កីឡា

សហព័ន្ធកីឡាកាយសម្ព័ន្ធកម្ពុជា ការប្រកួតជើងឯកថ្នាក់ជាតិនេះជាការវាស់ស្ទង់សមត្ថភាពហ្វឹកហាត់

បានផុស

៤ ខែ មុន

នៅ

ថ្ងៃសុក្រ ២ មករា ២០២៦

ដោយ

អគ្គលេខាធិការសហព័ន្ធកីឡាកាយសម្ព័ន្ធកម្ពុជា ថាការប្រកួតជ្រើសរើសជើងឯកថ្នាក់ជាតិ ប្រចាំឆ្នាំ២០២៥ នេះជាការវាស់ស្ទង់សមត្ថភាព បច្ចេកទេសដែលកីឡាករ កីឡាការិនីបានហ្វឹកហាត់កន្លងមកនេះ និងជាការត្រៀមខ្លួនឆ្ពោះទៅព្រឹត្តិការណ៍កីឡាយុវជនអាស៊ី លើកនៅឆ្នាំ២០៣១ ដែលកម្ពុជាជាម្ចាស់ផ្ទះផងដែរ។

ទិដ្ឋភាពប្រកួត

លោក ណយ ផាន់ណា អគ្គលេខាធិការសហព័ន្ធបានឲ្យដឹងថា ដោយផ្អែកតាមរបាយការណ៍របស់គណៈកម្មការរៀបចំការប្រកួតបានឱ្យដឹងថាការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី៩ ប្រចាំឆ្នាំ២០២៥ ទទួលបាននូវលទ្ធផលល្អប្រសើរ។

ទិដ្ឋភាពប្រកួត

ថ្នាក់ដឹកនាំ និងជាគ្រូជើងចាស់រូបនេះបន្ថែមទៀតថា តាមរយៈការប្រកួតនេះគឺជាការវាស់ស្ទង់សមត្ថភាព បច្ចេកទេស ទេពកោសល្យដែលកីឡាករ កីឡាការិនីម្នាក់ៗបានប្រឹងប្រែងហ្វឹកហាត់កន្លងមក។ កីឡាករ កីឡាការិនីដែលទទួលជ័យលាភីនាពេលនេះបានខិតខំតស៊ូព្យាយាមហ្វឹកហាត់គោរពវិន័យបានល្អយកចិត្តទុកដាក់ស្តាប់ការពន្យល់បង្ហាត់បង្រៀនរបស់គ្រូបង្វឹក និងដោយមានការយកចិត្តទុកដាក់ពីក្រសួងអប់រំ យុវជន និងកីឡា ថ្នាក់ដឹកនាំគណៈកម្មាធិការជាតិអូឡាំពិកកម្ពុជា និងជាពិសេសថ្នាក់ដឹកនាំសហព័ន្ធកីឡាកាយសម្ព័ន្ធកម្ពុជា រួមជាមួយមន្ត្រីបច្ចេកទេសផងដែរ។

លោក ណយ ផាន់ណា

ក្នុងនាមឯកឧត្តមបណ្ឌិតប្រធាន សហព័ន្ធកីឡាកាយសម្ព័ន្ធកម្ពុជា និងខ្លួនលោកផ្ទាល់ សូមថ្លែងអំណរគុណយ៉ាងជ្រាលជ្រៅចំពោះប្រតិភូ គ្រូបង្វឹក កីឡាករ កីឡាការិនី ដែលបានចូលរួមប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ ប្រចាំឆ្នាំ ២០២៥ នេះដោយគោរពតាមការណែនាំរបស់ក្រសួងអប់រំ យុវជន និងកីឡា និងអនុវត្តតាមបទបញ្ជាបច្ចេកទេស ក្រមសីលធម៌កីឡា និងស្មារតី Fair Play ក្នុងការប្រកួត ទើបនាំឱ្យការប្រកួតនេះប្រព្រឹត្តទៅដោយរលូនតាំងពីដើមរហូតចប់។

បញ្ជាក់ដែរថា សហព័ន្ធកីឡាកាយសម្ព័ន្ធកម្ពុជាបានរៀបចំការប្រកួតជ្រើសរើសជើងឯកថ្នាក់ជាតិរបស់ខ្លួនកាលពីថ្ងៃទី២៦ ដល់ ៣១ ខែធ្នូ ឆ្នាំ២០២៥ នៅសាលហ្វឹកហាត់ក្នុងពហុកីឡដ្ឋានជាតិ៕