ឆាបឆេះឃ្លាំងស្តុកជ័រ រួមសម្ភារៈមួយចំនួនខូចខាតស្ទើរទាំងស្រុង នៅសង្ដាត់និរោធ

អគ្គិភ័យលេបត្របាក់ឃ្លាំងស្តុកទុយោជ័រ រួមសម្ភារៈមួយចំនួន អស់ស្ទើរទាំងស្រុង ដោយមិនទាន់ដឹងមូលហេតុ សមត្ថកិច្ចជំនាញចេញរថយន្តពន្លត់អគ្គិភ័យជាច្រើនគ្រឿងអន្តរាគមន៍។

ហេតុការណ៍នេះបង្កភ្ញាក់ផ្អើលកាលពីវេលាម៉ោង០៣រសៀល ថ្ងៃទី០១ ខែមករា ឆ្នាំ២០២៦ នៅចំណុចឃ្លាំងស្តុកទុយោជ័រ ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។

តាមការបញ្ជាក់ពីប្រជាពលរដ្ឋនៅក្បែរៗនោះបានអោយដឹងថា មុនកើតហេតុ គេបានឃើញផ្សែងខ្មៅហ៊ុយ ចេញពីក្រោយផ្ទះរបស់ពួកគាត់ ដែលខាងក្រោយនោះគឺ មានឃ្លាំងស្តុកជ័រមួយកន្លែង។  ភ្លាមៗ គាត់មានការភ័យស្លន់ស្លោរ ខ្លាចមានការរាលដាលកាន់តែខ្លាំង បានប្រញាប់ប្រញាល់រាយការណ៍ជូនសមត្ថកិច្ចមូលដ្ឋាន ដើម្បីបន្តទាក់ទងទៅកាន់មន្រ្តីជំនាញពន្លត់អគ្គិភ័យ អោយជួយបញ្ចេញរថយន្តមកកាន់ទីតាំងខាងលើនេះផងដែរ ជៀសវាងមានការរាលដាលបន្តទៅទៀត។

អគ្គិភ័យនេះដែរ បានបង្កការខូចខាតឃ្លាំងស្តុកទុយោជ័រ រួមជាមួយសម្ភារៈមួយចំនួន អស់ស្ទើរទាំងស្រុង ក្នុងនោះបានប្រើប្រាស់រថយន្តពន្លត់អគ្គិភ័យ របស់ស្នងការដ្ឋាននគរបាលរាជធានីភ្នំពេញ នឹងរថយន្តជំនួយទីក្រុងនរា , រថយន្ត បុរីប៉េងហួត , រថយន្តសាលាខណ្ឌច្បារអំពៅ អស់ជាច្រើនគ្រឿង អន្តរាគមន៍បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចជំនាញកំពុងធ្វើការស្រាវជ្រាវ រកមូលហេតុ ៕ អត្ថបទ ៖ រដ្ឋា