ព្រះសង្ឃ និងពលរដ្ឋយ៉ាងច្រើនកុះករ និមន្តអញ្ជើញចូលរួមដើរព្យុហយាត្រា ដើរដើម្បីសន្តិភាព

កម្មវិធី ដើរក្បួនព្យុហយាត្រា មានការនិមន្តអញ្ជើញចូលរួមយ៉ាងច្រើនកុះករពីសំណាក់ ព្រះសង្ឃរាប់ម៉ឺនអង្គ និងប្រជាពលរដ្ឋខ្មែរគ្រប់រូប មកពីតាមបណ្ដាវត្តនានា ចូលរួម «ដើរដើម្បីសន្តិភាព» ដើម្បីបង្ហាញស្មារតីគាំទ្រសន្តិភាព ពិសេសជំរុញឱ្យមានការគោរពបទឈប់បាញ់ និងកិច្ចព្រមព្រៀងសន្តិភាពរវាងកម្ពុជា និងថៃ។

កម្មវិធីនេះបានរៀបចំដោយ សហភាពសហព័ន្ធយុវជនកម្ពុជា ដើរព្យុហយាត្រា ដើម្បីសន្ដិភាព កាលពីថ្ងៃទី១៨ ខែធ្នូ ឆ្នាំ២០២៥ ម្សិលមិញ ដោយមានការចូលរួមពីព្រះសង្ឃរាប់ម៉ឺនអង្គ ប្រជាពលរដ្ឋ និងយុវជន មកពីគ្រប់មជ្ឈដ្ឋាន ដែលចាប់ផ្តើមពី នៅមុខផ្សាររាត្រីមាត់ទន្លេ រហូតដល់សួនច្បារវិមានឯករាជ្យ ដើម្បីបង្ហាញស្មារតីគាំទ្រសន្តិភាព និង បង្ហាញទៅកាន់ពិភពលោក និងសហគមន៍អន្តរជាតិ កម្ពុជាចង់បានសន្តិភាព ជាពិសេសជំរុញឱ្យមានការគោរពបទឈប់បាញ់ និងកិច្ចព្រមព្រៀងសន្តិភាពរវាងកម្ពុជា និងថៃ ឡើងវិញ។

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា លើកឡើងថា កម្មវីធី ដើរក្បួនព្យុហយាត្រា «ដើរដើម្បីសន្តិភាព» មានគោលបំណងតែមួយគត់ គឺដើម្បីបង្ហាញទៅអន្តរជាតិ រួមទាំងប្រជាជនថៃផងដែរថា កម្ពុជាមិនត្រូវការសង្គ្រាម កម្ពុជាចង់បានសុខសន្តិភាព ត្រូវការការផ្សះផ្សា ដើម្បីកសាងជំនឿទុកចិត្តសាជាថ្មី និងបញ្ចប់វិនាសកម្មទាំងឡាយលើប្រជាជាតិប្រទេសទាំងពីរ។ សំឡេងរបស់ពលរដ្ឋខ្មែរពីគ្រប់ទិសទី ពិតជាមានទម្ងន់ក្នុងការបង្ហាញឆន្ទៈដ៏មុតស្រួច យើងចង់បានសន្តិភាពសម្រាប់ប្រជាជាតិ កម្ពុជា-ថៃ និងសម្រាប់ប្រជាជាតិទូទាំងប្រទេស៕

អត្ថបទ៖ ម៉េង