប្បន្ន ថៃអនុវត្តវិធានការមិនបន្តលិខិតការងារសម្រាប់កម្មករកម្ពុជា ទោះបីជាកម្មករកម្ពុជារួមចំណែកកម្លាំងពលកម្មចន្លោះពី ៧០០០០០ – ៨០០ ០០០ នាក់ ក្នុងវិស័យការងារថៃជារៀងរាល់ឆ្នាំក៏ដោយ។ បើគ្មានការរៀបចំជំនួសរហ័សទេ កង្វះខាតកម្លាំងពលកម្មអាចប៉ះពាល់កាន់តែខ្លាំងដល់សេវាកម្ម និងឧស្សាហកម្មថៃ ដែលពឹងផ្អែកយ៉ាងខ្លាំងទៅលើកម្មករបរទេស។

មួយវិញទៀត ផលប៉ះពាល់វិស័យទេសចរណ៍ភាគច្រើនកើតឡើងតាមតំបន់ជាប់ព្រំដែន ដូចជានៅខេត្តចន្ទបុរី ជាដើម ចំពេលដែលផលប៉ះពាល់ធំជាងនេះកើតចេញពីទឹកជំនន់ធ្ងន់ធ្ងរនៅភាគខាងត្បូង ដែលធ្វើឱ្យភ្ញៀវទេសចរម៉ាឡេស៊ីលុបចោលដំណើរកម្សាន្តរបស់ពួកគេ ហើយបន្ថែមបន្ទុកសម្រាប់វិស័យទេសចរណ៍ថៃទាំងមូល ដែលកំពុងធ្លាក់ចុះ៕